ယ့ၫၡုၬမၩဘျၪထဲၩ့ၦဒိၪလဂၩအဖိၪခွၫ.

လၧနံၫနံၩအလးခဲၫ့တၭႇ အဝ့ၫစဲၪ့ထၪ့ခွံၬထီးနီၪႇ လ့ၩထီၩ့လၧဂၫလလံၫအဖၧၩ့နီၪလီၫ.- အဂဲးဘဲၫယီၩ ယ့ၫၡုၬအနၫ့ဆါဒၪဝ့ၫ ထိးအၥၭလၧမီၪလဂၩဂၩနီၪ ထီးအထံၫအခးဖၧၩ့ ဒၪဝ့ၫအလၩအဖၩ့အီၪအ့ၬ.-

မၩအၥၭဘဲၫနီၪတၭႇ ထီးအလ့ၩထီၩ့လၧဂၫလလံၫအဖၧၩ့နီၪႇ ၦဂၫလလံၫဖိၪၥံၪ ထိးဆၧၫ့ဝ့ၫဒၪလီၫ. အဂဲးဘဲၫယီၩ အဝ့ၫၥံၪလ့ၩလၧဘိၪ့ဖၧၩ့ လၧယရုစလံၫ့နီၪ ဒၪဘၪယူၭဆၧလၧအမၩဝ့ၫ ထီးအလူၬလၧဘိၪ့ဖၧၩ့ယူၭ.

မၩအၥၭဘဲၫနီၪတၭႇ ယ့ၫၡုၬလ့ၩဒီၭလၧကၫနၫဘၪဆဲၫ့လၧဂၫလလံၫ ထီးအလးလၧအမၩကဲၪထၪ့ထံၫ လၧစဘံၭထံၫနီၪလီၫ. ၦဒိၪလဂၩအဖိၪခွၫလကဲၪဘၪအီၪလၧကပၧနအၫ့နီၪလီၫ.- အဝ့ၫနီၪနါဂၧၫ့လၧ ယ့ၫၡုၬဂဲၫထၪ့လၧခးယုဒၫ ထီၩ့လၧဂၫလလံၫအဖၧၩ့တၭႇ လ့ၩဝ့ၫထီၩ့လၧအအီၪနီၪႇ အၪ့ကံၩ့အၪ့ယၫဝ့ၫ ဘဲၫၥိၭအမိဂဲၫမၩဘျၪထဲၩ့ အဖိၪခွၫတၭႇ အဂဲးဘဲၫယီၩ လၩ့ဘူၭလၧအမိၥံၫဝ့ၫဒၪလီၫ.-

မၩအၥၭဘဲၫနီၪတၭႇ ယ့ၫၡုၬစံၭအဝ့ၫႇ နၥံၪအ့ၪလဒၪဘၪ ဆၧမၩနဲၪ့ ဒဲဆၧလၩ့လိလၩ့လၭနီၪနၥံၪနဲၩဆၧအ့ၬ.- ၦဒိၪစံၭအဝ့ၫႇ ကဆါဧ့ႇ လၧယဖိၪခွၫ လချႃၭၥံၫဒံၭဘၪတၭႇ ဂဲၫလၩ့ဘီၪ.- ယ့ၫၡုၬစံၭဝ့ၫႇ ထဲၩ့ကဒၪဘီၪႇ နဖိၪခွၫမၧၫ့ဝ့ၫလီၫ.

ၦလဂၩနီၪနဲၩဆၧချဲၩ့လၧ ယ့ၫၡုၬလီၩဘၪဝ့ၫတၭႇ ထဲၩ့ထဲၩ့ဝ့ၫလီၫ.- ထဲၩ့လၩ့ဝ့ၫအဘိၩ့ဘၭတၭႇ အခ့ၫအၡၩလဖၪဂဲၫအၪ့ဂၬဝ့ၫတၭႇ လီၩဘၪဆၧႇ စံၭဝ့ၫႇ နဖိၪခွၫမၧၫ့ဝ့ၫလီၫ.- မၩအၥၭဘဲၫနီၪတၭႇ အဝ့ၫဒၪအၪ့စၪ့အဝ့ၫၥံၪႇ အနၩရံၩလၧအကီၩ့ယါထဲၩ့ဝ့ၫနီၪလီၫ. အဝ့ၫၥံၪလီၩဘၪဝ့ၫႇ လၧမုဂၪလနံၩ နွ့ၫနၩရံၩနီၪႇ အဆၧဆူၪဂိၬဘျၪထဲၩ့ဝ့ၫလီၫ.

မၩအၥၭဘဲၫနီၪတၭႇ အဖါၥ့ၪယၫလၧအမွဲနၩရံၩ လၧယ့ၫၡုၬလီၩဘၪဝ့ၫ နဖိၪခွၫမၧၫ့ဝ့ၫလီၫ. အဝ့ၫနီၪ အနၫ့ဆါနဲၩထဲၩ့ဆၧဒဲ အဂံၪ့ဖိၪထၧၫ့ဂံၪ့ယၫလီၫ.

 ယ့ၫၡုၬဂဲၫထၪ့ခွံၬ လၧခးယုဒၫထီၩ့လၧဂၫလလံၫအ ဖၧၩ့နီၪႇ မၩလၩ့လၭဒီၭဆၧလမံၩ့ယီၩႇ မွဲနံၫမံၩ့လမံၩ့ လီၫ.