ယ့ၫၡုၬမၩဘျၪထဲၩ့ၦခွၫလဂၩလၧဆၧနၪအီၪလၧအဖၧၩ့

ထီးအလ့ၩထီၩ့ လၧအထံၩအဖျဲၥံၪအအီၪနီၪဒၪဘၪ ၦခမျၧးဖၭဒိၪ အီၪဖီၩ့ဝ့ၫတၭ ၦကွ့ၭလံၬၥံၪတ့ၭလိၬအၥၭလၧအဝ့ၫၥံၪလီၫ.- ၦခမျၧးထီးအလူၬဒၪဘၪဝ့ၫနီၪ ထီၫမံၫထီၫမၪချဲၫ့မၬတၭ ဂဲၫစဲၪ့တလဲးစိၩဝ့ၫလၧအအီၪနီၪ ချဲၩ့ဒုၪ့ဝ့ၫလီၫ.- အဝ့ၫဒၪအၪ့စၪ့အဝ့ၫၥံၪ မွဲနၥံၪတ့ၭလိၬ နၥံၪအၥၭလၧၦလဖၪနီၪလၧဆၧနီၪလၫ အဂဲးလဲၪ.ၦအီၪထီးၦခမျၧးအကျၩလဂၩချဲၩ့ထၪ့ဝ့ၫတၭ စံၭ ဝ့ၫ ဆရၫဧ့ ယဖိၪခွၫလၧဆၧနၪချဲၩ့လၥ့ၪဘၪအီၪလၧအလီၩ့လဂၩ ယဂဲၫဆိၬယူၭလၧနအီၪယူၭ.- ထီး ဒၪအလးလၧအဖီၪ့ထၬဝ့ၫလစီၪ့စီၪ့နီၪ မၩလၩ့ထံၩဖါ ဝ့ၫတၭအနိၭပၠူၭလၩ့တၭ အဲၪ့ဂံၬအၥွၫတၭ ဎွ့ လၩ့ဝ့ၫလီၫ.ယအၪ့မၧၫ့နထံၩနဖျဲၥံၪ နၫ့ထၪ့ခွံၬဝ့ၫတၭမၩဝ့ၫၥ့ၪအ့ၬ.- အဝ့ၫဒၪချဲၩ့ဆၧၫ့ဆၧတၭစံၭဝ့ၫၦလ နဲၩဘၪဆၧအဆၨၩဧ့ မွဲယမိဘၪအီၪလၧနၥံၪအၥိၭဆံၭယံၬလဲၪး ယမိဘၪအွံၪၥၭဆၧၩ့နၥံၪဆံၭယံၬလဲၪးဂဲၫဆိၬအဝ့ၫနီၪလၧယအီၪဆံၭ.- ၦလ့ၩဆိၬဝ့ၫလၧအအီၪလီၫ. ထီးအဒၪဘၪဝ့ၫတၭ ဆၧနၪဒုၭကဲၩ့ထၪ့ဝ့ၫ နၭနၭလ့ၬချဲၫ့မၬတၭ လၩ့ထံၩဖါဝ့ၫလၧဂၪ့ခိၪလီၩ့တၭအနိၭပၠူၭလၩ့ဝ့ၫချံးအၥၭလီၫ.- အဝ့ၫဒၪအၪ့စၪ့ အဖါဆၧမၩယူၭအၥၭဘဲၫယီၩ မွဲအဆံၭယံၬယူၭ လဲၪ.အဝ့ၫနီၪစံၭဝ့ၫလၧအဖိၪၥၪလံၩလံၩလီၫ.ဘဲၫၥိၭအမိမၩၥံၫအဝ့ၫနီၪ ခွံၬလၩ့ခွံၬဝ့ၫလၧမ့ၪဖၧၩ့ ဒဲလၧထံၫကျၩအၪဘျၩ့လီၫ.အ့ၪမွဲနဝ့ၫဒၪယီၩ နမၩ အ့ၪၥ့ၪလမံၩ့မံၩ့တၭ ယၫ့ၥုၪ့ယၫ့ၥၭတၭ မၩဘိၭမၩဆၧၩ့ပၧၩဆံၭ.- ယ့ၫၡုၬစံၭဝ့ၫနဝ့ၫဒၪယီၩနနဲၩဆၧ အ့ၪၥ့ၪတၭဆၧၥ့ၪဆၧလူၬ လၧၦလၧအနဲၩဆၧအဂးလီၫ.- ဖိၪၥၪအဖါနီၪကိၭၡၭထၪ့ဆၧချဲၫ့မၬတၭ စံၭ ဝ့ၫ ယနဲၩဆၧကဆါဧ့ယလနဲၩဘၪဆၧယီၩမၩဆၧၩ့နဝ့ၫဆံၭ.- ထီးယ့ၫၡုၬဒၪဘၪ ၦခမျၧးဂဲၫစဲၪ့တ လဲးဎုၬလၧအအီၪတၭ မၪလူၬဆၧနၪအၧၩ့ စံၭအဝ့ၫ ဆၧနၪချဲၩ့ဆၧလၥ့ၪဘၪ ဒဲအနါအၧၩ့လဒုၩဧ့ ယအၪ့ မၧၫ့နၧၩစဲၪ့ထၪ့ခွံၬလၧအလီၩ့တၭ စူၩယၫခိၬထီးဂဲၫအီၪလၧအဖၧၩ့နးဆိၭလဂ့ၩ.- အဝ့ၫနီၪကိၭၡၭထၪ့ဆၧ တၭဒုၭကဲၩ့ထၪ့ဝ့ၫနၭနၭလ့ၬတၭစဲၪ့ထၪ့ခွံၬဝ့ၫ လီၫ.အဝ့ၫဒၪမၩအၥၭဘဲၫၦၥံၫအၥိၭ ထီးၦအၪဂၩစံၭဝ့ၫ မွဲအၥံၫလီၫ.- ယ့ၫၡုၬဖီၪ့အစူၪတၭ ဘိၭထၪ့ဝ့ၫဒၪနီၪအဆၧဂဲထုၪ့ထဲၩ့ဝ့ၫလီၫ.-ထီးအလ့ၩနုၬဝ့ၫ လၧဂံၪ့ဖၧၩ့တၭ အထံၩအဖျဲၥံၪအၪ့စၪ့ဝ့ၫ လၧဆၧ ကဒုၩအလး မွဲဘၪနီၫလၧပနၫ့ထၪ့ခွံၬပဝ့ၫလၥ့ၪဘၪလဲၪ.- အဝ့ၫဒၪလီၩဘၪအဝ့ၫၥံၪး အ့ၪလမွဲဘၪလၧဆၧ ဘၩဆိၪဖၪ ဒဲဒုၪဆၧအၪ့ဆၧအီၩအကၠီၩ့နီၪ ဆၧနၫ့ ထၪ့ခွံၬဆၧလမံၩ့ယီၩၥ့ၪအ့ၬ.