ယ့ၫၡုၬမွဲကိၪမၧၫ့

မၩအၥၭဘဲၫနီၪတၭ, ထီးၦခမျၧးၥ့ၪယၫဝ့ၫလၧ ယ့ၫၡုၬမွဲဂ့ၩ, အထံၩအဖျဲၥံၪမွဲဂ့ၩ, လအီၪဘၪထီးနီၪတၭ, အဝ့ၫၥံၪထူၬထၪ့ချံၫတၭ, လ့ၩအၪ့ဎူၫအၪ့ဎၬယ့ၫၡုၬ ထီၩ့လၧကပၧနအၫ့လီၫ. ထီးအဝ့ၫၥံၪဒၪဘၪအဝ့ၫ လၧကွံၩဝါလခီၫတၭ, စံၭအဝ့ၫ,ရၭဘံၫဧ့, နဂဲၫထီးယီၩထီၩ့ဆံၭယံၬယူၭလဲၪ.-

ယ့ၫၡုၬချဲၩ့ဆၧၫ့အဝ့ၫၥံၪ, စံၭဝ့ၫ, ယလီၩဘၪနၥံၪတီၩတီၩလီၩ့လီၩ့, နၥံၪဝ့ၫယီၩ, မွဲနၥံၪဒၪဘၪဆၧလၩ့လၭအကၠီၩ့နီၪ နၥံၪအၪ့ဎၬယၧၩအ့ၬ, မွဲနၥံၪအၪ့ဘၪကိၪဘျဲၩအၪ့အကၠီၩ့လီၫ.- ဘဲၫၥိၭ နၥံၪမိန့ဘၪဆၧအၪ့လၧအဂၭဂီၩ့ၥ့ၪနီၪ, ထီးမၩလဂ့ၩး အ့ၪမွဲဘဲၫၥိၭနၥံၪမိန့ဘၪဆၧအၪ့ လၧအဂုးခၧၫ့ဝ့ၫ လၧဆၧမၧၫ့လၩ့ဆိၩလၩ့ကၠၪ လၧၦၡၩအဖိၪခွၫ မိဖ့ၪလၫ့နၥံၪတၭ, အၪ့ဂူၬမၩနၥံၪဝ့ၫဆံၭ. အဂဲးဘဲၫယီၩ အဝ့ၫလဂၩနီၪ ဖါယွၩလဂၩစဲၩနဲၪ့ထၬဝ့ၫဒၪလီၫ.

 မၩအၥၭဘဲၫနီၪတၭ, အဝ့ၫၥံၪစံၭဝ့ၫ, ဘဲၫၥိၭပမိမၩယွၩအဆၧမၩနီၪ, မွဲပမိဘၪမၩဘဲၫၥ့ၪလဲၪ.- ယ့ၫၡုၬချဲၩ့ဆၧၫ့ဆၧတၭ, စံၭအဝ့ၫၥံၪ, ယွၩအဆၧမၩနီၪ, မွဲအယီၩ, ဘဲၫၥိၭနၥံၪမိနဲၩထဲၩ့ၦလၧအအၪ့မၧၫ့လၩ့န့ဝ့ၫလဂၩနီၪလီၫ.- မၩအၥၭဘဲၫနီၪတၭ, အဝ့ၫၥံၪ, စံၭအဝ့ၫ, နမၩလၩ့လၭဆၧဘဲၫၥိၭပမိဒၪဘၪပဝ့ၫ, ဒဲနဲၩထဲၩ့နၧၩနီၪ, မွဲဆၧနီၪလမံၩ့လဲၪ. မွဲနမၩဆၧနီၪလဲၪ. ပဖါၥံၪအၪ့မၪ့နၫလၧမံၩ့လၬကျၩ ဘဲၫဆၧကွ့ၭအၥၭအၥိၭနီၪ, အဝ့ၫဒၪဖ့ၪအၪ့အဝ့ၫၥံၪ ကိၪလၧမူၭခိၪလီၫ.-

မၩအၥၭဘဲၫနီၪတၭ, ယ့ၫၡုၬစံၭအဝ့ၫၥံၪ, ယလီၩဘၪနၥံၪ တီၩတီၩလီၩ့လီၩ့ စမိစ့ၭဖ့ၪလၫ့နၥံၪ အကိၪလၧမူၭခိၪနီၪအ့ၬ. အ့ၪမွဲယဖါနီၪ, ဖ့ၪလၫ့နၥံၪ အကိၪလၩ့ထံးလၩ့ဆ့ၭ လၧမူၭခိၪလီၫ.- အဂဲးဘဲၫယီၩ ၦလၧအဂဲၫလၩ့လၧမူၭခိၪတၭ, ဖ့ၪလၫ့ဆၧမၧၫ့ လၧၦဂၪ့ခိၪဖိၪလဂၩနီၪ, မွဲယွၩအကိၪလီၫ.

မၩအၥၭဘဲၫနီၪတၭ, အဝ့ၫၥံၪစံၭအဝ့ၫ, ကဆါဧ့, ဖ့ၪလၫ့ပၧၩလၧကိၪနီၪထံၪဎးဆံၭ.- ယ့ၫၡုၬစံၭအဝ့ၫ ၥံၪယမွဲကိၪမၧၫ့လီၫ. ၦလၧအဂဲၫ လၧယအီၪလဂၩနီၪ, ဆၧလမိၥၭဝံလၧၩ့ဘၪအၥၭ,ဒဲၦလၧအနဲၩထဲၩ့ယၧၩလဂၩနီၪ, ဆၧမိၥၭဝံလၧၩ့အၥၭလၧထံၫနးဆိၭအ့ၬ.

Add new comment

1 + 3 =