ယ့ၫၡုၬဘၪဆၧၥိၫ့ဝ့ၫလၧစပဲလၭအမ့ၬယၫ.

ဆၧဖၩ့ထၪ့တၭႇ ၦလုဆၧအဒိၪၥံၪႇ ဒဲၦၥုၪ့က့ၭၥၭၡါၥံၪႇ ဒဲၦကွ့ၭလံၬၥံၪႇ ဒဲၦကိၪ့ဆၧၥ့ၪ ထီးအလူၬလဖၪနီၪႇ ကိၪ့လိၬအၥၭချဲၫ့မၬတၭႇ စၧၩ့ထၬယ့ၫၡုၬနီၪႇ လ့ၩ ၥိၫ့ဖ့ၪလၫ့ဝ့ၫလၧစပဲလၭလီၫ.

စပဲလၭအၪ့စၪ့ဝ့ၫႇ နဝ့ၫဒၪယီၩနမွဲၦယုဒၫဖိၪၥံၪ အစဎွၩဧၪ. အဝ့ၫဒၪချဲၩ့ဆၧၫ့ဆၧတၭႇ စံၭဝ့ၫႇ နစံၭယူၭဆၧယူၭ.- ၦလုဆၧအဒိၪလဖၪ အီၪက့ၪဆၧမၪလၧအလီၩ့အၪမံၩ့လီၫ.- စပဲလၭအၪ့စၪ့ဒီၭဝ့ၫတၭႇ စံၭဝ့ၫဒၪႇ မွဲနချဲၩ့ဆၧၫ့ဆၧနးမံၩ့အ့ၬဧၪ. အဝ့ၫၥံၪထိးအၥၭလၧ နဂဲးဆံၭအၪဆံၭအၪလဲၪနီၪႇ ယိဆီၫ့မီၪ့ခွါဆံၭ.- ယ့ၫၡုၬချဲၩ့ဆၧၫ့လၧၩ့ဆၧနးထံၪအ့ၬ. မၩအၥၭဘဲၫနီၪတၭႇ စပဲလၭထီၫမံၫထီၫမၪဝ့ၫလီၫ.

လၧဆၧဘိၪ့နီၪႇ ထီးဒၪအဝ့ၫၥံၪအၪ့ကံၩ့ထဲၩ့ ၦထီၫ့ဖိၪလဂၩဂၩတၭႇ ၦဒိၪကွဲၪဖျါဝ့ၫလၧအဂးလီၫ.- ၦလဂၩကိၭဝ့ၫအမံၩ့ စဘရၭဘၭအီၪဝ့ၫ လၧထီၫ့ဖၧၩ့လၧ အထံၩအၥိၭလဖၪ လၧအမၩတုၩ့ထၪ့တုၩ့လၩ့ဆၧလၧအၥိၭတၭႇ မၩၥံၫၦၡၩလၧ ဆၧတုၩ့ထၪ့တုၩ့လၩ့အဖၧၩ့လီၫ.-

ၦခမျၧးအၪ့ကံၩ့ကိၭၡၭထၪ့ဝ့ၫ ဘဲၫၥိၭအမိမၩဝ့ၫဘဲၫအထူၫအရူၫအီၪဝ့ၫအၥိၭနီၪလီၫ.- စပဲလၭ ချဲၩ့ဆၧၫ့ဝ့ၫတၭႇ စံၭဝ့ၫဒၪႇ မွဲအဘၪနၥံၪအၥၭလၧ ယမိကွဲၪဖျါန့နၥံၪအဂး လၧၦယုဒၫအစဎွၩနီၪဆ့ဧၪ.- အဂဲးဘဲၫယီၩ ၥ့ၪယၫဝ့ၫလၧၦလုဆၧအဒိၪလဖၪနီၪ ဖ့ၪလၫ့ဝ့ၫလၧဆၧၥၭခ့ၬအကၠီၩ့လီၫ.- ၦလုဆၧအဒိၪၥံၪ ပဂၨၪထၪ့ၦခမျၧးအခဲၫ့ ဘဲၫၥိၭၦဒိၪမိကွဲၪဖျါ စဘရၭဘၭလဂၩ လၧအဝ့ၫၥံၪအဂးလီၫ.-

စပဲလၭချဲၩ့ဆၧၫ့ဆၧႇ စံၭဒီၭအဝ့ၫၥံၪႇ အ့ၪမွဲဘဲၫနီၪတၭႇ မွဲအဘၪနၥံၪအၥၭ လၧယမိမၩၦလၧနၥံၪကိၭ ၦယုဒၫဖိၪၥံၪအစဎွၩလဂၩ လၧဆၧနီၪလမံၩ့လဲၪ.- ၦကိၭၡၭထၪ့ဒီၭႇ ဖျၩထၪ့ခွံၬအဝ့ၫလၧထုၪ့စူၪယၫအလီၩ့ဘီၪ.- စပဲလၭစံၭ အဝ့ၫၥံၪႇ ဘၪနီၫလဲၪ. မွဲအမၩဆၧနီၫလၫအအၧၩ့လမံၩ့လဲၪ. အဝ့ၫၥံၪကိၭထၪ့ဒီၭဝ့ၫ နၭနဲၪ့အလးဒံၭႇ ဖျၩထၪ့ခွံၬအဝ့ၫလၧထုၪ့စူၪယၫအလီၩ့ဘီၪ.- စပဲလၭနီၪ အၥၭအီၪ လၧအမိမၩဝ့ၫဘဲၫအဘၪ ၦခမျၧးအၥၭအၥိၭတၭႇ ကွဲၪဖျါစဘရၭဘၭလၧအဂးတၭး ယ့ၫၡုၬနီၪ မွဲအဒိၪဝ့ၫထးဝ့ၫဂီၩ့တၭႇ ဖ့ၪလၫ့ခွံၬဝ့ၫ ဘဲၫၥိၭအမိဘၪဆၧဖျၩထၪ့ခွံၬဝ့ၫ လၧထုၪ့စူၪယၫအလီၩ့လီၫ.

ၦၥုၭဖိၪလဖၪ မီၩ့ဝ့ၫလၧဆၧစ့ၩရၫ့ခွးအလးႇ ဆၧကိၭဝ့ၫဖြံၫတိရအၫ့တၭႇ အဝ့ၫၥံၪကိၭကီၪ့ၦၥုၭဖိၪထၧၫ့ ဒီၪ့ယၫတၭႇ- ဒုၭကီၩ့ဒုၭၥိၭထၪ့ဝ့ၫလၧ ဆၧကီၩ့ဆၧၥိၭ အဝီၩလုၭဖုၭတၭႇ ထဲၫ့ၥရဖူၩလၧဆၧဆူၪနီၪႇ ဒုၭချႃၬထၪ့ဝ့ၫလီၫ.-

အဝ့ၫၥံၪချဲၩ့ဒုၪ့ဝ့ၫတၭႇ စံၭဝ့ၫႇ ၦယုဒၫဖိၪၥံၪအစဎွၩဧ့ႇ- ဒိၪဝ့ၫထးဝ့ၫအခိၪဎွံၪလၧဖီးဘီၩ့တၭႇ ထိၪဖျံၭဝ့ၫနီၪႇ ထွံၩလၩ့အခၪ့လၧအမ့ၬယၫတၭႇ ဘၩထၪ့ဝ့ၫဒၪလီၫ. ဒုၪဒွ့ၪဝ့ၫဂီၩ့နီၪႇ ဘဲၪ့လၩ့ခွံၬ အကီၩ့အၥိၭအဝီၩလုၭဖုၭတၭႇ ဒုၭကီၩ့ဒုၭၥိၭထၪ့ထဲၩ့ဝ့ၫ လၧအကီၩ့အၥိၭဒၪဝ့ၫတၭႇ လ့ၩၥိၫ့ထၪ့ခွံၬဝ့ၫ ဘဲၫၥိၭအမိဖျၩထၪ့ဝ့ၫ လၧထုၪ့စူၪယၫအလီၩ့လီၫ.

စအလ့ၭစၪ့ဒၧၫ ဒဲစရူဖၧၭအဖါႇ ၦစဲၫရံနံၫဖိၪစစဲမၧၫ့လဂၩ အီၪဝ့ၫလၧခီၫ့နီၪ ဂဲၫလၧဖၧၩ့ၥၭအဘိၩ့ဘၭတၭႇအဝ့ၫၥံၪအၪ့မၧၫ့ဆီၪ့အဝ့ၫ ယိၭအထုၪ့စူၪယၫလီၫ.- အဝ့ၫၥံၪလ့ၩၥိၫ့ဝ့ၫထီၩ့လၧ ဂီၫလဂိၥၫအလးႇ ဘဲၫၦစံၭဆၧအၥိၭႇ ဆၧခိၪဎွံၪလဲၫအလးတၭႇ- ဒုၭအီၩဝ့ၫလၧ စဘံၭထံၫလဲၩဎုၬဝ့ၫ လၧမူၫရၫ့တၭႇ အဝ့ၫဒၪအီၩဝ့ၫအ့ၬ.-

ထီးအဝ့ၫၥံၪဖျၩထၪ့ဝ့ၫ လၧထုၪ့စူၪယၫအလီၩ့ဂီၩ့တၭႇ အၪ့နၩ့ဖၭဝ့ၫအကီၩ့အၥိၭနီၪႇ ၦလဂၩဂၩ မိန့ဘၪဝ့ၫဆံၭအၪလဲၪဆုၬဆုၬနီၪႇ ဘဲၫၥိၭအမိၥ့ၪယၫဝ့ၫတၭႇ ဖၭဝ့ၫဒၪလီၫ.- ဘၪၥၧၫ့နၩရံၩတၭႇ အဝ့ၫၥံၪဖျၩထၪ့အဝ့ၫလီၫ.- လံၬလၧၦအီၪက့ၪဆၧမၪလၧအလီၩ့ အီၪကွ့ၭအၥၭလၧအဖၫ့ခိၪႇ ၦယုဒၫဖိၪၥံၪအစဎွၩလီၫ.

အဝ့ၫၥံၪဖျၩထၪ့ဎုၬၦထမျၬနံၫဂၩလၧအၥိၭႇ လၧအစူၪထွ့ၪလခီၫလဂၩႇ လၧအစူၪစ့ၪလခီၫလဂၩလီၫ. ဆၧကွ့ၭအၥၭလၧၫ့ထၪ့ဎွ့ၩထၪ့ဝ့ၫ လၧအစံၭဝ့ၫဒၪႇ အ ဝ့ၫ ဒၪ ယီၩ ဘၪ ဆၧ ဝံ ဎုၬ နၬ ဎုၬ အ ၥၭ လၧ ၦ မၩ မၪ ဆၧ လ ဖၪ အ ကျၩ လီၫ.

ၦလဲးလီၩ့လဲးထၪ့လဖၪဖျၭလၩ့အခိၪတၭႇ ဒုၪဒွ့ၪဝ့ၫနီၪႇ စံၭဝ့ၫဒၪႇ ဟဲၬႇ ၦလၧအမၩလၩ့ဎီးခွံၬဆၧလုအဂံၪ့တၭႇ မၩထဲၩ့ဝ့ၫလၧၥၧၫ့နံၩအထးဖၧၩ့လဂၩဧ့ႇ- ထိးထဲၩ့တၩ့ထဲၩ့ဒၪနၥၭတၭႇ ဂဲၫထဲၩ့လၩ့လၧ ထုၪ့စူၪယၫအလီၩ့ဆံၭ.- ဘဲၫနီၪအၥိၭ ၦလုဆၧအဒိၪၥံၪႇ ဒဲၦကွ့ၭလံၬၥံၪ ဒုၪဒွ့ၪအဝ့ၫဆ့တၭႇ စံၭလိၬအၥၭႇ အဝ့ၫယီၩထိးထဲၩ့တၩ့ထဲၩ့ဒၪအၥၭၥ့ၪအ့ၬ.- ဘဲၫၥိၭပမိဒၪဘၪႇ ဒဲနဲၩထဲၩ့ဆၧနီၪႇ မွဲဎရံၬႇ ၦအံၫစရ့လၭဖိၪၥံၪအစဎွၩ ဂဲၫထဲၩ့လၩ့လၧထုၪ့စူၪယၫအလီၩ့ ဘိၩ့နဲၪ့ယီၩဆံၭ. ၦလၧအဘၪဆၧဖျၩထၪ့ဎုၬဝ့ၫလၧအၥိၭနီၪႇ ဒုၪဒွ့ၪဝ့ၫဆ့လီၫ.

လၧဎူၫနၩရံၩနီၪဆၧခံၭဝ့ၫ လၧခးဖၧၩ့ထၧၫ့ဘံၪ့ယၫ ထီၩ့လၩ့ခွံၫနၩရံၩလီၫ.- ထီးအဘၪခွံၫနၩရံၩနီၪ ယ့ၫၡုၬကိၭၡၭထၪ့ဆၧ လၧအလူဖၭဒိၪတၭႇ စံၭဝ့ၫဒၪႇ :အ့လိအံၫႇ အ့လိအံၫ လ့မၫစဘၭၥနဲ:ႇ ဘဲၫၦစံၭဆၧအၥိၭႇ ယယွၩဧ့ႇ ယယွၩဧ့ႇ မွဲဘၪနီၫနစဲၪ့ဒၪယၧၩလဲၪ.- ၦဆၧၫ့ထုၪ့အီၪလၧအနဲၩ့ထံၭလနၩ့နၩ့ နါဂၧၫ့ဝ့ၫတၭႇ စံၭဝ့ၫႇ ယိခွါႇ မွဲအကိၭစအံၫလဲယၫလီၫ.

 ၦလဂၩထဲၩ့စဲၪ့စုၪလၩ့စီၪ ဎၧၩ့မၫဆမံၭလလီၪ့လၧ ဆၧဆဲၪ့ထံၫတၭႇ ယူၬထၪ့ဝ့ၫလၧဖီးလဘီၩ့ အခံၫထိၭတၭႇ ဒုၭအီၩဝ့ၫတၭႇ စံၭဝ့ၫဒၪႇ အီၪဒၪဝ့ၫဆံၭ. မွဲစအံၫလဲယၫ မိဂဲၫထိးထဲၩ့တၩ့ထဲၩ့ဝ့ၫႇ လဂဲၫဘၪလဲၪနီၪႇ မွဲပယိၡီၩ့ဘီၪ.

ယ့ၫၡုၬကိၭၡၭထၪ့ဆၧလၧအလူဖၭဒိၪတၭႇ အၥၭစဲၪ့ထၪ့ဝ့ၫဒၪလီၫ.- ဆၧလုဂံၪ့အကလကၫထ့ဖၭ လၧအခံၫထိၭဖိးလၩ့လၧ အခၪ့ထံၭနံၫခီၫလီၫ.- ၦၥုၭဖိၪလယၩအခိၪလဂၩ လၧအဆၧၫ့ထုၪ့လၧအမ့ၬယၫနီၪႇ ဒၪဘၪလၧအကိၭၡၭထၪ့ဘဲၫနီၪ အၥၭစဲၪ့ထၪ့ဝ့ၫတၭႇ စံၭဝ့ၫဒၪႇ  အယီၩလဂၩ မွဲတၡါယွၩအဖိၪခွၫလီၫ.