ယ့ၫၡုၬဒုၭအၪ့ၦလံထီၫ့ဂၩ.

လၧမုနံၩလဖၪနီၪ ၦခမျၧးအီၪအၪမၬတၭႇ ဆၧအၪ့ဆၧအီၩ လအီၪဘၪနးမံၩ့တၭႇ ယ့ၫၡုၬကိၭန့ အထံၩအဖျဲၥံၪလၧအအီၪႇ စံၭဝ့ၫဒၪႇ- ယယၫ့ၥၭၦခမျၧးလီၫ. အဂဲးဘဲၫယီၩ အဝ့ၫၥံၪအီၪယူၭဝ့ၫ လၧယၥိၭၥၧၫ့ၥၫ့တၭႇ အဆၧအၪ့ဆၧအီၩအီၪနးမံၩ့အ့ၬ.- ဒုၪအၪ့ဒုၪအီၩဆၧနီၪႇ ယအ့ၪကွဲၪဖျါထဲၩ့အဝ့ၫၥံၪလၧအဂံၪ့တၭႇ မိလၩ့ဒိၩဝ့ၫလၧဖၧၩ့ၥၭလီၫ. အဂဲးဘဲၫယီၩ လနၩ့နၩ့ဂဲၫဝ့ၫလၧအယဲၩ့လီၫ.

အထံၩအဖျဲၥံၪချဲၩ့ဆၧၫ့ဝ့ၫႇ ဘဲၫၥိၭၦလဂၩဂၩမိဒုၭဘျဲၩအၪ့ ၦလဖၪနီၪလၧကိၪတၭႇ မွဲအမိဒၪန့ဝ့ၫ လၧမံၩ့လၬကျၩယီၩခီၫခီၫလဲၪ.

 အဝ့ၫဒၪအၪ့စၪ့ဝ့ၫႇ နၥံၪအကိၪအီၪဎွ့လီၪ့လဲၪ. အဝ့ၫၥံၪစံၭဝ့ၫဒၪႇ နွ့ၫလီၪ့လီၫ.- တၭအဝ့ၫဒၪအၪ့မၧၫ့ ၦခမျၧးဆၧၫ့နၩ့ဒံၩ့ခံၫ့ လၧဂၪ့ခိၪတၭႇ မၩန့စိၩကိၪနွ့ၫလီၪ့နီၪႇ စံၭထၪ့အၪ့အူၭဆၧအခိးအတၩတၭႇ ကံၪ့ဘျ့ၭဝ့ၫႇ ဖ့ၪလၫ့အထံၩအဖျဲၥံၪ ဘဲၫၥိၭအဝ့ၫၥံၪမိအီၪက့ၪလၩ့ လၧအမ့ၬယၫတၭႇ အဝ့ၫၥံၪအီၪက့ၪလၩ့ဝ့ၫ လၧၦခမျၧးအမ့ၬယၫလီၫ.-

အဝ့ၫၥံၪအယၪဖိၪ အီၪၡၩခိၬဘံၪ့တၭႇ အဝ့ၫဒၪဆိၪဂ့ၩဝ့ၫတၭႇ အၪ့မၧၫ့ၦအီၪက့ၪလၩ့ဝ့ၫ လၧအဝ့ၫၥံၪအမ့ၬယၫဆ့လီၫ.- အဝ့ၫၥံၪအၪ့ဝ့ၫတၭႇ ဘျဲၩအၪ့ဝ့ၫဂီၩ့နီၪႇ ပအၪ့ထုၫ့ကီၪ့ထဲၩ့ဝ့ၫ အဘျဲၪအဆဲနီၪ ဎွ့ၩဒၩ့နွ့ၫဖျိၪ့လီၫ.- ၦအၪ့ဆၧလဖၪနီၪ အီၪဖိၭဘိၭလံထီၫ့လီၫ. တၭမွဲအကွဲၪဖျါခွံၬၦလဖၪနီၪလီၫ.

အဝ့ၫဒၪလ့ၩနုၬဝ့ၫလၧချံၫဖၧၩ့ လၧအထံၩအဖျဲၥံၪအၥိၭချဲၫ့မၬတၭႇ လ့ၩဝ့ၫထီၩ့လၧခးဒၫလမနုၥၫလီၫ.