ယ့ၫၡုၬစၭထၪ့အဆၧမၩလၧခးဂၫလလံၫ

ယ့ၫၡုၬထဲၩ့ထဲၩ့ဝ့ၫလၧဂၫလလံၫ အီၪဝ့ၫလၧၥၭမုအစီၩ့အမၩ့ လၧအလီၩ့တၭႇ အပရၧၫ့ဂၧၫ့ထၪ့ၥၩလၩ့ထၧၫ့ခးယၫလီၫ.- အဝ့ၫဒၪၥီၪ့ထဲၩ့ၥၫ့ထဲၩ့ဆၧ လၧအဝ့ၫၥံၪအၥရိၬလဖၪအဖၧၩ့တၭႇ ၦထီးအလူၬစံၭထၪ့ အၪ့အူၭဝ့ၫဒၪလီၫ.

အဝ့ၫဒၪထဲၩ့ထဲၩ့ဝ့ၫလၧနၭဇရ့ၭ လၧအဒိၪထၪ့ဝ့ၫလၧအဖၧၩ့တၭႇ ဘဲၫအထူၫအရူၫဒၪဝ့ၫအၥိၭနီၪႇ ဘၪမးၥံၫအနံၩတၭႇ လ့ၩနုၬဝ့ၫလၧၥရိၬဖၧၩ့နီၪႇ ဂဲထုၪ့ဝ့ၫဘဲၫၥိၭအမိဖီဘၪလံၬလီၫ.

ဆၧဖ့ၪလၫ့အဝ့ၫ လၧမီၪစအဲၫစ့ယၫအလံၬလီၫ. ပၠၪလၩ့လံၬနီၪတၭႇ ဒၪ န့ဝ့ၫအလးထီးဆၧကွ့ၭဝ့ၫႇ

ယွၩအၥၭအီၪလၧယလီၩ့လီၫ. အဂဲးဘဲၫယီၩ ဂုၪယူၭယၧၩ ဘဲၫၥိၭယမိလီၩလၩ့လၬလၩ့ ဆၧၥၭထိၬအပရၧၫ့ လၧၦၡၪ့ဖိၪယၬဖိၪလီၫ. အၪ့မၧၫ့လၩ့ယၧၩ ဘဲၫၥိၭယမိမၩဘျၪထဲၩ့ ၦအၥုၪ့ခါအၥၭလၩ့ႇ ဘဲၫၥိၭယမိကိၭထၪ့ဆၧဖီၩ့ဖျ့ၭ လၧၦဘၪဆၧအၪ့မၧၫ့ဎီးဝ့ၫအဂးႇ ဒဲဒုၭဒၪထၪ့ထဲၩ့ ၦလၧအမ့ၬဘျီၪႇ ဘဲၫၥိၭယမိဖျါခွံၬ ၦဘၪဆၧမၩအၧၩ့မၩနၭဝ့ၫႇ ဘဲၫၥိၭယမိမၩဂၧၫ့ထၪ့ၥၩလၩ့ နံၪ့လၧအဘၪယွၩအၥၭနီၪလီၫ.

အဝ့ၫဒၪထူၫထၪ့ထဲၩ့လံၬတၭႇ ဖ့ၪလၫ့ထဲၩ့ဝ့ၫလၧ ဆၧအခ့ၫအၡၩလဂၩနီၪႇ ဆၧၫ့နၩ့ထဲၩ့ဝ့ၫလီၫ. ၦအီၪ လၧၥရိၬဖၧၩ့ကိၭဂၩဒ့ၭလဖၪနီၪႇ ယိအမ့ၬထံၫထံၫဆၭဆၭလီၫ.- အဝ့ၫဒၪချဲၩ့ထၪ့ၥၫ့ဆၧ လၧအဝ့ၫၥံၪႇ စံၭဝ့ၫႇ ဆၧကွ့ၭအၥၭယီၩႇ လၧၫ့ထၪ့ဎွ့ၩထၪ့လၧနၥံၪအနါဖၧၩ့ လၧမုဆၫလနံၩယီၩလီၫ. ၦထီးအလူၬ ထိးအၥၭလၧအဝ့ၫဒၪအဂးတၭႇ လၧဆၧချဲၩ့အဂ့ၩလၧအဂဲၫထၪ့ လၧအနိၭဖၧၩ့အကၠီၩ့နီၪႇ ထီၫမံၫထီၫမၪဝ့ၫဒၪလီၫ.