ယ့ၫရှူၬအီၪက့ၪဆၧမၪလၧအဝ့ၫၥံၪ, အဆၧအၪ့လီၫမၩဂ့ၩလၩ့ၥၭ.

ၦကွ့ၭလံၬဒဲၦဖၫရစံၫ,ၦအၪ့လီၫဆၧၥံၪဧ့, နၥံၪဘၪဆၧအၡၪ့လီၫ. အဂဲးဘဲၫယီၩ နၥံၪကၭဘံၭထၬမူၭခိၪအဘၩ့အမုး လၧၦၡၩအမ့ၬယၫလီၫ. အဂဲးဘဲၫယီၩ နၥံၪအနၫ့ဆါဒၪနၥံၪဝ့ၫနၥံၪနုၬအ့ၬ. ၦလၧအမိလ့ၩနုၬ ဝ့ၫလဖၪနီၪ နၥံၪဖ့ၪလၫ့အနုၬအ့ၬ. (ၦကွ့ၭလံၬဒဲၦဖၫရစံၫ,ၦအၪ့လီၫဆၧၥံၪဧ့,နၥံၪဘၪ ဆၧအၡၪ့လီၫ. အဂဲးဘဲၫယီၩ နၥံၪအၪ့ယုလၩ့ခွံၬၦမုၪမဲၫအဂံၪ့တၭ, ဘဲၫဆၧမိဖျီၪထၪ့ဝ့ၫလၧနၥံၪအဂးနီၪ နၥံၪဘၩဆိၪဖၪဆၧထီၫထီၫလ့ၬလီၫ.

မၩအၥၭဘဲၫနီၪတၭ, လၧဆၧနီၪလမံၩ့အကၠီၩ့ နၥံၪမိဘၪဆၧစ့ၩရၫ့နၭထၪ့လခီၫဒံၭလီၫ.) ၦကွ့ၭလံၬဒဲၦဖၫရစံၫ,ၦအၪ့လီၫဆၧၥံၪဧ့, နၥံၪဘၪဆၧအၡၪ့လီၫ. အဂဲးဘဲၫယီၩဘဲၫနၥံၪမိဒုၭအၪထၪ့န ၥံၪအထံၩအဖျဲနးဂၩအၥိၭတၭ, နၥံၪလ့ၩဎဲၪ့ဎဲၪ့ဝၩ့ဝၩ့ လၧထံၫထံၫလၧခီၫ့ခီၫ့လီၫ. ထီးအနုၬဝ့ၫတၭ, နၥံၪမၩ ဝ့ၫလၧၦလရၬဖိၪနၭနဲၪ့နၥံၪနံၫစၩလီၫ.

ၦမ့ၬဘျီၪလၧအဒုၭနဲၪဖၧၩ့ၥၭၥံၪဧ့, နၥံၪဘၪဆၧအၡၪ့လီၫ. နၥံၪစံၭ,ထီးဒၪၦလၧအဆိၪလၩ့အၥၭလၧ ဆၧလုဂံၪ့အမ့ၬယၫ လဂၩဂၩနီၪ, မွဲဆၧပျီၩပျီၩလီၫ. အ့ၪမွဲထီးဒၪၦလၧအဆိၪလၩ့အၥၭ လၧထီၫ့အီၪလၧ ဆၧလုဂံၪ့ဖၧၩ့အမ့ၬယၫလဂၩနီၪ, မွဲအဘၪမၩဝ့ၫလီၫ. ၦအဂီၩ့ဒဲၦအမ့ၬဘျီၪၥံၪဧ့, အဂဲးဘဲၫယီၩ မွဲအဒိၪလမံၩ့မံၩ့လဲၪ. မွဲထီၫ့, မွဲဆၧလုဂံၪ့လၧအမၩဆံၫ့ဎံၪထၪ့ထီၫ့နီၪလဲၪ.- ဒဲထီးဒၪၦလၧအဆိၪလၩ့အၥၭလၧ ဆၧလုအလးအမ့ၬယၫလဂၩဂၩနီၪ မွဲဆၧပျီၩပျီၩလီၫ. အ့ၪမွဲထီးဒၪၦလၧအဆိၪလၩ့အၥၭ လၧဆၧမၩဘိၪ့လၧ ဆၧလုလးအဖၫ့ခိၪအမ့ၬယၫလဂၩဂၩနီၪ, မွဲအဘၪမၩဝ့ၫလီၫ.-

ၦအဂီၩ့ဒဲၦအမ့ၬဘျီၪၥံၪဧ့, အဂဲးဘဲၫယီၩ,မွဲ အဒိၪလမံၩ့မံၩ့လဲၪ. မွဲဆၧမၩဘိၪ့လၧဆၧလုလး အဖၫ့ခိၪနီၪ, မွဲဆၧလုလးလၧအမၩဆံၫ့ဎံၪထၪ့ဆၧမၩဘိၪ့နီၪလဲၪ. မၩအၥၭဘဲၫနီၪတၭ, ၦလၧအဆိၪလၩ့အၥၭလၧ ဆၧလုလးအမ့ၬယၫနီၪ, မွဲအဆိၪလၩ့အၥၭ လၧအဝ့ၫနီၪ ဒဲလၧကယဲဆၧအီၪ လၧအလီၩ့အမ့ၬယၫလီၫ. ၦလၧအဆိၪလၩ့အၥၭ လၧဆၧလုဂံၪ့အမ့ၬယၫနီၪ, မွဲ အဆိၪလၩ့အၥၭလၧအဝ့ၫနီၪ ဒဲလၧဆၧအီၪဝ့ၫလၧအဖၧၩ့အမ့ၬယၫလီၫ.- ၦလၧအဆိၪလၩ့အၥၭလၧမူၭ ခိၪအမ့ၬယၫနီၪ မွဲအဆိၪလၩ့အၥၭလၧယွၩအလးဆီၩ့ဆီ, ဒဲလၧဆၧလၧအဆၧၫ့နၩ့ဝ့ၫလၧ အလီၩ့လဂၩ အမ့ၬယၫလီၫ.