ယ့ၫရှူၬလီၩဖျီၪထၪ့ၥၧၫ့ဖၧၫ့လဖၧၫ့ ဘၪဆဲၫ့အဆၧၥံၫအဂဲး.

ယ့ၫရှူၬလ့ၩထၪ့ လၧယရုစလံၫ့တၭႇ လၧဖၧၩ့ၥၭနီၪကိၭန့ အထံၩအဖျဲလဆံၫနံၫဂၩ လၧဆၧကဒုၩအလးလီၫ.- စံၭဝ့ၫဒၪႇ ယိခွါႇ ပလ့ၩထၪ့လၧယရုစလံၫ့တၭႇ ၦၡၩအဖိၪခွၫယီၩ မိဘၪဆၧဖ့ၪလၫ့ခွံၬဝ့ၫ လၧ ၦလုဆၧအဒိၪၥံၪ ဒဲလၧၦကွ့ၭလံၬၥံၪအစူၪဖၧၩ့လီၫ.
ၦလဖၪနီၪ မိစ့ၩရၫ့ၥံၫဝ့ၫတၭႇ မိဖ့ၪလၫ့ဝ့ၫလၧၦဆၨၩလဖၪအစူၪဖၧၩ့ ဘဲၫအမိဒုၪဒွ့ၪဝ့ၫႇ ဒိၪဝ့ၫထးဝ့ၫႇ ဒဲဖျၩ ထၪ့ဝ့ၫလၧထုၪ့စူၪယၫအလီၩ့အၥိၭလီၫ. ထီးအဘၪၥၧၫ့နံၩလနံၩနီၪႇ မိဂဲထုၪ့ထဲၩ့ဝ့ၫဒၪလီၫ.
ထီးနီၪလဖၧၫ့ စဇ့ၭဘဒံၫအဖိၪခွၫလဖၪအမိနီၪ ဂဲၫလၧအအီၪ လၧအဖိၪခွၫၥံၪအၥိၭတၭႇ ဘၩထၪ့ဆၧတၭႇ အၪ့ကံၩ့ဆၧလမံၩ့မံၩ့လီၫ.- အဝ့ၫနီၪစံၭဆၧၫ့ဆၧႇ မိန့ဘၪနၥၭလၧဆၧနီၪလမံၩ့လဲၪ. အဝ့ၫဒၪစံၭဝ့ၫ ဘဲၫၥိၭယဖိၪခွၫနံၫဂၩယီၩ မိဆၧၫ့နၩ့လၧနစူၪထွ့ၪနးဂၩႇ ဒဲလၧနစူၪစ့ၪနးဂၩ လၧနဘၩ့နမုးအဖၧၩ့နီၪတၭႇ မၪလူၬနဝ့ၫနးထံၪဘီၪ.- ယ့ၫရှူၬချဲၩ့ဆၧၫ့ဆၧတၭႇ စံၭဝ့ၫဒၪႇ နၥံၪအၪ့ကံၩ့နီၫလဲၪနီၫလဲၪနီၪႇ နၥံၪၥ့ၪယၫအ့ၬ. လိၫ့လၧယအီၩနီၪ နၥံၪအီၩမိကဲၪဧၪ. အဝ့ၫၥံၪစံၭဝ့ၫဒၪႇ ကဲၪဝ့ၫတကၨ.- အဝ့ၫဒၪစံၭႇ နၥံၪမိအီၩဘၪလိၫ့ လၧယအီၩတၡါတၭး မွဲလါနၫ့ဘိၩ ဆၧဆၧၫ့နၩ့လၧ ယစူၪထွ့ၪဒဲယစူၪစ့ၪနီၪ မွဲယဆၧဘဲၫယမိဖ့ၪလၫ့ အၥိၭမွဲန့ၫလၧ ၦလၧယဖါတဲၩ့ဝဲၩလၧအဂးလီၫ.-
ထီးၦလဆံၫနီၪနါဂၧၫ့ဝ့ၫတၭႇ အၥၭထၪ့အထၧၫ့ဖုဝဲနံၫဂၩနီၪလီၫ.- ယ့ၫရှူၬကိၭဝ့ၫတၭႇ စံၭဝ့ၫဒၪႇ နၥံၪၥ့ၪယၫ လၧၦအဆၨၩအခိၪလဖၪ မၩဒိၪအၥၭလၧအဖၫ့ခိၪနီၪႇ ၦဒိၪၦၡါမၩဝ့ၫလၧအစီၩ့အမၩ့လီၫ.- ဆၧမၩဘၪအၥၭလၧ နၥံၪအကျၩဘဲၫနီၪၥိၭအ့ၬ. အ့ၪမွဲထီး ဒၪၦလၧအမိကဲၪဘၪအၥၭ လၧအဒိၪလဂၩဂၩ လၧနၥံၪအကျၩနီၪႇ မွဲအကဲၪဒၪဝ့ၫလၧနၥံၪအခ့ၫအၡၩဆံၭ.- ထီးဒၪၦလၧအမိကဲၪဘၪ အၥၭလၧအခိၪလဂၩ ဂၩလၧနၥံၪအကျၩနီၪႇ မွဲအကဲၪဒၪဝ့ၫလၧနၥံၪအဎီးအၡၩဆံၭ.-
ဘဲၫနီၪအၥိၭ ၦၡၩအဖိၪခွၫယီၩ ဂဲၫအၪ့မၧၫ့ၦၡၩအ့ၬႇ မွဲအဂဲၫဒိၭဆၧအၪ့မၧၫ့ဝ့ၫလခီၫႇ ဒဲဖ့ၪလၫ့ အၥၭလၧၦၡၩအၪဂၩအဎွ့ၩလီၫ.