ယ့ၫရှူၬဒုၭအၪ့ၦလံထီၫ့ဂၩ.

ယ့ၫရှူၬစဲၪ့ထၪ့ဝ့ၫထီးနီၪတၭႇ ဂဲၫလၧကွံၩဂၫလလံၫအနဲၩ့ထံၭတၭႇ လ့ၩထၪ့ဝ့ၫ လၧခိၪလီၩ့လဖျိၪ့အလီၩ့တၭႇ ဆၧၫ့နၩ့ဝ့ၫထီးနီၪလီၫ.- ၦခမျၧးဖၭဒိၪဂဲၫ လၧအအီၪတၭႇ အီၪဝ့ၫလၧအခၪ့ဂၭဂီၩ့ႇ ၦအမ့ၬဘျီၪႇ ၦအုၭအၭႇ ၦအစူၪခါအခၪ့ချံၭႇ ဒဲၦစူၭၦဆၫ အဂူၫဂၩ အၪဂၩတၭႇ အီၪက့ၪလၩ့ဝ့ၫလၧ ယ့ၫရှူၬအခၪ့ထံၭတၭႇ အဝ့ၫဒၪမၩဘျၪထဲၩ့အဝ့ၫၥံၪလီၫ.-

မၩအၥၭဘဲၫနီၪတၭႇ ထီးၦခမျၧးဒၪဘၪ ၦအုၭအၭနီၪချဲၩ့ဆၧႇ ၦစူၪခါခၪ့ချံၭနီၪ အီၪဆီၫ့အီၪချဲၫ့ႇ ၦခၪ့ဂၭဂီၩ့နီၪစဲၪ့ထၪ့ထဲၩ့ႇ ဒဲၦအမ့ၬဘျီၪနီၪဒၪထၪ့ထဲၩ့ဆၧတၭႇ  ထီၫမံၫထီၫမၪဝ့ၫတၭႇ အဝ့ၫၥံၪစံၭထၪ့အၪ့အူၭ ၦအံၫစရ့လၭအယွၩလီၫ.

ယ့ၫရှူၬကိၭန့အထံၩအဖျဲ လၧအအီၪတၭႇ စံၭဝ့ၫဒၪႇ ယယၫ့ၥၭၦခမျၧးလီၫ. အဂဲးဘဲၫယီၩ အီၪယူၭဝ့ၫ လၧယၥိၭၥၧၫ့နံၩယူၭႇ အဆၧလၧအမိအၪ့ဝ့ၫနီၪ အီၪနးမံၩ့အ့ၬ. အဝ့ၫၥံၪဒုၪဆၧအၪ့ဆၧအီၩတၭႇ မိကွဲၪဖျါထဲၩ့ဘၪယၥၭအ့ၬ. ဘၪလဘၪမိလၩ့ဒိၩဘၪခိၬဝ့ၫလၧဖၧၩ့ၥၭလီၫ.-

အထံၩအဖျဲၥံၪစံၭအဝ့ၫ ၦခမျၧးဖိၭဘိၭယီၩႇ ဘဲၫအမိအၪ့ဘျဲၩအၪ့အၥိၭတၭႇ ကိၪအၪန့ၫနီၪမိအီၪလၧပၧၩ လၧမံၩ့လၬကျၩခီၫခီၫလဲၪ.- ယ့ၫရှူၬစံၭဝ့ၫဒၪ, နၥံၪအကိၪအီၪဎွ့လီၪ့လဲၪ. အဝ့ၫၥံၪစံၭဝ့ၫဒၪႇ နွ့ၫလီၪ့ဒဲယၪဖိၪအီၪၡၩခိၬဘံၪ့လီၫ.- အဝ့ၫဒၪ မၪလူၬၦခမျၧးဘဲၫၥိၭအမိဆၧၫ့နၩ့ဒံၩ့ခံၫ့ လၧဂၪ့ခိၪအလီၩ့လီၫ.-

မၩန့စိၩကိၪနွ့ၫလီၪ့ႇ ဒဲယၪဖိၪလဖၪနီၪတၭႇ စံၭထၪ့အၪ့အူၭဆၧအခိးအတၩတၭႇ ကံၪ့ဘျ့ၭဝ့ၫႇ ဖ့ၪလၫ့အထံၩအဖျဲၥံၪတၭႇ အထံၩအဖျဲၥံၪဖ့ၪလၫ့ထဲၩ့ၦခမျၧးလီၫ.- ၦအၪ့ဝ့ၫကိၭဂၩဒ့ၭတၭ ဘျဲၩအၪ့ဝ့ၫနီၪႇ အၪ့ထုၫ့ကီၪ့ထဲၩ့ဝ့ၫ အဘျဲၪအဆဲဎွ့ၩဒၩ့နွ့ၫဖျိၪ့လီၫ.