ယ့ၫရှူၬစၭထၪ့အဆၧမၩလၧဂၫလလံၫ.

ထီးယ့ၫရှူၬနါဂၧၫ့လၧ စယီဟၫ့လၩ့ဘၪဝ့ၫ လၧထီၫ့ဖၧၩ့တၭႇ ထဲၩ့ထဲၩ့ဝ့ၫလၧဂၫလလံၫအဖၧၩ့နီၪလီၫ.- စဲၪ့ထၪ့ခွံၬလၧနၭဇရ့ၭနီၪႇ လ့ၩအီၪဝ့ၫလၧ ကပၧနအၫ့အဖၧၩ့အီၪဘူၭလၧကွံၩႇ လၧခးဇ့ၭဘလၧၫ့ ဒဲခးနၭၥလဲၫအနဲၩ့ထံၭႇ- ဘဲၫမီၪစအဲၫစ့ယၫအလူနီၪ မိလၧၫ့ထၪ့ဎွ့ၩထၪ့ဝ့ၫအၥိၭႇ အလူနီၪစံၭဝ့ၫဒၪႇ ခးဇ့ၭဘလၧၫ့ႇ ဒဲခးနၭၥလဲၫႇ လၧကွံၩနဲၩ့ထံၭႇ လၧယီၫဒၫ့ဝါလခီၫႇ ဂၫလလံၫဘၪဆဲၫ့ လၧၦဆၨၩလဖၪး ၦခမျၧးၥံၪလၧအဆၧၫ့နၩ့ လၧဆၧခံၭကျၩနီၪႇ ဒၪဘၪဝ့ၫလၧဆၧဖၩ့ဖၭဒိၪႇ ဒဲၦဆၧၫ့နၩ့ လၧဆၧၥံၫအခးအလၩၡုၪအဖၧၩ့လဖၪနီၪႇ ဆၧဖၩ့ဂဲၫထၪ့ လၧအဝ့ၫၥံၪအဂးလီၫ.

လၧအဆၧၫ့အထီနီၪ ယ့ၫရှူၬလီၩလၩ့လၬလၩ့ဆိၫဆၧတၭႇ စံၭဝ့ၫဒၪႇ နီၫ့ယါလၩ့ထဲၩ့ နၥံၪအၥၭဆံၭ. အဂဲးဘဲၫယီၩ မူၭခိၪအဘၩ့အမုးနီၪ ဘူၭထၪ့ယူၭလီၫ.

ယ့ၫၡုၬစဲၪ့ဝံၩ့ဝၩ့ လၧဂၫလလံၫထၧၫ့ခးယၫတၭႇ ၥီၪ့ထဲၩ့ၥၫ့ထဲၩ့ဆၧ လၧၥရိၬဖၧၩ့ႇ ဒဲလီၩ့လၩ့လၬလၩ့ ဘၩ့မုးအဆၧၥၭထိၬအပရၧၫ့ ဒဲမၩဘျၪထဲၩ့ ကယဲဆၧစူၭဆၧဆၫ ဒဲကယဲဆၧဆီၫ့ခိၬဆီၫ့ကဲၩ့ လၧၦခမျၧးအကျၩ ထီးအလူၬလီၫ.

အမံၩ့ဂၧၫ့ထၪ့ၥၩလၩ ့လၧစံရအၫထၧၫ့ခးယၫတၭႇ ၦဂဲၫဆိၬကယဲၦလၧအမၩလကဲၪဘၪႇ ဒဲၦလၧအဘၪဆၧစူၭဆၧဆၫႇ ဒဲဆၧဆီၫ့ခိၬဆီၫ့ကဲၩ့လမံၩ့မံၩ့ႇ ဒဲၦလၧဆၧနၪအီၪလၧအလီၩ့ႇ ၦအဖျႃႇ ဒဲၦအၥံၫလခီၫဖၩၥံၪတၭႇ အဝ့ၫဒၪမၩဘျၪထဲၩ့အဝ့ၫၥံၪလီၫ.- ၦခမျၧးဖၭဒိၪလၧဂၫလလံၫႇ ဒဲလၧဒကၭပိၫလံၭ, ဒဲလၧယရုစလံၫ့ႇ ဒဲလၧယုဒၫႇ ဒဲလၧယီၫဒၫ့ဝါလခီၫၥံၪနီၪ ဖိၬထၪ့အခဲၫ့လီၫ.