ယ့ၫရှူၬဂၭဖၬလၧထံၫဖံၭခိၪ.

ထီးအကွဲၪဖျါခွံၬ ၦခမျၧးအဘိၩ့ဘၭနီၪ, ယ့ၫရှူၬ အၪ့မၧၫ့အထံၩအဖျဲၥံၪ လ့ၩနုၬလၧချံၫလဖျိၪ့အဖၧၩ့ချဲၫ့ချဲၫ့တၭ, ခၫ့စိၩဝ့ၫလၧဝါလခီၫလီၫ.- ကွဲၪဖျါခွံၬၦခမျၧးဂီၩ့တၭ, လ့ၩဘၩဆိၪဖၪဆၧ လၧခိၪလီၩ့လဖျိၪ့ အလီၩ့လၧဆၧကဒုၩအလးလီၫ. မုမ့ၬဂၪလၩ့တၭ, အီၪဝ့ၫထီးနီၪလဂၩဎးလီၫ.- 
ချံၫအီၪဝ့ၫလၧကွံၩအၥၭကျၩတၭ, လပီၩထၪ့မၩဝၭဝ့ၫနၭနၭလ့ၬဆ့လီၫ. အဂဲးဘဲၫယီၩလံၩတီၩအ့ၬ.- ဆၧခိၭဆၧလၧမုနၩလံဆၫ့လဆၫ့နီၪ, ယ့ၫရှူၬလ့ၩလၧအအီၪတၭ, စဲၪ့ဝ့ၫလၧကွံၩဖၧၩ့လၧထံၫဖံၭခိၪလီၫ.- စဲၪ့ဝ့ၫလၧကွံၩဖၧၩ့လၧထံၫဖံၭခိၪနီၪ, အထံၩအဖျဲၥံၪဒၪဘၪဝ့ၫတၭ, အဝ့ၫၥံၪၡုၭၥၭမဲၪထၪ့ဝ့ၫတၭ, စံၭလၧအမွဲၦစၪလီၫ. ၥၭမဲၪၥၭဖျဲၩ့ဆၧတၭ, ကိၭၡၭထၪ့ဝ့ၫဒၪလီၫ.- ယ့ၫရှူၬလီၩဘၪအဝ့ၫၥံၪချဲၫ့မၬတၭ, စံၭဝ့ၫဒၪ,မွဲနၥံၪအၥၭဎွံၫ ထၪ့ဘီၪ,မွဲယၧၩတၭ,ထီးၥၭမဲၪလဂ့ၩ.- စပံတၧၫချဲၩ့ဆၧၫ့ဆၧတၭ, စံၭဝ့ၫဒၪ,ကဆါဧ့, အ့ၪမွဲနၧၩတၭ, မၪလူၬလါယၧၩ ဘဲၫယမိလ့ၩစိၩ လၧနအီၪလၧထံၫဖံၭခိၪအၥိၭဆံၭ.- အဝ့ၫနီၪစံၭဝ့ၫဒၪ, ဂဲၫဘီၪ. စပံတၧၫစဲၪ့လၩ့ခွံၬဝ့ၫလၧချံၫဖၧၩ့တၭ, စဲၪ့ဝ့ၫလၧထံၫဖံၭခိၪ ဘဲၫအမိလ့ၩထီၩ့လၧယ့ၫရှူၬအအီၪအၥိၭနီၪလီၫ.- ထီးအဒၪဘၪလံၩဂဲၫထၪ့ဆီၪ့ဆီၪ့လ့ၬတၭ, ၥၭမဲၪၥၭဖျဲၩ့ဝ့ၫနီၪ, လၩ့ဘၧၩ့ၥၫ့ဝ့ၫတၭ,ကိၭၡၭထၪ့ဆၧစံၭဝ့ၫဒၪ, ကဆါဧ့, ထိးထဲၩ့တၩ့ထဲၩ့ယၧၩဆံၭ.- ယ့ၫရှူၬယူၬစိၩအစူၪတၭ, ဖီၪ့ထဲၩ့အဝ့ၫဒၪချဲၫ့မၬတၭ,စံၭဝ့ၫ,ၦနဲၩဆၧၡၩဧ့, မွဲဘၪနီၫလၧနၥၭဂံၩ့ဂၩ့လဲၪ. အဝ့ၫၥံၪထၪ့ဘၭဝ့ၫလၧချံၫဖၧၩ့တၭ, လံၩပထုၬဝ့ၫလီၫ. ၦအီၪလၧချံၫဖၧၩ့လဖၪနီၪ ဂဲၫစိၩတၭ,- ဘိၪ့ ထၪ့ဘၩထၪ့အဝ့ၫနီၪစံၭဝ့ၫဒၪ,နဝ့ၫဒၪယီၩ, နမွဲမၬယွၩအဖိၪခွၫတၡါလီၫ. '