မွဲနၥံၪမၩဘၪယၧၩလီၫ.

ထီးၦၡၩအဖိၪခွၫ မိဂဲၫလၩ့ဝ့ၫလၧအလၩအဖၩ့ ဒဲအၥီၫ့ [ဆံၫ့ဎံၪ] ထီးအလူၬနီၪး ထီးနီၪလဖၧၫ့မိဆၧၫ့ နၩ့ဝ့ၫလၧအလးဆီၩ့ဆီ ကယးကဖးအဖၫ့ခိၪတၭႇ

 ၦကိၭဆၨၩဒ့ၭ မိဘၪအီၪကီၪ့ လၧအမ့ၬယၫလီၫ. အဝ့ၫဒၪ မိအၪ့နၩ့ဖၭအဆၧၫ့ ဘဲၫၦယူၬၥိၪလဂၩ အၪ့နၩ့ဖၭၥိၪ ဒဲဘ့ၪအဆၧၫ့အၥိၭနီၪလီၫ.- အဝ့ၫဒၪမိအီၪက့ၪၥိၪလဖၪနီၪ လၧအစူၪထွ့ၪလခီၫႇ အ့ၪမွဲဘ့ၪလဖၪနီၪ မိအီၪက့ၪဝ့ၫ လၧအစူၪစ့ၪလခီၫလီၫ.

ထီးနီၪလဖၧၫ့ စဎွၩမိစံၭၦအီၪဘၪဝ့ၫလၧ အစူၪထွ့ၪလဖၪနီၪ, ၦလၧအဘၪဆိၪဂ့ၩ လၧယဖါနၥံၪဝ့ၫဧ့ႇ ဂဲၫဘီၪ မၩန့ၥၫဘၩ့မုး လၧဆၧတဲၩ့ဝဲၩန့နၥံၪအဂး ခီၫလၧဂၪ့ခိၪအခၪ့ထံၭကဲၪထၪ့လံၩလံၩဆံၭ.-

အဂဲးဘဲၫယီၩ ဆၧၥၭဝံယၥၭတၭႇ နၥံၪဖ့ၪအၪ့ဘၪယၧၩလီၫ. ဆၧၥၭဝံယၥၭလၧထံၫတၭႇ နၥံၪဒုၭအီၩဘၪယၧၩလီၫ. ယမွဲၦမွံၩတၭႇ နၥံၪထိးဆၧၫ့ဘၪယၧၩလီၫ.- ယအီၪဘိၪ့တၭႇ နၥံၪဒုၭကီၩ့ဒုၭၥိၭဘၪယၧၩလီၫ. ယစူၭယဆၫတၭႇ နၥံၪအီၪၡီၩ့ဘၪယၧၩလီၫ. ယအီၪလၧထီၫ့ဖၧၩ့တၭႇ နၥံၪဂဲၫဘၪလၧယအီၪလီၫ.

ထီးနီၪလဖၧၫ့ ၦအတီၩအလီၩ့လဖၪမိချဲၩ့ဆၧၫ့ဝ့ၫတၭႇ စံၭဝ့ၫဒၪႇ ကဆါဧ့ႇ မွဲဆၧၥၭဝံနၥၭတၭႇ ပဒုၭအၪ့ဘၪနၧၩနီၪမွဲဂ့ၩႇ ဆၧၥၭဝံနၥၭလၧထံၫတၭႇ ပဒုၭအီၩဘၪနၧၩမွဲဂ့ၩႇ ပဒၪဘၪပဝ့ၫဎွ့ဆိၭလဲၪ.- နမွဲၦမွံၩတၭႇ ပထိးဆၧၫ့ နၧၩနီၪမွဲဂ့ၩႇ နအီၪဘိၪ့တၭႇ ပဒုၭကီၩ့ဒုၭၥိၭဘၪနၧၩနီၪမွဲဂ့ၩႇ ပဒၪဘၪပဝ့ၫဎွ့ဆိၭလဲၪ.- ဆၧစူၭဆၧဆၫနၧၩမွဲဂ့ၩႇ နအီၪလၧထီၫ့ဖၧၩ့မွဲဂ့ၩႇ ပဒၪဘၪတၭႇ ပလ့ၩလၧနအီၪနီၪမွဲဎွ့ဆိၭလဲၪ.-

စဎွၩမိချဲၩ့ဆၧၫ့ ဆၧတၭႇ စံၭအဝ့ၫၥံၪႇ ယလီၩဘၪနၥံၪတီၩတီၩယီၩႇ မွဲနၥံၪမၩဘၪ ၦလၧအဆံၭထုၬလဂၩ လၧယထၧၫ့ဖု ဝဲအကျၩယီၩတၭႇ မွဲနၥံၪမၩဘၪယၧၩလီၫ.

ထီးနီၪလဖၧၫ့ အဝ့ၫဒၪမိစံၭ ၦအီၪလၧအစူၪစ့ၪလဖၪႇ ၦလၧအဘၪဆိၪအၧၩ့ၥံၪဧ့ႇ စဲၪ့ဖၭလၧယၧၩႇ လၧမ့ၪအဆိၩအကၠၪအဖၧၩ့ႇ လၧဆၧတဲၩ့ဝဲၩန့မုၪခီၩလဲး ဒဲအၥီၫ့ၥံၪအဂးနီၪဆံၭ.- အဂဲးဘဲၫယီၩ ဆၧၥၭဝံယၥၭႇ နၥံၪလဖ့ၪအၪ့ဘၪယၧၩတၭႇ ဆၧၥၭဝံယၥၭလၧထံၫႇ နၥံၪဒုၭအီၩဘၪယၧၩအ့ၬ.- ယမွဲၦမွံၩႇ နၥံၪထိးဆၧၫ့ဘၪယၧၩအ့ၬ. ယအီၪဘိၪ့ႇ နၥံၪဒုၭကီၩ့ဒုၭၥိၭဘၪယၧၩအ့ၬ. ယစူၭယဆၫႇ ဒဲယအီၪလၧထီၫ့ဖၧၩ့ႇ နၥံၪဂဲၫအီၪၡီၩ့ဘၪယၧၩဆ့အ့ၬ.

ထီးနီၪလဖၧၫ့ အဝ့ၫၥံၪမိချဲၩ့ဆၧၫ့ဆၧတၭႇ စံၭဝ့ၫဒၪႇ ကဆါဧ့ႇ ဆၧၥၭဝံနၥၭ ဒဲဆၧၥၭဝံနၥၭလၧထံၫမွဲဂ့ၩႇ နမွဲၦမွံၩမွဲဂ့ၩႇ နအီၪဘိၪ့မွဲဂ့ၩႇ နဘၪစူၭဘၪဆၫမွဲဂ့ၩႇ နအီၪလၧထီၫ့ဖၧၩ့မွဲဂ့ၩႇ ပဒၪဘၪတၭ ပလမၩဘၪနဎီးနၡၩအဆၧမၩနီၪ မွဲဎွ့ဆိၭလဲၪ.

ထီးနီၪလဖၧၫ့ အဝ့ၫဒၪမိချဲၩ့ဆၧၫ့ဆၧတၭႇ စံၭဝ့ၫႇ ယလီၩဘၪနၥံၪတီၩတီၩယီၩႇ မွဲနၥံၪလမၩဘၪ ၦလၧ အဆံၭထုၬလဂၩ လၧၦလဖၪယီၩအကျၩတၭႇ နၥံၪလမၩဘၪယၧၩလီၫ.- ၦလဖၪယီၩ မိလ့ၩနုၬဘၪလၧ ဆၧစ့ၩရၫ့စၪအဖၧၩ့ အဆိၩဆိၩအကၠၪကၠၪလီၫ. အ့ၪမွဲၦလၧအတီၩအလီၩ့လဖၪနီၪႇ မိလ့ၩနုၬဘၪလၧ ဆၧမၧၫ့အဖၧၩ့ အဆိၩဆိၩအကၠၪကၠၪလီၫ.