ဖိၪၥၪယ့ၫၡုၬအီၪလၧဆၧလုဂံၪ့ဖၧၩ့

ထီးဘိၪ့လ့ၩဖၬအ့ၪဘၪနီၪ အမိအဖါလ့ၩဝ့ၫလၧ ယရုစလံၫ့ကိၭနံၪ့ဒ့ၭလီၫ.- ဆၧမၩအၥၭလၧအအီၪလဆံၫနံၫနံၪ့နီၪ ဘဲၫဆၧဘိၪ့အထူၫအရူၫအၥိၭနီၪ အဝ့ၫၥံၪလ့ၩထၪ့ဝ့ၫလၧယရုစလံၫ့,- အမုနံၩလဖၪဎွ့ၩထၪ့ဝ့ၫတၭ, ၦလဖၪနီၪထဲၩ့ထဲၩ့ဝ့ၫ, ဖိၪၥၪယ့ၫၡုၬအီၪထးဝ့ၫ လၧယရုစလံၫ့အဖၧၩ့နီၪတၭး အမိအဖါၥ့ၪယၫဝ့ၫအ့ၬ.- အဝ့ၫၥံၪဆီၫ့မီၪ့ဝ့ၫလၧ အအီၪလၧၦဂဲၫထဲၩ့လၧအၥိၭအကျၩတၭ, ထဲၩ့ထဲၩ့ဝ့ၫလနံၩဖၧၩ့ၥၭတၭ, အၪ့ ဎၬဝ့ၫလၩ့ထံးလၩ့ဆ့ၭ လၧအဘူၭအထံးဒဲလၧအထံၩအၥိၭအကျၩ,- လဒၪဘၪဝ့ၫတၭ, ထဲၩ့ထဲၩ့အၪ့ဎၬဝ့ၫ လၧယရုစလံၫ့လီၫ.

ဆၧမၩအၥၭလၧၥၧၫ့နံၩဖီၩ့ခွံၬတၭ, မွဲအဒၪထဲၩ့ဝ့ၫ အီၪလၧဆၧလုအဂံၪ့ဖၧၩ့ ဆၧၫ့နၩ့ဝ့ၫလၧ ဆရၫၥံၪအကျၩတၭ, ခိၭနၪအဝ့ၫၥံၪအလူနီၪ ဒဲအၪ့စၪ့ဆၧလီၫ. လၧအဆၧကိၪ့ၥ့ၪ, ဒဲအစံၭဆၧၫ့ဆၧအကၠီၩ့တၭ, ၦနါဂၧၫ့ဝ့ၫလဖၪနီၪ ထီၫမံၫထီၫမၪဝ့ၫထီးအလူၬလီၫ. ထီးအဝ့ၫၥံၪဒၪဘၪဝ့ၫနီၪ,ထီၫမံၫထီၫမၪဝ့ၫတၭ, အ မိစံၭအဝ့ၫ,ဖိၪဧ့ႇ မွဲဘၪနီၫနမၩပၧၩဘဲၫယီၩလဲၪ. ယိခွါ, နဖါဒဲယၧၩယီၩ, ပၥုၪ့အုၭပၥၭအုၭတၭ, ပအၪ့ဎၬယူၭနၧၩယူၭ.-

အဝ့ၫဒၪစံၭဆၧၫ့ဝ့ၫ, မွဲဘၪနီၫနၥံၪအၪ့ဎၬယၧၩလဲၪ. ယဘၪအီၪလၧယဖါအဂံၪ့ဖၧၩ့ မွဲနၥံၪၥ့ၪယၫအ့ၬဧၪ.- ဆၧချဲၩ့လၧအလီၩဘၪဝ့ၫနီၪ,အဝ့ၫၥံၪနၪဝ့ၫၥ့ၪအ့ၬ.- အဝ့ၫဒၪထဲၩ့ထဲၩ့ဝ့ၫလၧအဝ့ၫၥံၪအၥိၭ လၧနၭဇရ့ၭတၭ, အီၪက့ၪအၥၭလၧအဝ့ၫၥံၪအဖၫ့လၬလီၫ. ဆၧလဖၪနီၪ အမိထီးန့ဝ့ၫလၧအၥၭဖၧၩ့ ထီးအလူၬလီၫ.- ယ့ၫၡုၬဒိၪထၪ့ဝ့ၫတၭအဆၧကိၪ့ၥ့ၪ, ဒဲအခိးအတၩလၧယွၩအမ့ၬယၫ ဒဲလၧၦၡၩအမ့ၬယၫ အၪထၪ့ဝ့ၫဒၪဆ့လီၫ.