ဖိၪၥၪခွၫလဖၪဘၪဆၧမၩၥံၫအဂဲး.

လ့ၩစဲၪ့ဖီၩ့ဖျ့ၭလၧခးအံဇံၭ.ထီးၦလဖၪနီၪ ထဲၩ့ထဲၩ့ဝ့ၫတၭႇ ယိခွါႇ ကဆါအၥီၫ့လဂၩ မၩဖျီၪထၪ့အၥၭလၧ စယိၥၭအမ့ၬယၫ လၧဆၧမံၫမးအဖၧၩ့တၭႇ စံၭဝ့ၫဒၪႇ ဂဲထုၪ့မၩန့ဖိၪၥၪ ဒဲအမိတၭႇ စဲၪ့ထၪ့လ့ၩနုၬလၧခးအံဇံၭအဖၧၩ့တၭႇ အီၪထီးနီၪ ထီးယလီၩဘၪနၧၩဆံၭ. အဂဲးဘဲၫယီၩ စဟ့ရၧၭမိအၪ့ဎၬဖိၪၥၪနီၪ ဘဲၫအမိမၩၥံၫဝ့ၫ အၥိၭနီၪလီၫ.- 
အဝ့ၫဒၪဂဲထုၪ့မၩန့ဖိၪၥၪဒဲအမိ လၧမုနၩလခီၫတၭႇ လ့ၩဝ့ၫထီၩ့လၧခးအံဇံၭအဖၧၩ့နီၪႇ- အီၪဝ့ၫထီးနီၪ ထီးစဟ့ရၧၭၥံၫဝ့ၫလီၫ. ဘဲၫယွၩအလူ လၧမီၪလဂၩလီၩဘၪဝ့ၫနီၪႇ မိလၧၫ့ထၪ့ ဎွ့ၩထၪ့ဝ့ၫအၥိၭတၭႇ စံၭဝ့ၫဒၪ ယကိၭန့ယူၭ ယဖိၪခွၫလၧ ခးအံဇံၭအဖၧၩ့ယူၭ.
ထီးနီၪလဖၧၫ့ ထီးစဟ့ရၧၭဒၪဘၪ လၧၦမၫကူၭၥံၪ အၪ့လီၫန့ဆၧနီၪႇ အၥၭထၪ့ဝ့ၫ ဒိၪဒိၪလ့ၬတၭႇ ဘဲၫအမုအလၩဘၪ လၧအအၪ့စၪ့ ၦမၫကူၭၥံၪ အဆၧလၩ့ထံးလၩ့ဆ့ၭအၥိၭနီၪႇ အၪ့မၧၫ့ၦမၩၥံၫခွံၬ ကယဲဖိၪၥၪအခွၫ လၧအၥၭနံၫနံၪ့ ဒဲနံၫနံၪ့အဖၫ့လၬထီးအလူၬ လၧ ဘ့ၭၥလံၫဟံၫ့အဖၧၩ့ႇ ဒဲလၧအနဲၩ့ထံၭဝၬဝၬကိၭစီၪ့ဒ့ၭ အဖၧၩ့နီၪလီၫ.- ထီးနီၪလဖၧၫ့ မီၪစယ့ၫရမဲအၫ
 အလူလၧၫ့ထၪ့ဎွ့ၩထၪ့ဝ့ၫတၭႇ- စံၭဝ့ၫဒၪႇ ဆၧအလူၥီၫ လၧရၫမၫအဖၧၩ့ဂၧၫ့ထၪ့ယူၭႇ ဂၪ့ဆၧယၧၩ့ဆၧ ဒဲဂၪ့ကိၭၡၭႇ ဒဲဂၪ့ခံးဂၪ့ကိၭအၪမၬလီၫ. နးရၫခ့လၭဂၪ့ဝ့ၫလၧအဖိၪလဖၪအကၠီၩ့ႇ ဒိၭဆၧမၩမုၬထၪ့ထဲၩ့ဝ့ၫနီၪ အၥၭလအီၪဘၪႇ မွဲအဖိၪလအီၪလၧၩ့ဘၪအဂဲးလီၫ.