ပဆၧစံၭထၪ့အၪ့အူၭလဖၪနီၪ ကဲၪထၪ့ထဲၩ့အခိးအတၩလၧပဂးလီၫ

ကဆါယွၩနီၪလၧၫ့ဎွ့ၩလၧဆၧလၩဆၧဖၩ့ႇ လၧအဂ့ၩကိၭမံၩ့ဒံၭအကၠီၩ့ႇ အဝ့ၫနီၪ ဘၪလိၪပဆၧစံၭထၪ့အၪ့အူၭအ့ၬႉ  လၧဆၧဘၩဆိၪဖၪဖၧၩ့ ပဆၧဘိၪ့ထၪ့ဘၩထၪ့ႇ ဒဲပဆၧစံၭထၪ့အၪ့အူၭလဖၪနီၪ ကဲၪထၪ့ထဲၩ့အခိးအတၩလၧပဂးလီၫႉ မၩလၩ့ဘူၭပၧၩလၧကဆါယွၩ အအီၪလီၫႉ

“နၥံၪကဘၪစံၭခိးစံၭတၩယၧၩႇ နၥံၪကဘၪစံၭထၪ့အၪ့အူၭယၧၩ” ကဆါယွၩစံၭပၧၩဘနီၪ နးကၠၪအ့ၬႉ လါနၫ့ ကဆါယွၩဖ့ၪလၫ့ထၬပၧၩ ဆၧၥ့ၪယၫနၪၥ့ၪတၭႇ အဆိၪထုၬ ပကဘၪၥ့ၪယၫစံၭခိးစံၭတၩအဝ့ၫလီၫႉ ပမိပဖါႇ ထၧၫ့ဖုထၧၫ့ဝဲႇ ပလိၬၥၭႇ ထံၩၥိၭလဖၪလီၫႉ

အ့ၪပထၪ့မံဆၩလုထၪ့စွါဘိၩႇ ပကနါဂၧၫ့ဘၪ “စံၭခိးစံၭတၩ” ဆၧချဲၩ့နီၪ အၪကၠၪအၪဘျၩ့လ့ၫႉ ဘၪနီၫလဲၪစွါဘိၩ မံဆၩဆၧလုထၪ့ယီၩ လၧ“ဂရံ”အဆၧချဲၩ့ခီၫ့ ပကိၭဝ့ၫ Eucharistလီၫႉ အခီၫပယီၫနီၪ မွဲဆၧစံၭထၪ့အၪ့အူၭလီၫႉ

ပဖီလံၬဆံၫ့အထုၬ ဆၧအယီၩ မွဲကဆါယွၩအလူအထၫလီၫႉႉ ပစံၭခိးစံၭတၩ ကဆါယွၩလီၫႉ ဎြံၬဧ့ႇ မွဲဆၧစံၭထၪ့အၪ့အူၭဘၪဘၪနၧၩဆံၭႉ ပစံၭခိးစံၭတၩၡီၩ့ ပကဆါပယွၩနီၪဆံၭႉ အလးခဲၫ့ထုၬႇ မံဆၩဆၧလုထၪ့ဆံၫ့ဎံၪထုၬယူၭႇ လ့ၩနၥံၪဝ့ၫလၧဆၧဘၪလိၬအိၭလိၬအဖၧၩ့နီၪဆံၭႉႉပစံၭခိးစံၭတၩ ကဆါယွၩလီၫႉ