နုၬထဲၩ့လၧနကဆါ အဆၧၥၭထိၬအဖၧၩ့ဆံၭ.

အဂဲးဘဲၫယီၩ ဆၧမၩအၥၭ ဘဲၫၦလဂၩလၧအလ့ၩ လၧထံၫယဲၩ့ခးယဲၩ့တၭႇ ကိၭန့အဎီးအၡၩဒၪဝ့ၫ ဖ့ၪလၫ့ဝ့ၫလၧအဆၧဖိၪဆၧလံၩ လၧအစူၪဖၧၩ့လီၫ.

 အလဂၩနီၪဖ့ၪလၫ့ဝ့ၫယဲတၫလၫ့ အလဂၩဒၪနံၫတၩလၫ့ အလဂၩဒၪလတၫလၫ့ ထီးဒၪအမၩဆၧၥ့ၪဆုၬဆုၬတၭႇ လ့ၩဝ့ၫလၧထံၫယဲၩ့ခးယဲၩ့ချဲၫ့မၬလီၫ.

 ၦလၧအန့ဘၪဝ့ၫယဲတၫလၫ့လဂၩနီၪ လ့ၩမၩဖနံၬဝ့ၫတၭႇ န့ဘၪဒီၭအဂူၫဂၩ ယဲတၫလၫ့လီၫ.- ဘဲၫနီၪအၥိၭ ၦလၧအန့ဘၪ နံၫတၫလၫ့လဂၩနီၪႇ န့အၪထၪ့ အဂူၫဂၩနံၫတၫလၫ့လီၫ.

အ့ၪမွဲၦလၧအန့ဘၪလတၫလၫ့လဂၩနီၪး လ့ၩခုၪ့လၩ့ဘၧၩ့ၥူၪခွံၬ အကဆါအစ့ၩ လၧဂၪ့ခိၪလၬလီၫ.

 ယံၬယံၬတၭး အဎီးအၡၩလဖၪနီၪ အကဆါဂဲၫထဲၩ့တၭႇ ယိထဲၩ့အဝ့ၫၥံၪအဆရၫ့လီၫ.- ၦလၧအန့ ဘၪယဲတၫလၫ့လဂၩနီၪ ဂဲၫစိၩဝ့ၫတၭႇ ဆိၬအဂူၫဂၩ ယဲတၫလၫ့တၭႇ စံၭဝ့ၫဒၪႇ ကဆါဧ့ႇ နဖ့ၪလၫ့ယၧၩ ယဲတၫလၫ့တၭႇ ယိခွါႇ ယန့ဘၪအၪထၪ့ယူၭ အဂူၫဂၩယဲတၫလၫ့ လၧအဖၫ့ခိၪယူၭ.- အကဆါစံၭဝ့ၫႇ ဘၪယူၭႇ ဎီးအၡၩလၧအဂ့ၩႇ လၧအလူတီၩဧ့ႇ နအီၪလၧဆၧၡၩအဖၫ့ခိၪတၭ နလူတီၩယူၭႇ ယမိအီၪက့ၪနၧၩ လၧဆၧအၪအဖၫ့ခိၪလီၫ. နုၬထဲၩ့လၧနကဆါ အဆၧၥၭထိၬအဖၧၩ့ဆံၭ.-

ၦလၧအန့ဘၪနံၫတၫလၫ့လဂၩနီၪ ဂဲၫစိၩဆ့တၭႇ စံၭဝ့ၫဒၪႇ ကဆါဧႇ နဖ့ၪလၫ့ယၧၩနံၫတၫလၫ့တၭႇ ယိခွါႇ ယန့အၪထၪ့ထဲၩ့ယူၭ အဂူၫဂၩနံၫတၫလၫ့ လၧအဖၫ့ခိၪယူၭ.- အကဆါစံၭဝ့ၫႇ ဘၪယူၭႇ ဎီးအၡၩလၧအဂ့ၩႇ လၧအလူတီၩဧႇ နအီၪလၧဆၧၡၩအဖၫ့ ခိၪတၭနလူတီၩယူၭႇ ယမိအီၪက့ၪနၧၩ လၧဆၧအၪအဖၫ့ခိၪလီၫ. နုၬထဲၩ့လၧနကဆါ အဆၧၥၭထိၬအဖၧၩ့ဆံၭ.-

ၦလၧအန့ဘၪလတၫလၫ့လဂၩနီၪ ဂဲၫစိၩဝ့ၫဆ့တၭႇ စံၭဝ့ၫဒၪႇ ကဆါဧႇ ယၥ့ၪယၫလၧနမွဲၦအကၪ နလဎွံၪဘၪအလးနီၪ နကူၭနဝ့ၫ နလမၩပြံၩပြၩဘၪအလးနီၪ နအၪ့ထုၫ့ကီၪ့နဝ့ၫလီၫ. ယၥၭမဲၪဆၧနီၪ ယလ့ၩအီၪက့ၪၥူၪခွံၬနစ့ၩ လတၫလၫ့ လၧဂၪ့ခိၪလၬလီၫ. ယိခွါႇ နန့ဘၪထဲၩ့နဆၧဒၪနဝ့ၫလီၫ.- အကဆါ ချဲၩ့ဆၧၫ့ဆၧတၭႇ စံၭဝ့ၫႇ ဎီးအၡၩအအၧၩ့အကၠႃၪ့လဂၩဧ့ႇ နၥ့ၪယၫလၧယလဎွံၪဘၪအလးနီၪ ယကူၭယဝ့ၫႇ ယလမၩပြံၩပြၩဘၪအလးနီၪ ယအၪ့ထုၫ့ကီၪ့ယဝ့ၫလီၫ.- မၩအၥၭဘဲၫနီၪတၭႇ နကြၨၭဒုၭအၪ့လီးလၩ့ ယစ့ၩ လၧၦအၪ့လီးစ့ၩလဖၪတၭႇ ယဂဲၫထဲၩ့နီၪ ယမိန့ဘၪယစ့ၩ လၧအအ့ၪထၪ့ဝ့ၫလီၫ.-

မၩအၥၭဘဲၫနီၪတၭ မၩန့ထဲၩ့အဝ့ၫဒၪလတၫလၫ့နီၪတၭႇ ဖ့ၪလၫ့ထဲၩ့ ၦအီၪလၧစ့ၩအတၫလၫ့လဆံၫ လဂၩနီၪဆံၭ.- အဂဲးဘဲၫယီၩ ဆၧမိဖ့ၪလၫ့ဆၧ လၧၦလၧအဆၧအီၪကိၭဂၩဒ့ၭနီၪတၭႇ အဝ့ၫဒၪအဆၧမိအၪလၨၪဝ့ၫလီၫ. အ့ၪမွဲၦလၧအဆၧလအီၪဘၪနီၪ ဆၧမိမၩန့ခွံၬဝ့ၫထီးဒၪအအီၪဝ့ၫနီၪ- ဒဲနၫ့ထၪ့ခွံၬဎီးအၡၩ လၧအလန့ကၩဘၪဆၧလဂၩ လၧဆၧခံၭကျၩလၧခီၫ့ဆံၭ. ဆၧဘၪဂၪ့ ဆၧဘၪယၧၩ့ ဆၧခၪအဲၪ့ထံး မိအီၪဝ့ၫထီးနီၪလီၫ.