ထီးဒၪၦလၧအၥၭမၧၫ့ လၩ့မါခွံၬလဂၩဂၩနီၪႇ မိထိးထဲၩ့တၩ့ထဲၩ့ဝ့ၫဒၪလီၫ.

တၭဘဲၫဆၧမၩအၥၭ လၧစနိအၫအမုနံၩလဖၪ အၥိၭနီၪႇ ဆၧမိမၩအၥၭ လၧၦၡၩအဖိၪခွၫအမုနံၩ ဘဲၫနီၪအၥိၭဆ့လီၫ.- ၦၡၩၥံၪနီၪ အၪ့ဆၧအီၩဆၧႇ အီၪဎုၬလိၬအၥၭႇ ဒုၭအီၪဎုၬလိၬအၥၭႇ ထီးမုလနံၩလၧ စနိအၫလ့ၩနုၬလၧ တလၫဖၭဒိၪအဖၧၩ့နီၪ ထံၫဂဲၫလုၬဘံၭဆၧတၭႇ မၩဂၭဂီၩ့ခွံၬၦထီးအလူၬနီၪလီၫ.- ဘဲၫနီၪအၥိၭ ဆၧမၩအၥၭလၧစလီၭ အမုနံၩလဖၪဆ့လီၫ.

ၦအၪ့ဆၧအီၩဆၧ ဎွ့ၩဆၧအၪ့ဆၫဆၧ ၥုၪ့လၩ့ဖျၭလၩ့ဆၧ ၥုၪ့ဂံၪ့ၥံၪဎၫ့ၥံၪလီၫ.- မွဲလါနၩ့ဘိၩ မုလနံၩလၧစလီၭ စဲၪ့ထၪ့ခွံၬလၧ စီဒၧၫ့အဖၧၩ့နီၪႇ ဆၧဂဲၫဆၧၩ့လၩ့မ့ၪဒဲကး လၧမူၭခိၪတၭ မၩဂၭဂီၩ့ခွံၬၦၡၩကိၭအဂၩဒ့ၭလီၫ.- မုနံၩလၧၦၡၩအဖိၪခွၫယီၩ မိအီၪဖျီၪထၪ့တၭ ဆၧမိမၩအၥၭဘဲၫနီၪအၥိၭလီၫ.

ဆၧလၧမုလနံၩနီၪ ၦအ့ၪအီၪလၧအဂံၪ့ခိၪတၭႇ အဆၧဖိၪဆၧလံၩ အီၪလၧအဒူၭဖၧၩ့နီၪ မွဲအထီၩ့စဲၪ့လၩ့မၩန့ထဲၩ့အဆၧနီၪလဂ့ၩ. ဘဲၫနီၪအၥိၭ ၦအီၪလၧဆံၬဖၧၩ့တၭႇ ထီးထဲၩ့ထဲၩ့လၧအလးခဲၫ့လဂ့ၩ.- နၪ့ထၪ့ထဲၩ့စလီၭအမၫနီၪဘီၪ.- ထီးဒၪၦလၧအအၪ့ဎၬ ထိးထဲၩ့တၩ့ထဲၩ့ အၥၭမၧၫ့လဂၩဂၩနီၪႇ မွဲအမိမၩလၩ့မါခွံၬဝ့ၫဒၪလီၫ. ထီးဒၪၦလၧအၥၭမၧၫ့ လၩ့မါခွံၬလဂၩဂၩနီၪႇ မိထိးထဲၩ့တၩ့ထဲၩ့ဝ့ၫဒၪလီၫ.

ယစံၭနၥံၪဆၧလၧမုလနံၩနီၪႇ ၦခွၫနံၫဂၩမိအီၪ လၧအလးမံၫလစီၪ့ဎး ဆၧမိမၩန့ထဲၩ့ဝ့ၫနးဂၩတၭႇ အလဂၩမိအီၪလၩ့ထးဝ့ၫလီၫ.- ၦမုၪနံၫဂၩမိဂူၬဆုၪ့ဂူၬ လစီၪ့ဎးတၭ ဆၧမိမၩန့ထဲၩ့နးဂၩတၭႇ အလဂၩမိအီၪထးဝ့ၫလီၫ.- ၦခွၫအီၪလၧဆံၬဖၧၩ့နံၫဂၩ ဆၧမိမၩန့ထဲၩ့နးဂၩတၭႇ အလဂၩမိအီၪလၩ့ထးဝ့ၫလီၫ.

ၦလဖၪချဲၩ့ဆၧၫ့ဆၧတၭႇ အၪ့စၪ့ဝ့ၫႇ ကဆါဧ့ႇ ခီၫခီၫလဲၪ. အဝ့ၫဒၪစံၭအဝ့ၫၥံၪႇ ထီးဒၪဆၧစွၪအီၪဝ့ၫ လစီၪ့စီၪ့နီၪႇ လၫ့ကထၬလဖၪ မိအီၪကိၩ့အီၪကီၪ့ဝ့ၫထီးနီၪလီၫ.