ထီးဒၪၦလၧအဆၪ့လၩ့အၥၭလဂၩဂၩနီၪ မိဘၪဆၧဒုၭထၪ့ထီၫဝ့ၫလီၫ.

ထီးနီၪလဖၧၫ့ ယ့ၫရှူၬလီၩဘၪ ဆၧလၧၦခမျၧး ဒဲလၧအထံၩအဖျဲလဖၪတၭႇ- စံၭဝ့ၫဒၪႇ ၦကွ့ၭလံၬ ဒဲၦဖၫရစံၫၥံၪ ဆၧၫ့နၩ့ဝ့ၫလၧ စမိစ့ၭအလးဆၧၫ့နၩ့အဖၧၩ့လီၫ.- မၩအၥၭဘဲၫနီၪတၭႇ ထီးဒၪအမၪလူၬနၥံၪကိၭမံၩ့ဒ့ၭနီၪႇ ထီးန့မၩနၥံၪဝ့ၫဆံၭ. အ့ၪမွဲဘဲၫအမၩဆၧအၥိၭနီၪႇ မၩလဂ့ၩ.

အဂဲးဘဲၫယီၩ အဝ့ၫၥံၪလီၩလၩ့လၬလၩ့ဆၧတၭႇ မၩဝ့ၫအ့ၬ.-အဂဲးဘဲၫယီၩ အဝ့ၫၥံၪဘဲၩ့ထၬဆၧယိၭလၧအဎၧၫ့ ဒဲဆၧယိၭဝ့ၫကၪတၭႇ အီၪက့ၪထၪ့ဝ့ၫ လၧၦၡၩအခိၬထံၭလီၫ. အ့ၪမွဲအဝ့ၫၥံၪမိၥုၭဝ့ၫန့ၫ လၧအစူၪမုစူၪနိၩ့နးဘီၩ့နီၪ အၥၭအီၪအ့ၬ. ကယဲအဆၧမၩထီးအလူၬနီၪ ဘဲၫၦဂူၫဂၩမိဒၪ ဘၪဝ့ၫအၥိၭတၭမၩဝ့ၫလီၫ. အဝ့ၫၥံၪခဲးအစူၪဖၭလဲတၭႇ မၩထီၫထၪ့အကီၩ့အၥိၭအနွံၫလီၫ.- အဲၪဒိၭဝ့ၫ အလးလၧအဂ့ၩထုၬ လၧဆၧဘိၪ့ဖၧၩ့ႇ ဒဲအလးဆၧၫ့နၩ့အဂ့ၩထုၬလၧၥရိၬဖၧၩ့ႇ- ဒဲဆၧချဲၩ့ဒုၪ့ဘၪဝ့ၫလၧဖၠၫဖၧၩ့ႇ ဒဲၦကိၭဝ့ၫလၧႇ ရၭဘံၫဧ့ႇ ရၭဘံၫဧ့ႇ နီၪလီၫ.

အ့ၪမွဲနၥံၪဝ့ၫယီၩ ထီးဖ့ၪလၫ့ၦကိၭနၥံၪႇ ရၭဘံၫဧ့ႇ နီၪလဂ့ၩ. အဂဲးဘဲၫယီၩ နၥံၪအဆရၫဖၭဒိၪအီၪဝ့ၫလဂၩဎးႇ ဒဲနၥံၪဝ့ၫဒၪထီးအလူၬယီၩ နၥံၪမွဲထၧၫ့ဖုဝဲလီၫ.- နၥံၪထီးကိၭၦလၧဂၪ့ခိၪချိၫ့ယီၩ လၧဖါနးဂၩလဂ့ၩ. အဂဲးဘဲၫယီၩ နၥံၪအဖါအီၪဝ့ၫလဂၩဎး လၧမူၭခိၪအဖၧၩ့နီၪလီၫ.- ထီးဖ့ၪလၫ့ၦကိၭနၥံၪလၧ အခိၪလဂ့ၩ. အဂဲးဘဲၫယီၩ နၥံၪအခိၪ အီၪလဂၩဎး ဎရံၬနီၪလီၫ.- ၦလၧအဒိၪထုၬလၧနၥံၪအကျၩလဂၩနီၪ မိဘၪကဲၪထၪ့လၧ နၥံၪအခ့ၫအၡၩလီၫ.- ထီးဒၪၦလၧအအီၪက့ၪထၪ့ထီၫ အၥၭလဂၩဂၩနီၪ မိဘၪဆၧဆၪ့လၩ့ဝ့ၫတၭႇ ထီးဒၪၦလၧအဆၪ့လၩ့အၥၭလဂၩဂၩနီၪ မိဘၪ ဆၧဒုၭထၪ့ထီၫဝ့ၫလီၫ.