ဆၧအၪ့စၪ့ဘၪဆဲၫ့ႇ ယ့ၫရှူၬအဆၧစီၩ့ဆၧမၩ့.

ထီးအလ့ၩနုၬဝ့ၫ လၧဆၧလုအဂံၪ့ဖၧၩ့တၭႇ ၥီၪ့ထဲၩ့ၥၫ့ထဲၩ့ဆၧအဘိၩ့ဘၭနီၪႇ ၦလုဆၧအဒိၪလဖၪႇ ဒဲၦခမျၧးအၥုၪ့က့ၭၥၭၡါလဖၪ ဂဲၫလၧအအီၪတၭႇ စံၭဝ့ၫဒၪႇ နမၩဆၧလဖၪယီၩ မွဲလၧပလၫအစီၩ့အမၩ့လဂၩလဲၪ. မွဲပလၫဖ့ၪလၫ့နၧၩ လၧဆၧစီၩ့ဆၧမၩ့ယီၩလဂၩလဲၪ.- 
ယ့ၫရှူၬချဲၩ့ဆၧၫ့ဆၧတၭႇ စံၭအဝ့ၫၥံၪယမိအၪ့စၪ့နၥံၪနးမံၩ့ဆ့လီၫ. ဆၧနီၪနၥံၪအ့ၪလီၩဘၪယၧၩတၭႇ ယမၩဆၧလဖၪယီၩႇ လၧပလၫအစီၩ့အမၩ့လဂၩလဲၪနီၪႇ ယမိလီၩဘၪနၥံၪဆ့လီၫ.- စယီဟၫ့အဆၧဘၭတံၫဇၫ့နီၪႇ မွဲအဂဲၫဝ့ၫလၧခီၫခီၫလဲၪ. မွဲအဂဲၫလၧမူၭခိၪလခီၫနီၪႇ မွဲအဂဲၫလၧၦၡၩလခီၫလဲၪ.- 
အဝ့ၫၥံၪကိၪ့ထၪ့လိၬအၥၭတၭႇ စံၭဝ့ၫဒၪႇ ပအ့ၪစံၭလၧမူၭခိၪနီၪႇ အဝ့ၫနီၪမိစံၭပၧၩႇ အ့ၪမွဲဘဲၫနီၪတၭႇ မွဲဘၪနီၫလၧနၥံၪလနဲၩဘၪလဲၪ. ပအ့ၪစံၭလၧၦၡၩနီၪ ပၥၭမဲၪၦခမျၧးလီၫ. အဂဲးဘဲၫယီၩ ၦထီးအလူၬအီၪက့ၪစယီဟၫ့ ဘဲၫမီၪလဂၩအၥိၭလီၫ.- 
အဝ့ၫၥံၪချဲၩ့ဆၧၫ့ဆၧတၭႇ စံၭယ့ၫရှူၬႇ ပၥ့ၪယၫအ့ၬ. အဝ့ၫဒၪစံၭႇ ဘဲၫနီၪအၥိၭယမၩဆၧနီၪလဖၪႇ လၧပလၫအစီၩ့အမၩ့ လဂၩလဲၪနီၪႇ ယလီၩဘၪနၥံၪဆ့အ့ၬ.