ဆၧအဲၪဒုၪဒၩလဖၪ

အ့ၪမွဲယဝ့ၫဒၪယီၩ, ယစံၭၦလၧအနါဂၧၫ့ဆၧနၥံၪ ဝ့ၫဒၪယီၩ, အဲၪနၥံၪအဒုၪအဒၩဆံၭ. ၦလၧအမ့ၬ လဲၩနၥံၪလဖၪနီၪ မၩဂ့ၩအဝ့ၫၥံၪဆံၭ. ၦလၧအဆိၪအၧၩ့နၥံၪနီၪ, ဆိၪဂ့ၩအဝ့ၫၥံၪဆံၭ. ၦလၧအချဲၩ့ ကြၩ့ထမးနၥံၪနီၪ, ဘၩဆိၪဖၪန့အဂးဆံၭ. ၦလၧအဒဲၩနနိၭဖၩထံၭအယီၩလခီၫနီၪ ဖ့ၪလၫ့ ဝ့ၫလၧအဝ့ၫလခီၫဆံၭ. ၦလၧအမိမၩန့ဘၪအၥၭလၧ နဖၬဘဲၩ့နီၪ, နၥံၪထီးပဒၩ့အဝ့ၫလၧအမိမၩန့နဆဲၫ့ ဆ့လဂ့ၩ. ကယဲၦလၧအအၪ့ကံၩ့ဆၧလၧနၧၩ လဂၩလါလါနီၪ,ဖ့ၪလၫ့အဝ့ၫၥံၪဆံၭ. ၦလၧအမၩန့နဆၧနီၪ,နၥံၪ ထီးအၪ့ကံၩ့ကဒၩထဲၩ့လဂ့ၩ. ဘဲၫနၥံၪဆိၫ့ၦၡၩမၩနၥံၪအၥိၭနီၪ, မၩအဝ့ၫၥံၪ ဘဲၫနီၪအၥိၭဆ့ဆံၭ.

နၥံၪအ့ၪအဲၪၦလၧအအဲၪနၥံၪနီၪ, မွဲနၥံၪအဘိၪ့အီၪ လၧဆၧနီၪလမံၩ့လဲၪ. အဂဲးဘဲၫယီၩ ၦဆၧဒဲၩဘၭဖိၪ လဖၪနီၪ, အဲၪၦလၧအအဲၪအဝ့ၫၥံၪဆ့လီၫ.- နၥံၪအ့ၪမၩဂ့ၩၦလၧအမၩဂ့ၩနၥံၪနီၪ, နၥံၪအဘိၪ့အီၪ လၧဆၧ နီၪလမံၩ့လဲၪ. အဂဲးဘဲၫယီၩ ၦဆၧဒဲၩဘၭဖိၪလဖၪနီၪ, မၩဝ့ၫဘဲၫနီၪၥိၭဆ့လီၫ. နၥံၪအ့ၪဒုၭအၪ့လီး ဆၧလၧၦၡၩ လၧနၥံၪယိလါ အမိလိၭထဲၩ့ဝ့ၫလဖၪနီၪ, မွဲနၥံၪအဘိၪ့အီၪ လၧဆၧနီၪလမံၩ့လဲၪ. အဂဲးဘဲၫယီၩ ၦဆၧဒဲၩဘၭဖိၪလဖၪဒုၭအၪ့လီးဆၧလၧၦဆၧဒဲၩဘၭဖိၪလဖၪ ဘဲၫၥိၭအမိဒိၭန့ဝ့ၫဎွ့ၩဎီၩ့အလးလီၫ.

လၧနီၪအမ့ၬယၫ, နၥံၪအဒုၪအဒၩလဖၪနီၪအဲၪအဝ့ၫၥံၪတၭ, မၩဂ့ၩဆၧတၭ, နၥံၪလယိလါဘၪလၧ နၥံၪမိဒိၭန့ထဲၩ့ဆၧနးမံၩ့ဘၪတၭ, ဒုၭအၪ့လီးဆၧဆံၭ. နၥံၪမိန့ဘၪနၥံၪအဘိၪ့ဖၭဒိၪတၭ, နၥံၪမိကဲၪ ထၪ့ဆၧထၪ့ထီၫထုၬ အဖိၪခွၫၥံၪလီၫ. အဂဲးဘဲၫယီၩ အဝ့ၫဒၪနီၪ မၩဂ့ၩၦလၧအလၥ့ၪယၫဘၪဆၧအခိး ဒဲၦအအၧၩ့ၥံၪလီၫ.- မၩအၥၭဘဲၫနီၪတၭ, ဘဲၫနၥံၪအဖါယၫ့ၥၭဆၧအၥိၭနီၪ,ယၫ့ၥၭဆၧနၥံၪဝ့ၫ ဘဲၫနီၪၥိၭ ဆ့ဆံၭ.

နၥံၪထီးစ့ၩရၫ့ဆၧလဂ့ၩတၭ,ဆၧမိစ့ၩရၫ့နၥံၪဆ့အ့ၬ. နၥံၪထီးစ့ၩရၫ့စၪဆၧလဂ့ၩတၭ, ဆၧမိစ့ၩရၫ့စၪ နၥံၪဆ့အ့ၬ. ကွဲၪဖျါဆၧဆံၭ, ဆၧမိကွဲၪဖျါနၥံၪအဆၧလီၫ.- ဖ့ၪလၫ့ဆၧဆံၭ,ဆၧမိဖ့ၪလၫ့ဆၧလၧနၥံၪလီၫ. ၦမိတိၪ့ဆၧဂ့ၩဘၪစဲၪ, မိဆၪ့လၩ့ထဲၩ့, မိဂံၩဂုလၩ့ မိဎွ့ၩစီၩ့နီၩ့တၭ, မိဖ့ၪလၫ့ဝ့ၫလၧနၥံၪအၥၭနၫၡါလီၫ. အဂဲးဘဲၫယီၩ ဘဲၫနၥံၪတိၪ့ဖ့ၪလၫ့ဆၧအၥိၭနီၪ,ဆၧမိတိၪ့ဖ့ၪလၫ့ထဲၩ့နၥံၪလီၫ.