ဆၧလီၩလၩ့လၬလၩ့ ဆၧၥၭထိၬပရၧၫ့ႇ မုအီၪပွံၭနံၩ မုနွ့ၫ (၄)

ၦခမျၧးလဖၪ ထီၫမံၫထီၫမၪႇ လၧၦနၭဇရ့ၭဖိၪႇ ယ့ၫၡူၬႇ ခၫ့ဖျီၫ့လၧအဆၧၥီၪ့ဆၧၥၫ့ႇ လၧအဆၧချဲၩ့ႇ လၧအအစီၩ့အမၩ့ႇ အဝ့ၫမၩဘျၪထဲၩ့ၦစူၭၦဆၫႇ ဒဲ နၫ့ထၪ့ခွံၬဆၧနၪလဖၪအကၠီၩ့လီၫႉ

   ဆၧနၪလဖၪ ၥၭမဲၪယ့ၫၡူၬအကၠီၩ့ႇ အဝ့ၫၥ့ၪႇ ကိၭၡၭထၪ့ဆၧႇ ယ့ၫၡူၬနီၪ မွဲယွၩအဆၧဆံၫ့ဎံၪလဂၩႇ  ယွၩအဖိၪလဂၩအကၠီၩ့ႇ ၥ့ၪယၫဝ့ၫဂ့ၩဘၪစဲၪတၭႇ ယွၩနီၪကမၩဂၭဂီၩ့အဝ့ၫၥံၪနီၪ ၥၭမဲၪဝ့ၫဒိၪဒိၪလ့ၬအကၠီၩ့ ကိၭၡၭထၪ့ဆၧလီၫႉ

အဲၪကွံၩဘၪထၧၫ့ဖုဝဲမုခွၫၥံၪဧ့ႇ

မုၪခီၩလဲးၥ့ၪယၫယ့ၫၡူၬလါနၫ့ဂ့ၩႇ ဆူၩနဲၩဝ့ၫအ့ၬႉ အုၩ့လၩ့ယ့ၫၡူၬအ့ၬႉ အဲၪကွံၩဝ့ၫအ့ၬႉ ဆၧနၪလဖၪႇ အၪ့ဎၬမၩဂၭယ့ၫၡူၬဒဲၦလၧအဖိၬယ့ၫၡူၬအခဲၫ့လဖၪလီၫႉ  ဆၧနၪစံၭယ့ၫၡူၬႇ နဝ့ၫဒၪယီၩ နမွဲယွၩအဆၧဆံၫ့ဎံၪလဂၩလီၫႉ ဆၧချဲၩ့အနီၪ လမွဲဘၪဆၧအုၩ့ဆၧဆူနဲၩတၭႇမွဲဝ့ၫလၧ ဆၧကျဲၩ့ဖစီၩ့ကမံၩ့လီၫႉ

ယ့ၫၡူၬဒုၪဆၧအၪ့ဆၧအီၩ လၧမံၩ့လၬကျၩ အနံၩ ၄၀ႇ အၥၫ့ ၄၀ အထီႇ မုၪခီၩလဲး လ့ၩကျဲၩ့ဖစီၩ့ယ့ၫၡူႇ စံၭဝ့ၫႇ နအ့ၪမွဲယွၩအဖိၪခွၫတၭႇ ဘဲၫၥိၭလိးလဖျိၪ့ယီၩမိကိၪထၪ့ကိၪတၭႇ ချဲၩ့ထၪ့ဘီၪႉ

ဘဲၫယ့ၫၡူၬကခိၭနၪႇ ကအီၪက့ၪထၪ့ထီၫအၥၭအဂးႇ ကမၩဝ့ၫ ဘဲၫမုၪခီၩလဲးအၪ့မၧၫ့အၥိၭအဂးႇ မုၪခီၩလဲးကျဲၩ့ဖစီၩ့ယ့ၫၡူၬလီၫႉ  လါနၫ့ဂ့ၩႇ ယ့ၫၡူၬနီၪ အစီၩ့အမၩ့ဎိၩဒိၪထုၬ ယွၩအဖိၪခွၫအကၠီၩ့ႇ မုၪခီၩလဲး မၩလၩ့ထံဖါႇ မၩဂၭဂီၩ့ယ့ၫၡူၬန့အ့ၬႉ

မုၪခီၩလဲးၥ့ၪယၫ ယ့ၫၡူၬ မွဲယွၩအဖိၪခွၫႇ အလၧၫ့ဎွ့ၩဝ့ၫအစီၩ့အမၩ့ႇ ဆၧအဲၪဆၧကွံၩႇ ဆၧယၫ့ၥုၪ့ယၫ့ၥၭအကၠီၩ့ ၥ့ၪယၫဝ့ၫဂ့ၩဘၪစဲၪလီၫႉ လါနၫ့ဂ့ၩႇ မုၪခီၩလဲး ဆူနဲၩႇ အဲၪကွံၩနးကၠၪအ့ၬႉ အၪ့ကံၩ့အၪ့ယၫလၩ့ထဲၩ့ၥၭနးကၠၪအ့ၬႉ

ထၧၫ့ဖုဝဲမုခွၫၥံၪဧ့ႇ

ပကန့ဘၪ ဆၧထိးထဲၩ့တၩ့ထဲၩ့အဂး ဆၧၥ့ၪနၪၥ့ၪကမံၩ့လၧၩ့နီၪ လၧၫ့ဎွ့ၩအ့ၬႉ ဆၧဆူၩနဲၩႇ ဆၧအဲၪဆၧကွံၩႇ ဆၧခိၭနၪႇ ဆၧနိၫ့ယါလၩ့ထဲၩ့ၥၭ လိၫဝ့ၫဒၪလီၫႉ ဘဲၫပၥ့ၪယၫအၥိၭႇ ပကဘၪထီးန့ဖံၭထၬလီၫႉ ပၥ့ၪယၫ ဆၧအီၪကီၪ့အဆၧမၪလူၬ ဒဲယွၩအဆၧမၪလူၬႇ လါနၫ့ဂ့ၩႇ ဘဲၫဆၧမၪလူၬအီၪဝ့ၫအၥိၭ အ့ၪလမၩဘၪစွါဘိၩႇ ပဒိၭန့ဘၪ ယွၩအခိးအတၩႇ ဒဲယွၩအဆၧထိးထဲၩ့တဲၩ့ထဲၩ့အလးအီၪအ့ၬႉ

ပအုၩ့လၧကဆါယွၩ လၧပနိၭဂီၭႇ အ့ၪပလခိၭနၪဘၪယွၩႇ အ့ၪပလအီၪၥၭမၧၫ့ဘၪ ယွၩအၥၭအီၪဝ့ၫအၥိၭနီၪစွါဘိၩႇ မီၪဎီၩ့ဒၪ ပအၪ့လီၫဆၧလဖၪလီၫႉ

ယ့ၫၡူၬစံၭထၬဝ့ၫႇ ၦလၧအကိၭယၧၩႇ ကဆါဧ့ႇ ကဆါဧ့ႇ ကိၭဂၩဒ့ၭနီၪ မိလ့ၩနုၬဘၪလၧမူၭခိၪအဘၩ့မုးဖၧၩ့ကိၭဒ့ၭအ့ၬႉ ထီးဒၪၦလၧအမၩ ဘဲၫဖါယွၩအၥၭအီၪဝ့ၫအၥိၭနီၪလီၫႉ

ယွၩကိၭပၧၩကိၭဂၩဒ့ၭႇ ဘဲၫၥိၭပကထိးပၥၭ လၧအဂးႇ ပကလီၩလၩ့လၬလၩ့ ဆၧၥၭထိၬအပရၧၫ့အဂးလီၫႉ ပဝ့ၫဒၪလဖၪယီၩႇ ဘဲၫယ့ၫၡူၬအၥိၭႇ ပစီၩ့ပမၩ့ဎိၩဎိၩဒိၪဒိၪ လအီၪဘၪလါနၫ့ဂ့ၩႇ အ့ၪပခိၭနၪယွၩအလူႇ အ့ၪပမၩဘဲၫယွၩအၪ့မၧၫ့ပၧၩစွါဘိၩႇ ဆၧထိးၥၭလဖၪႇ ပဆၧလီၩလၩ့လၬလၩ့လဖၪနီၪ ပမၩခိးမၩတၩႇ ပဖ့ၪဂဲးဖ့ၪဘၭ ၦလၧအခိၭနၪဝ့ၫလဖၪနီၪလီၫႉ

ယွၩတဲၩ့လၩ့ဆၧထီးလူၬ ခၫ့ဖျီၫ့လၧအလူအထၫလီၫႉ ယ့ၫၡူၬနီၪ မွဲဝ့ၫယွၩအလူအထၫႇ လၧၫ့ဎွ့ၩလၧအစီၩ့အမၩ့လီၫႉ

ထၧၫ့ဖုဝဲမုၪခွၫၥံၪဧ့ႇ ယွၩအလူအထၫနီၪ လၧၫ့ဎွ့ၩဝ့ၫအစီၩ့အမၩ့လီၫႉ အ့ၪပဒိၭနဲၩ့ပၥၭ လၧယွၩအလူအထၫ လၧဆူနဲၩအဂုးခၧၫ့ဖၧၩ့စွါဘိၩ မုၪခီၩလဲးနီၪ မၩဂၭဂီၩ့ပၧၩႇ မၩနၧၩ့မၪစၪပၧၩန့အ့ၬႉ

ဆၧနီၪအကၠီၩ့ ပအီၪၥၭမၧၫ့လၧ ဂၪ့ခိၪချိၫ့ယီၩအထီႇ ပကဘၪခိၭနၪ ယွၩအဆၧမၪလူၬႇ ပကဘၪထီးန့ဖံၭထၬယွၩအလူအထၫလဖၪလီၫႉ