ဆၧမၧၫ့အလူ.

လၧအၥၫ့လၧအခၪ့ထံၭနီၪ ဆၧအလူအီၪဝ့ၫလီၫ. ဆၧအလူနီၪ အီၪဝ့ၫလၧယွၩအၥိၭတၭႇ ဆၧအလူနီၪမွဲယွၩလီၫ.- အဝ့ၫဒၪအီၪဝ့ၫလၧယွၩအၥိၭ လၧအၥၫ့လၧအခၪ့ထံၭလီၫ.- ကယဲဆၧအီၪထီးအလူၬအဆံၫ့ယီၩႇ ကဲၪထၪ့လၧအစူၪဖၧၩ့တၭႇ ဆၧလၧအဘၪဆၧမၩကဲၪထၪ့ယူၭနီၪ လကဲၪထၪ့ဘၪဝ့ၫ လၧအဝ့ၫဒၪအစူၪဖၧၩ့ အီၪနးမံၩ့အ့ၬ.- ဆၧမၧၫ့အီၪဝ့ၫလၧအဖၧၩ့နီၪႇ ဒဲဆၧမၧၫ့နီၪ မွဲၦၡၩအဆၧဖၩ့လီၫ.- ဆၧအဖၩ့နီၪဖၩ့ ထၪ့လၧဆၧခံၭကျၩတၭႇ ဆၧခံၭနီၪထိးဆၧၫ့ဝ့ၫဒၪအ့ၬ.
ၦၡၩလၧယွၩအၪ့မၧၫ့လၩ့ဝ့ၫနီၪ အီၪလဂၩတၭႇ အမံၩ့မွဲစယီဟၫ့လီၫ.- အဝ့ၫလဂၩနီၪ ဂဲၫဝ့ၫလၧဆၧမိထိးအၥၭအဂးႇ ဘဲၫၥိၭအမိထိးအၥၭ လၧဆၧဖၩ့အဂဲးအကၠီၪ့နီၪႇ ဘဲၫၥိၭၦၡၩကိၭဂၩဒ့ၭ မိနဲၩလၧအကၠီၩ့လီၫ.- အဝ့ၫဒၪမွဲဆၧအဖၩ့နီၪအ့ၬ. ဂဲၫဝ့ၫဘဲၫၥိၭအမိထိးအၥၭ လၧဆၧဖၩ့အဂဲးအကၠီၪ့နီၪလီၫ.- ဆၧအဖၩ့ လၩ့ထံးလၩ့ဆ့ၭနီၪ မွဲဆၧလၧအဒုၭဖၩ့ထၪ့ ကယဲၦၡၩလၧအဂဲၫနုၬထၪ့ လၧဂၪ့ခိၪချိၫ့ယီၩ ကိၭဂၩဒ့ၭလီၫ.- အဝ့ၫနီၪအီၪဝ့ၫလၧဂၪ့ခိၪချိၫ့ယီၩတၭႇ ဂၪ့ခိၪယီၩ ကဲၪထၪ့လၧအစူၪဖၧၩ့ လါနၫ့ဘိၩႇ ဂၪ့ခိၪယီၩၥ့ၪယၫအဝ့ၫဒၪအ့ၬ.- အဝ့ၫဒၪနီၪ ဂဲၫလၩ့လၧအလးဒၪဝ့ၫတၭႇ အခ့ၫအၡၩဒၪဝ့ၫထိးဆၧၫ့ဝ့ၫအ့ၬ.- ထီးဒၪၦလၧအထိးဆၧၫ့ဝ့ၫႇ ဒဲနဲၩထဲၩ့အမံၩ့လဖၪနီၪ မွဲအဒုၭကဲၪထၪ့အဝ့ၫၥံၪ လၧယွၩအဖိၪလီၫ.- အဝ့ၫၥံၪ အီၪဖျဲၪဝ့ၫလၧဆၧၥွံၪအ့ၬႇ လၧဆၧယၪအၥၭအ့ၬ, လၧၦၡၩအၥၭအ့ၬႇ အ့ၪမွဲလၧယွၩလီၫ.
ဆၧအလူနီၪ ကဲၪထၪ့လၧဆၧယၪတၭႇ အီၪလၧပကျၩယီၩႇ ပဒၪဘၪအလၩအဖၩ့ႇ ဘဲၫဖါအဖိၪခွၫလဂၩဎး အလၩအဖၩ့အၥိၭႇ လၧၫ့ဎွ့ၩဝ့ၫလၧ ဆၧအခိးအတၩ ဒဲဆၧမွဲဆၧတီၩလီၫ.
စယီဟၫ့ထိးအၥၭ လၧအဂဲးအကၠီၪ့နီၪႇ ကိၭၡၭထၪ့ဆၧစံၭဝ့ၫဒၪႇ ၦလဂၩယီၩမွဲၦလၧအစံၭယူၭႇ ၦမိဂဲၫလၧယလးခဲၫ့လဂၩနီၪဒိၪနဲၪ့ယၧၩႇ အဂဲးဘဲၫယီၩ မွဲအအီၪဆိၫနဲၪ့ယၧၩလီၫ.- တၭပဝ့ၫဒၪထီးအလူၬယီၩ ပန့ဘၪယူၭအဝ့ၫဒၪ အဆၧလၧၫ့အဆၧဎွ့ၩလနၩ့ယူၭႇ ဒဲအခိးအတၩ လၧအခိးအတၩအဖၫ့ခိၪယူၭ.
 အဂဲးဘဲၫယီၩ ဆၧဖ့ၪလၫ့ဆၧမၪလူၬၥံၪ လၧစမိစ့ၭအစူၪဖၧၩ့နီၪႇ အ့ၪမွဲဆၧအခိးအတၩ ဒဲဆၧတီၩဆၧလီၩ့ၥံၪႇ အီၪထၪ့လၧယ့ၫၡုၬဎရံၬအကၠီၩ့နီၪလီၫ.- ၦလ ဒၪဘၪယွၩအခိးအတၩနးဆိၭနးဂၩတၭႇ အဖိၪခွၫလဂၩဎးအီၪ လၧဖါအၥၭနၫၡါအလီၩ့နီၪႇ ဒုၭနဲၪဖျီၪထၪ့ယူၭအဝ့ၫယူၭ.