ဆၧဖ့ၪလၫ့ဆၧအဎွ့ၩလၧဆၧကဲၪထၪ့အထံၩအဖျဲ

ၦခမျၧးဖၭဒိၪဖိၬထၪ့အခဲၫ့တၭ, အဝ့ၫဒၪကၠၪစိၩအၥၭ, စံၭအဝ့ၫၥံၪ,- ၦလဂၩဂၩအ့ၪဂဲၫထဲၩ့လၧယအီၪတၭ, လၥၭဂဲၫ့ဘၪအမိ,ဒဲအဖါ,ဒဲအဖိၪအမၫ,ဒဲအဖိၪအလံၩ, ဒဲအထၧၫ့ဖုဝဲမုၪ,ဒဲအထၧၫ့ဖုဝဲခွၫ, ဒဲအၥုၪ့အၥၭဒၪဝ့ၫဆ့တၭ, ကဲၪထၪ့ယထံၩယဖျဲၥ့ၪအ့ၬ. ၦလၧအလယိၭဘၪအထုၪ့စူၪယၫတၭး လဖိၬဘၪယခဲၫ့နီၪ, ကဲၪထၪ့ယထံၩယဖျဲၥ့ၪအ့ၬ.-

 အဂဲးဘဲၫယီၩ ၦလၧနၥံၪအကျၩ မိမၩထၪ့ဂံၪ့ဖၭဒိၪတၭ, အဆၧမိလၧၫ့လလၧၫ့ဘၪနီၪ, အ့ၪလဆၧၫ့နၩ့တွၭယိဆိၫဒၪခလူၬဝ့ၫ မွဲပလၫလဂၩလဲၪ.- အ့ၪလမွဲဘၪဘဲၫနီၪ, မၩထၪ့အခၪ့ထံၭတၭ, မၩဝ့ၫထီးအဂီၩ့လၥ့ၪဘၪနီၪ, ၦဒၪဘၪဆၧလဖၪကိၭဂၩဒ့ၭ မိဒုၪဒွ့ၪဘၪခိၬအဝ့ၫတၭ, မိစံၭဝ့ၫ,- ၦလဂၩယီၩ, မၩထၪ့ဂံၪ့အခၪ့ထံၭတၭ, မၩဝ့ၫထီးအဂီၩ့ၥ့ၪအ့ၬ. စဎွၩလဂၩမိလ့ၩဒုၭစဎွၩအဂူၫဂၩလဂၩတၭ, လၧၦလလၬနီၪ, မွဲအမၩနၧၩ့မၩစၪ ၦဂဲၫထၪ့ထၫ့ဒုၪဒၩဝ့ၫ လၧၦနံၫလၬမိၥ့ၪဧၪ, လၥ့ၪဘၪလဲၪနီၪ, လဆၧၫ့နၩ့ ဆီၫ့မီၪ့ဆိၫဘၪဝ့ၫတၭ, မွဲပလၫလဂၩလဲၪ.- အ့ၪလၥ့ၪဘၪတၭ, အဝ့ၫလဂၩအီၪယဲၩ့ဒံၭအဘိၩ့ဘၭနီၪ, မိအၪ့မၧၫ့လၩ့ၦၥၭၡါတၭ, အၪ့ကံၩ့မၩဘၪလိၬထဲၩ့ဆၧလီၫ. ဘဲၫနီၪအၥိၭ ၦလဂၩဂၩလၧနၥံၪအကျၩယီၩ, အ့ၪလခွံၬၡိၭခွံၬဘၪ အဆၧထီးအလူၬတၭ, ကဲၪထၪ့ယထံၩယဖျဲၥ့ၪအ့ၬ.