ဆၧဂဲထုၪ့မၧၫ့ထၪ့ထဲၩ့

လၧနွ့ၫနံၩအထးဖၧၩ့မုခၪ့ထံၭဂီၩဂီၩလ့ၬနီၪ, အဝ့ၫၥံၪဒဲၦဂူၫဂၩလနၩ့နၩ့ လ့ၩဆိၬဆၧနၧၫ့မၧၫ့ လၧအ တဲၩ့ဝဲၩဝ့ၫထီၩ့လၧဆၧၥွၪခိၪအအီၪနီၪလီၫ.- ဒၪဘၪဝ့ၫလၧလိးလဖျိၪ့ ချံးခွံၬယူၭအၥၭ လၧဆၧၥွၪခိၪအလးယူၭ.- အဝ့ၫၥံၪလ့ၩနုၬဝ့ၫတၭ, ဒၪလၧၩ့ကဆါယ့ၫၡုၬအစွၪဆ့အ့ၬ.- ဆၧမၩအၥၭလၧအၥၭဘံၪဘူၪဝ့ၫ လၧဆၧနီၪအဂဲးတၭ, ယိခွါ, ၦနံၫဂၩဆၧၫ့ထုၪ့ဝ့ၫလၧအနဲၩ့ထံၭတၭ, ၥိၭအကီၩ့အၥိၭဂိးၡ့ၭဂိးၡီၫလီၫ.-

ၦလဖၪနီၪ,ဘၪဆၧၥၭမဲၪၥၭဖျဲၩ့တၭ, ၡီၫ့လၩ့အခိၪ ထီၩ့လၩ့လၧဂၪ့ခိၪတၭ, အဝ့ၫၥံၪစံၭ ၦလဖၪနီၪ, လၧၦၥံၫ အကျၩယီၩ, မွဲဘၪနီၫနၥံၪအၪ့ဎၬ ၦအမၧၫ့နီၪလဲၪ. အီၪလၧၩ့ထီးယီၩအ့ၬ. ဂဲထုၪ့ထဲၩ့ယူၭဝ့ၫယူၭ. လၧ အအီၪလၧဂၫလလံၫအဘိၩ့ဘၭတၭ, လီၩဘၪနၥံၪ ဘဲၫအံၩဘဲၫအိၩနီၪ, နၪ့ထၪ့ထဲၩ့ဆံၭ.- စံၭဝ့ၫ, ၦၡၩအ ဖိၪခွၫယီၩ မိဘၪဆၧဖ့ၪလၫ့ခွံၬဝ့ၫ လၧၦဆၧဒဲၩဘၭဖိၪအစူၪဖၧၩ့တၭ, မိဘၪဆၧဖျၩထၪ့ဝ့ၫလၧ ထုၪ့စူၪယၫအလီၩ့နီၪ, လၧၥၧၫ့နံၩလနံၩအဖၧၩ့တၭ, မိဂဲထုၪ့ထဲၩ့ ဝ့ၫလီၫ.

အဝ့ၫၥံၪနၪ့ထၪ့ထဲၩ့အဆၧချဲၩ့နီၪ,- စဲၪ့ဒၪခွံၬဆၧၥွၪခိၪထဲၩ့ထဲၩ့ဝ့ၫတၭ, လီၩဘၪၦဆံၫလဂၩ ဒဲၦဂူၫဂၩၥံၪကိၭဂၩဒ့ၭ လၧဆၧမၩအၥၭထီးအလူၬလီၫ. ၦမၭဂဒၫလံနံၫဖိၪနးမၫရံၫ ဒဲနးယိၫအၪ့နၫ, ဒဲစယ့မံၭအမိနးမၫရံၫ ဒဲၦဂူၫဂၩ လၧအအီၪလၧအၥိၭလဖၪနီၪ, မွဲၦလၧအလီၩဘၪ ၦဆၧအၪ့မၧၫ့ဖိၪလဖၪ လၧဆၧမၩအၥၭနီၪလီၫ.- အဆၧချဲၩ့နီၪဖျီၪထၪ့လၧအဝ့ၫၥံၪအမ့ၬယၫ ဘဲၫဆၧချဲၩ့ပျီၩပျီၩနီၪနဲၩဝ့ၫအ့ၬ.- မွဲလါနၫ့ဘိၩ စပံတၧၫဂဲထုၪ့တၭ, လ့ၩစဲၪ့လၧဆၧၥွၪခိၪအအီၪနီၪ, ၡီၫ့လၩ့အခိၪယိနုၬဝ့ၫတၭ, ဒၪန့ဆၧဘွၩဖျ့ၫလံၬကံၭ အီၪလၩ့ထးတၭ, အၥၭထီၫမံၫထီၫမၪ လၧဆၧမၩအၥၭအကၠီၩ့နီၪထဲၩ့ထဲၩ့ဝ့ၫလီၫ.