ဆၧချဲၩ့ဒီၩ့လၩ့,ၦမုၪမဲၪဒဲၦစ့ၩရၫ့ခွး.

ဘဲၫၥိၭၦၡၩမိဘၩဆိၪဖၪဆၧ လထံၪဎးဘီၩ့ဎးတၭႇ ထီးအီၪက့ၪလၩ့ဆါ အၥၭလဂ့ၩနီၪႇ မွဲအလီၩထဲၩ့အဝ့ၫၥံၪ လၧဆၧချဲၩ့ဒီၩ့လထံၪယီၩ- ၦစ့ၩရၫ့ခွး လၧအလၥၭမဲၪဘၪယွၩ ဒဲလယူၭလယၪ့ဘၪၦၡၩအီၪ လၧဒိၩ့လဖျိၪ့အဖၧၩ့လဂၩလီၫ.-

ၦမုၪမဲၪအီၪလၧဒိၩ့နီၪအဖၧၩ့လဂၩတၭႇ လ့ၩလၧအအီၪစံၭဝ့ၫႇ စ့ၩရၫ့တီၩန့ယၧၩ လၧယဒုၪယဒၩဆံၭ.- အဝ့ၫဒၪလစ့ၩရၫ့ဘၪနီၪ အီၪဝ့ၫလယံၬလမီဘၪတၭး လၧခဲၫ့ထဲၩ့စံၭလၩ့အၥၭႇ ယဝ့ၫဒၪယီၩႇ ယလၥၭမဲၪဘၪယွၩႇ ယလယူၭလယၪ့ဘၪ ၦၡၩလါနၫ့ဘိၩ- မွဲလၧၦမုၪမဲၪလဂၩ မၩထံၬထၬယၧၩအကၠီၩ့တၭႇ ယမိစ့ၩရၫ့တီၩန့အဝ့ၫ ဘဲၫၥိၭအထီး မၩပွံၭယၥၭ လၧအဆၧဂဲၫ ကိၭအဆၧၫ့အထီဒ့ၭ အကၠီၩ့နီၪလဂ့ၩလီၫ.

ကဆါစံၭဝ့ၫႇ ၦစ့ၩရၫ့ခွးလၧအလတီၩဘၪလဂၩ စံၭဆၧနီၪ ခိၭနၪနၥံၪဝ့ၫဆံၭ- ယွၩအီၪလါနၫ့ယံၬယံၬနီၪ မိစ့ၩရၫ့တီၩန့အခ့ၫအၡၩ လၧအရွံန့ဝ့ၫလၧအကိၭထၪ့အဝ့ၫ လၧမုနၩနၩလၧမုဆၫဆၫနီၪ မွဲအ့ၬဧၪ.- ယစံၭနၥံၪလၧအမိစ့ၩရၫ့တီၩန့အဝ့ၫၥံၪချဲၫ့ချဲၫ့လီၫ. မွဲလါနၫ့ဘိၩ ထီးၦၡၩအဖိၪခွၫယီၩဂဲၫလၩ့တၭႇ မွဲအမိဒၪ န့ဆၧနဲၩလၧဂၪ့ခိၪချိၫ့ဆ့ဧၪ.