ဆၧချဲၩ့ဒီၩ့လၩ့ဘၪဆဲၫ့ဆၧအၪ့အမူၭဖၭဒိၪ.

ၦအီၪလၧၦဆၧၫ့နၩ့ဒံၩ့ခံၫ့ဎုၬ လၧစပွဲထံၭအကျၩလဂၩ နါဂၧၫ့ဆၧလဖၪနီၪ စံၭအဝ့ၫဒၪ ၦလၧအမိအၪ့ဘၪဆၧ လၧယွၩအဘၩ့အမုးအဖၧၩ့နီၪ အီၪမုၬဝ့ၫဒၪလီၫ.- အဝ့ၫဒၪစံၭဝ့ၫႇ ၦလဂၩမၩဆၧအၪ့ဖၭဒိၪ လၧဂၪလခီၫတၭ ကိၭၦအၪဂၩလီၫ.- ထီးအၪ့ဆၧအနၩရံၩဘၪနီၪ မွဲအအၪ့မၧၫ့အဎီးအၡၩ လ့ၩလၧၦဘၪ ဆၧကိၭဝဲၩဝ့ၫလဖၪအအီၪနီၪ စံၭအဝ့ၫၥံၪႇ ဂဲၫဘီၪး အဂဲးဘဲၫယီၩ ဆၧထီးအလူၬ အီၪတဲၩ့ဝဲၩယူၭအၥၭယူၭ.

 ၦလဖၪနီၪ ကိၭဂၩဒ့ၭ လၧအၥၭလဖျိၪ့ဎးနီၪ ချဲၩ့ဖီၩ့ဖျ့ၭလၩ့အၥၭလီၫ. အဝံခိၪလဂၩ စံၭအဝ့ၫဒၪႇ ယဝ့ၫဒၪယီၩ ယဎွ့ၩယူၭဂၪ့ခိၪလဝၩ့ယူၭ ယမိလ့ၩယိဝ့ၫလီၫ. ယအၪ့ကံၩ့အၪ့ယၫနၧၩ ကွဲၪဖျါလါယၧၩဘီၪ.

အဝ့ၫလဂၩဒၪစံၭဝ့ၫႇ ယဝ့ၫဒၪယီၩ ယဎွ့ၩယူၭချီဖၫယဲခိၪယူၭ ယဘၪလ့ၩမၩခွါ အဝ့ၫၥံၪလီၫ. ယအၪ့ကံၩ့အၪ့ယၫနၧၩ ကွဲၪဖျါလါယၧၩဘီၪ.-

အလဂၩဒၪနီၪ စံၭဝ့ၫႇ ယဝ့ၫဒၪယီၩ ယန့မၫယူၭး မၩအၥၭဘဲၫနီၪတၭ ယလ့ၩၥ့ၪအ့ၬ.

အဎီးအၡၩနီၪ ဂဲၫထဲၩ့လၧ အကဆါအအီၪတၭ လီၩထဲၩ့ဆၧနီၪလဖၪလီၫ. ထီးနီၪလဖၧၫ့ ဂံၪ့ကဆါအၥၭခိထၪ့တၭ စံၭအဎီးအၡၩႇ လ့ၩချဲၫ့ချဲၫ့လၧဖၧၩ့ၥၭဖၭဒိၪ ဒဲဖၧၩ့ၥၭဖိၪလၧဒိၩ့ဖၧၩ့တၭ ၦအၡၪ့ ဒဲၦအဂၩ့ဂၭဂီၩ့ ဒဲၦအခၪ့ဂၭဂီၩ့ ဒဲၦအမ့ၬဘျီၪၥံၪနီၪ ဂဲၫမီၩ့နုၬထီးယီၩဘီၪ.- ဆၧအဎီးအၡၩစံၭဝ့ၫႇ ကဆါဧႇ ဘဲၫနမၪလူၬဆၧအၥိၭနီၪ ဆၧမၩယူၭအၥၭယူၭတၭ အလးအီၪဒံၭလီၫ.- ကဆါလီၩဘၪအဎီးအၡၩႇ လ့ၩထၪ့လၧဖၧၩ့မု ဒဲဖၧၩ့ၥၭၥံၪတၭႇ ဒုၭဂဲၫနုၬဆီၪ့ဝ့ၫ ဘဲၫၥိၭယဂံၪ့မိဎွ့ၩထၪ့ဘီၪ.- အဂဲးဘဲၫယီၩ ယလီၩဘၪနၥံၪ ၦလၧအဘၪဆၧကိၭဝဲၩယူၭလဖၪနီၪ မိထဲးယိဘၪဆၧအၪ့နးဂၩအ့ၬ.