ဆၧကွဲၪဖျါအဂဲး

ထီးနီၪလဖၧၫ့ စပံတၧၫဂဲၫလၧအအီၪတၭႇ စံၭဝ့ၫဒၪႇ ကဆါဧ့ႇ ယထၧၫ့ဖုဝဲအ့ၪမၩမၪဘၪယၧၩတၭႇ ယဘၪကွဲၪဖျါအဆၧနီၪဎွ့ဖၧၫ့လဲၪး ထီးအဎွ့ၩထၪ့နွ့ၫဖၧၫ့ဧၪ.- 
ယ့ၫရှူၬစံၭဝ့ၫႇ ယစံၭထီးအဎွ့ၩထၪ့နွ့ၫဖၧၫ့လကၭလၧၩ့ မွဲထီးအဎွ့ၩထၪ့နွ့ၫဖၧၫ့အဖၧၫ့နွ့ၫဆံၫလီၫ.
အခိးမွဲဘဲၫနီၪတၭႇ မူၭခိၪအဘၩ့အမုးမၩအၥၭ ဘဲၫစဎွၩလဂၩ လၧအၥၭအီၪလၧအမိမၩန့ဘၪအၥၭ လၧအဎီးအၡၩၥံၪအဆရၫ့လီၫ.- မၩန့အဆရၫ့အဘိၩ့ဘၭနီၪတၭႇ ၦဂဲၫၥိၫ့ၦလၧအဒ့ၪအမါအီၪဝ့ၫ လၧစ့ၩ အတၫလၫ့လလၬ [အဘၭလံဘၩ့ဘျဲၪ] လဂၩ လၧအအီၪလီၫ.- 
မွဲအဆၧလအီၪဘၪ လၧအမိလိၭထဲၩ့ဝ့ၫအကၠီၩ့တၭႇ အကဆါမၪလူၬလၧ အမိဘၪဆၧအၪ့ဆၫခွံၬဝ့ၫႇ ဒဲအဖိၪအမၫႇ အဖိၪအလံၩႇ ဒဲကယဲဆၧအီၪထီးအလူၬႇ ကိၭအမံၩ့ဒ့ၭတၭႇ ဘၪလိၭထဲၩ့ဝ့ၫလီၫ.
 မၩအၥၭဘဲၫနီၪတၭႇ အဎီးအၡၩထွံၩလၩ့လၧအမ့ၬယၫႇ စံၭဝ့ၫဒၪႇ ကဆါဧ့ႇ အွံၪၥၭဆၧၩ့ဒၪခလူၬယၧၩဆံၭ. ယမိလိၭထဲၩ့နၧၩထီးအလူၬလီၫ.- အဎီးအၡၩနီၪ အကဆါလဂၩ အၥၭလၩ့ဝ့ၫ ကွဲၪဖျါထဲၩ့ဝ့ၫဒၪတၭႇ ဆၧၫ့လၩ့ထူၬခွံၬဝ့ၫ အဒ့ၪအမါနီၪလီၫ.- 
ဆၧလၧအဎီးအၡၩလဂၩနီၪႇ စဲၪ့ထၪ့ခွံၬဝ့ၫဒၪတၭႇ ဒၪန့ဎီးအၡၩခီၫဎီးအၡၩလဂၩ လၧအဒ့ၪအမါအီၪဝ့ၫ လၧအစူၪဖၧၩ့စ့ၩဒန့ရံၫလယၩ[အဘၭနံၫဆံၫဘျဲၪ]တၭႇ ဖျဲးစိၩ ဆီးထၬဝ့ၫဒၪအခိၬတၭႇ စံၭဝ့ၫႇ နဒ့ၪနမါအီၪလၧယၧၩနီၪ ဖ့ၪထဲၩ့ယၧၩဆံၭ.- မၩအၥၭဘဲၫနီၪတၭႇ ဎီးအၡၩခီၫဎီးအၡၩလဂၩ ထွံၩလၩ့လၧအခၪ့ထံၭတၭႇ အၪ့ ကံၩ့အၪ့ယၫထၪ့ဝ့ၫႇ စံၭဝ့ၫဒၪႇ အွံၪၥၭဆၧၩ့ဒၪခလူၬယၧၩဆံၭး ယမိလိၭထဲၩ့နၧၩလီၫ.- မွဲလါနၫ့ဘိၩႇ အဝ့ၫဒၪလခိၭနၪဘၪတၭႇ လ့ၩခွံၬလၩ့ဝ့ၫလၧထီၫ့ဖၧၩ့ ထီးအမိလိၭထဲၩ့အဒ့ၪအမါလီၫ.- 
အဎီးအၡၩခီၫဎီးအၡၩၥံၪ ဒၪဘၪဆၧမၩအၥၭနီၪႇ အၥုၪ့အုၭအၥၭအုၭဒိၪမၬတၭႇ လ့ၩလီၩဘၪအကဆါ လၧဆၧမၩအၥၭထီးအလူၬလီၫ.- ထီးနီၪလဖၧၫ့ အကဆါကိၭထဲၩ့အဝ့ၫတၭႇ စံၭဝ့ၫဒၪႇ ဎီးအၡၩအၧၩ့လဂၩဧ့ႇ မွဲနအၪ့ ကံၩ့ထဲၩ့နၥၭလၧယၧၩတၭႇ ယဆၧၫ့လၩ့ထူၬခွံၬမၬနဒ့ၪနမါထီးအလူၬကၨ.- ဘဲၫယယၫ့ၥၭနၧၩအၥိၭနီၪႇ နကြၨၭယၫ့ၥၭဎီးအၡၩခီၫဎီးအၡၩလၧနၧၩ ဘဲၫနီၪအၥိၭႇ မွဲအ့ၬဧၪ.- 
အကဆါအၥၭထၪ့ႇ ဖ့ၪလၫ့ခွံၬဝ့ၫ လၧၦမၩၡၪ့မၩနၭဆၧအစူၪဖၧၩ့ ထီးအမိလိၭထဲၩ့ အဒ့ၪအမါထီးအလူၬလီၫ.- နၥံၪအ့ၪလကွဲၪဖျါဘၪ နၥံၪအထၧၫ့ဖုဝဲအဆၧမၪ လၧနၥံၪအၥၭဖၧၩ့ဆုၬဆုၬတၭႇ ယဖါအီၪလၧမူၭခိၪနီၪ မိမၩနၥံၪဘဲၫနီၪအၥိၭဆ့လီၫ.