ဆၧကဲၪဒိၪလၧမူၭခိၪ

ၥိၪလဒီၪ့အဆံၭဧ့, ထီးၥၭမဲၪလဂ့ၩ, အဂဲးဘဲၫယီၩ မွဲအဘၪနၥံၪအဖါအၥၭလၧ အမိဖ့ၪလၫ့နၥံၪအဘၩ့အ မုးအီၪနီၪလီၫ.- နၥံၪအစူၪလးအခၪ့ခိၪနီၪ, အၪ့ဆၫခွံၬတၭ, ဖ့ၪလၫ့ယၫ့ၥၭဆၧဆံၭ. ထိၪ့လၧအလလး လံၩဘၪဝ့ၫနီၪမၩထဲၩ့လၧနၥံၪအဂးဒၪနၥံၪဝ့ၫ, ဘဲၫ ၦစံၭဆၧအၥိၭ, ဆၧလူဒိၪဎွ့ၩဒိၪလၧအလူၬလၥ့ၪဘၪ လၧမူၭခိၪဖၧၩ့, ထီးအလးလၧဆၧအၪ့ဂူၪ လၥုၭဘူၭဘၪအၥၭ, ဒဲဆၧအဎါလအၪ့ဂီၩ့ဘၪနီၪဘီၪ.- အဂဲးဘဲၫယီၩ ထီးဒၪအလးလၧနၥံၪ အစူၪလးခၪ့ခိၪအီၪဝ့ၫ လစီၪ့စီၪ့နီၪ, နၥံၪအၥၭမိအီၪဝ့ၫထီးနီၪဆ့လီၫ.

ခဲးထူၬနၥံၪအယးဒံၩ့တၭ, အီၪလၧနၥံၪအမ့ၪဒိၩ့ခဲၩဖၩ့ထၪ့ဘီၪ.- အီၪနၥံၪဝ့ၫဘဲၫၦလၧအယိလါအ ကဆါအဖၧၩ့ၥၭအၥိၭနီၪဘီၪး ထီးအဝ့ၫဒၪလ့ၩလၧမူၭဖၧၩ့ ဂဲၫထဲၩ့ဒိၪထိၬဆၧနီၪ, ဘဲၫၥိၭအဝ့ၫၥံၪမိဝဲထၪ့ န့အဂးချဲၫ့မၬလီၫ.- အဎီးအၡၩလဖၪလၧအကဆါဂဲၫထဲၩ့ဒၪဘၪအအီၪခိၭဝ့ၫလဖၪနီၪ, အီၪမုၬဝ့ၫဒၪလီၫ. ယလီၩဘၪနၥံၪတီၩတီၩ လၧအကဆါမိခဲးထူၬအယး ဒံၩ့ဒၪဝ့ၫတၭ, မိအၪ့မၧၫ့အဝ့ၫဒၪဆၧၫ့နၩ့ဝ့ၫတၭ, မိဂဲၫ မၩအဝ့ၫၥံၪလၧအဎီးအၡၩအဆၧမၩလီၫ.- ၦခိၭဆၧနံၫဆၫ့လဆၫ့မွဲဂ့ၩ, ၥၧၫ့ဆၫ့လဆၫ့မွဲဂ့ၩ,အကဆါအ့ၪ ဂဲၫထဲၩ့ဒၪဘၪဆၧမၩအၥၭဘဲၫနီၪတၭ, အဎီးအၡၩလဖၪနီၪ,အီၪမုၬဝ့ၫဒၪလီၫ.- နၥံၪၥ့ၪယၫလၧဂံၪ့ကဆါ အ့ၪၥ့ၪယၫဆၧအဆၧၫ့အထီ လၧဆၧဂူၪဆၧဘျၪမိဂဲၫဝ့ၫတၭ, ဘဲၫၥိၭအဆၧထီးဘုၪ့ဖိးဘၪအဂံၪ့လဂ့ၩ တၭ, မိအီၪခိၭဝ့ၫလီၫ.- မၩအၥၭဘဲၫနီၪတၭ, အီၪတဲၩ့ဝဲၩနၥံၪအၥၭဆ့ဆံၭ. အဂဲးဘဲၫယီၩၦၡၩအဖိၪခွၫယီၩ,မိဂဲၫဝ့ၫ လၧအဆၧၫ့အထီ လၧနၥံၪလဆီၫ့မီၪ့ဘၪနၥံၪဝ့ၫလီၫ.

စပံတၧၫစံၭအဝ့ၫ, ကဆါဧ့,ဆၧချဲၩ့အဒီၩ့ယီၩ, နလီၩဘၪန့ၫပၧၩယီၩမွဲနလီၩဘၪဆ့ၦထီးအလူၬလဲၪ.- ကဆါစံၭဝ့ၫ, အဎီးအၡၩလၧအလူတီၩ,ဒဲအကိၪ့ၥ့ၪလၧ အကဆါမိအီၪက့ၪလၩ့ဝ့ၫ လၧအဒိၪဘဲၫၥိၭအမိဒုၭ အၪ့ၦဂံၪ့ဖိၪထီးမုဘၪနီၪ,မွဲပလၫလဂၩလဲၪ.- အဎီးအၡၩလၧအကဆါဂဲၫထဲၩ့ဒၪဘၪလၧ အမၩဝ့ၫဘဲၫနီၪ အီၪမုၬဝ့ၫဒၪလီၫ.- ယလီၩဘၪနၥံၪလၩ့ထံးလၩ့ဆ့ၭ လၧအမိဒုၭကဲၪထၪ့အဝ့ၫဒၪ လၧအဆၧဖိၪဆၧလံၩ ထီးအလူၬအခိၪလီၫ.

မွဲလါနၫ့တၭ အဎီးအၡၩအ့ၪစံၭဝ့ၫလၧအၥၭ, ယကဆါမၩယံၬမၩနးအၥၭတၭ, ထးအဎီးအၡၩအမုၪ, ဒဲအဎီးအၡၩခွၫလဖၪတၭ, အၪ့ဆၧအီၩဆၧဒဲအီၩမၧၩ့အၥၭနီၪ,- ထီးမုနံၩမုနၩ လၧအလယိလါဘၪဝ့ၫအဖၧၩ့ၥၭ, ဒဲနၩရံၩလၧအလၥ့ၪယၫဘၪဝ့ၫနီၪ အကဆါမိဂဲၫထဲၩ့ဒၪ့ထ့ၬ အဝ့ၫနံၫကုၭတၭ, မိခွံၬလၩ့ခွံၬဝ့ၫ လၧၦလဆူလနဲၩဘၪ ဆၧအၥိၭနီၪလီၫ.

အဎီးအၡၩလၧအၥ့ၪယၫ, အကဆါအၥၭနီၪ, လတဲၩ့ဝဲၩဘၪအၥၭတၭ, လမၩဘၪဝ့ၫထီးအကဆါအၥၭနီၪ, မိဘၪဆၧထးဝ့ၫအၪထံၪလီၫ.- အ့ၪမွဲၦလၧအလၥ့ၪယၫဘၪတၭ, မၩဝ့ၫထီးအကြၨၭဘၪထးနီၪ မိဘၪထးဝ့ၫၡၩခိၬထံၪလီၫ. ကယဲၦလၧအန့ဘၪဆၧအၪလဂၩလါလါနီၪ, ဆၧမိအၪ့ကံၩ့န့ထဲၩ့ဆၧလၧအ အၪလၧအဝ့ၫနီၪလီၫ. ၦလၧဆၧဖ့ၪလၫ့ဝ့ၫလၧ အစူၪဖၧၩ့အၪနီၪ, ဆၧမိအၪ့ကံၩ့န့ထဲၩ့အၪဒံၭလၧအဝ့ၫနီၪဆ့လီၫ.