စလၭဇရၧၭၥံၫအဂဲး

...မၩအၥၭဘဲၫနီၪတၭ, ထီးနးမၫရံၫလ့ၩထီၩ့ဝ့ၫ ထီးယ့ၫၡုၬအအီၪနီၪ, ဒၪဘၪဝ့ၫတၭ, ထိၪလၩ့ထံၩဖါအၥၭလၧအခၪ့ထံၭနီၪ, စံၭဝ့ၫဒၪ, ကဆါဧ့, နအ့ၪအီၪထီးယီၩ ယထၧၫ့ဖုဝဲခွၫၥံၫဘၪဝ့ၫအ့ၬ.- မၩအၥၭဘဲၫနီၪတၭ,ယ့ၫၡုၬဒၪဘၪဝ့ၫလၧအဂၪ့ဆၧနီၪ, ဒဲၦယုဒၫဖိၪလၧအဂဲၫလၧအၥိၭ ဂၪ့ဝ့ၫဆ့တၭ, အဝ့ၫဒၪဂၪ့အုၩလၧအၥၭခံဖၧၩ့တၭ, အၥၭခိထၪ့ဝ့ၫ,- တၭစံၭဝ့ၫ, မွဲနၥံၪအီၪက့ၪဝ့ၫခီၫခီၫလဲၪ. အဝ့ၫၥံၪစံၭဝ့ၫ, ကဆါဧ့, ဂဲၫယိခွါ, နဝ့ၫဘီၪ.- ယ့ၫၡုၬအမ့ၬထံၫလၩ့ဝ့ၫဒၪလီၫ.- မၩအၥၭဘဲၫနီၪတၭ,ၦယုဒၫဖိၪၥံၪစံၭဝ့ၫ,ယိခွါ, မွဲအအဲၪအဝ့ၫဒၪလဂၩဆံၭဒိၪလဲၪ.- ၦလၧအဝ့ၫၥံၪအကျၩလနၩ့နၩ့စံၭဝ့ၫ, ၦလၧအမၩဒၪထၪ့ထဲၩ့ၦမ့ၬဘျီၪ ၥ့ၪဝ့ၫလဂၩယီၩ,ဘဲၫၥိၭအဝ့ၫနီၪထီးၥံၫလဂ့ၩတၭ, မွဲအမၩဝ့ၫၥ့ၪအ့ၬဧၪ. 
မၩအၥၭဘဲၫနီၪတၭ, ယ့ၫၡုၬဂၪ့အုၩလၧအၥၭခံဖၧၩ့ဒီၭတၭ, လ့ၩဝ့ၫထီၩ့လၧဆၧၥွၪခိၪအအီၪနီၪ, မွဲလိးအိၩ ဖၧၩ့နီၪဆၧချႃၬဘံၭထၬဝ့ၫလၧလိးလီၫ. ယ့ၫၡုၬစံၭဝ့ၫ,ၥုၭခွံၬလိးနီၪဘီၪ. ၦလၧအၥံၫအထၧၫ့ဖုဝဲမုၪ, နးမၫၥၫလဂၩ,စံၭအဝ့ၫ, ကဆါဧ့,ဘိၩ့နဲၪ့ယီၩမွဲအအီၪယူၭလံၥၫ့ယူၭတၭ,မိနၧၫ့အုၪဝ့ၫလီၫ. ယ့ၫၡုၬစံၭအဝ့ၫ, ယလီၩဘၪနၧၩ တီၩတီၩလီၩ့လီၩ့, နအ့ၪနဲၩဆၧတၭ, နမိဒၪဘၪယွၩအလၩအဖၩ့မွဲအ့ၬဧၪ.- မၩအၥၭဘဲၫနီၪတၭ, အဝ့ၫၥံၪၥုၭခွံၬလိးလီၫ. ယ့ၫၡုၬစၪ့ထၪ့အမ့ၬၥၪယိထၪ့ဆၧတၭ, စံၭဝ့ၫ, ဖါဧ့, ယစံၭထၪ့အၪ့အူၭနခိးနတၩ လၧနခိၭနၪယလူအကၠီၩ့လီၫ.- ယၥ့ၪယၫလၧနခိၭနၪ ယလူထံၪဎးလီၫ. မွဲလါနၫ့ဘိၩ ဘဲၫၥိၭၦခမျၧးလၧအအီၪဝၬဖီၩ့ယၧၩယီၩ မိနဲၩလၧနအၪ့မၧၫ့လၩ့န့ယၧၩတၭ, ယစံၭဆၧလၧ အဝ့ၫၥံၪအဂးလီၫ. စံၭဆၧနီၪလဖၪတၭ, ကိၭၡၭထၪ့လၧအလူဖၭဒိၪ, စလၭဇရၧၭဧ့,ဂဲထုၪ့ထၪ့ထဲၩ့ဆံၭ.- ၦလၧအၥံၫလဂၩ နီၪဂဲထုၪ့ထၪ့ထဲၩ့ဝ့ၫတၭ, အစူၪအခၪ့ဘၪဘီၪဘံၭထၬအၥၭ လၧဆၧၥွၪခိၪအဆၧကီၩ့ဆၧၥိၭနီၪ, အမ့ၬ ဘၪချႃၬဘံၭထၬအၥၭလၧပဝၫလီၫ. ယ့ၫၡုၬစံၭအဝ့ၫၥံၪ,ကွဲၪလၩ့ခွံၬတၭ, ဖျါခွံၬအဝ့ၫဆံၭ. မၩအၥၭဘဲၫနီၪတၭ, ၦယုဒၫဖိၪၥံၪ လၧအဂဲၫလၧ နးမၫရံၫအအီၪနီၪ, ဒၪဘၪယ့ၫၡုၬမၩဆၧတၭ,နဲၩထဲၩ့ဝ့ၫဒၪအၪဂၩလီၫ...