စယၫအရၧၭအဖိၪမုၪ ဒဲၦမုၪလၧအထိၭဘၪယ့ၫၡုၬအဖၬဘဲၩ့.

ထီးယ့ၫၡုၬခၫ့စိၩထဲၩ့ဒီၭလၧချံၫထီၩ့လၧဝါလခီၫတၭ,ၦခမျၧးဖၭဒိၪ ဂဲၫအီၪကိၩ့အီၪကီၪ့ လၧအအီၪတၭ,အီၪဝ့ၫလၧကွံၩနဲၩ့နီၪလီၫ.- ယိခွါ,ၦၥရိၬခိၪ အမံၩ့စယၫအရၧၭလဂၩဂဲၫဒၪဘၪဝ့ၫတၭ, ထွံၩလၩ့ဝ့ၫလၧအခၪ့ထံၭ.- အၪ့ကံၩ့အၪ့ယၫဝ့ၫဆီၪ့ဆီၪ့လ့ၬတၭ,စံၭဝ့ၫဒၪ, ယဖိၪမုၪလၧအဆံၭလဂၩမိၥံၫဖီၩၬ ဘဲၫ ၥိၭအမိဘျၪထဲၩ့ဒဲမၧၫ့ဝ့ၫနီၪ, ဂဲၫအီၪက့ၪလါနစူၪလၧအလီၩ့ဆံၭ.- အဝ့ၫဒၪလ့ၩလၧအၥိၭတၭ,ၦခမျၧးဖၭ ဒိၪလ့ၩဖိၬအခဲၫ့နီၪကထံၬကထူၬဝ့ၫလီၫ.
ၦမုၪလဂၩလၧအဆၫ အၥွံၪလၩ့ယူၭလဆံၫနံၫနံၪ့တၭ,- ဘၪဆၧနၭနၭလ့ၬလၧၥံၪ [ၥံၪ့ဎွံ] ဆရၫအၪ ဂၩအစူၪဖၧၩ့တၭ, လူၬအစူၪလးအခၪ့ခိၪထီးအလူၬတၭ, လဘျၪဘၪနီၪလကၭလၧၩ့, နၭထၪ့ကဒၩလခီၫတၭ,- ထီးအနါဂၧၫ့လၧယ့ၫၡုၬအဂဲးနီၪ ဂဲၫလၧၦခမျၧးအကျၩလၧအချိၫ့တၭ, ထိၭဘၪအကီၩ့အၥိၭလီၫ.- အဂဲးဘဲၫယီၩစံၭဝ့ၫဒၪ, ယအ့ၪထိၭဘၪန့ၫအကီၩ့အၥိၭတၭ,ယမိဘျၪထဲၩ့ယဝ့ၫလီၫ.- အၥွံၪလၩ့ နီၪထုၬဝ့ၫချဲၫ့မၬတၭ, အနၫ့ဆါၥ့ၪယၫလၧအဆၧဆၫနီၪဘျၪထဲၩ့ဝ့ၫလီၫ.- ယ့ၫၡုၬၥ့ၪယၫဒၪဝ့ၫချဲၫ့မၬလၧအစီၩ့အမၩ့စဲၪ့ထၪ့လၧအလီၩ့တၭ, ကၠၪစိၩအၥၭလၧ ၦခမျၧးအအီၪနီၪ, စံၭဝ့ၫဒၪ,မွဲပလၫထိၭဘၪယကီၩ့ယၥိၭလဂၩလဲၪ.- အထံၩအဖျဲၥံၪ စံၭဆၧၫ့ဝ့ၫ,နဒၪဘၪၦခမျၧးဘၪထံၭနၧၩတၭ, နစံၭ, မွဲပလၫထိၭဘၪယၧၩလဂၩလဲၪနီၪဆ့ဧၪ.- ဘဲၫၥိၭအမိဒၪဘၪၦလၧအမၩဆၧနီၪ ယိဆၧဝၬဝၬလီၫ.- ၦမုၪနီၪၥ့ၪယၫဝ့ၫလၧဆၧမၩအၥၭ လၧအလီၩ့တၭ, ၥၭမဲၪ ဆၧဝၭထိၬဝ့ၫတၭ, လ့ၩစိၩလၧအအီၪ, ထွံၩလၩ့ဝ့ၫတၭ, လီၩဘၪဝ့ၫလၧ ဆၧအမွဲအတီၩထီးအလူၬလီၫ.- အဝ့ၫဒၪစံၭ, ဖိၪမုၪဧ့, နနဲၩဆၧနီၪမၩဘျၪထဲၩ့ယူၭနၧၩယူၭ, ထဲၩ့မုၬမုၬတၭ, အီၪဘျၪထဲၩ့လၧနဆၧဆၫဆံၭ.
အဝ့ၫဒၪချဲၩ့ဆၧနီၪအဘိၩ့ဘၭ, ၦဂဲၫလၧၦၥရိၬခိၪ လဂၩအဂံၪ့တၭ, စံၭဝ့ၫဒၪနဖိၪမုၪၥံၫယူၭ, မွဲဘၪနီၫ လၧနမၩထံၬထၬဒံၭဆရၫလဲၪ.- ယ့ၫၡုၬနါဂၧၫ့အ လူလၧၦလီၩဘၪဝ့ၫနီၪ,စံၭၦၥရိၬခိၪလဂၩချဲၫ့မၬ,ထီးၥၭမဲၪလဂ့ၩနဲၩကဒၪဘီၪ.- အ့ၪလမွဲဘၪစပံတၧၫ, ဒဲစယ့မံၭ,ဒဲစယ့မံၭအထၧၫ့ဖုဝဲစယီဟၫ့ၥံၪ,ဒုၭဖိၬဝ့ၫအခဲၫ့နးဂၩအ့ၬ.- အဝ့ၫၥံၪလ့ၩထီၩ့လၧၦၥရိၬခိၪအ ဂံၪ့တၭ,ဒၪဘၪဆၧထုၪ့ထိၭပြူၭပြူၭ, ဒဲၦဂၪ့ဆၧယၧၩ့ဆၧၥီၫအၪအၪလ့ၬတၭ,- လ့ၩနုၬဝ့ၫတၭ,အဝ့ၫဒၪစံၭ အဝ့ၫၥံၪ, မွဲဘၪနီၫလၧနၥံၪထုၪ့ထိၭပြူၭပြူၭတၭ, နၥံၪဂၪ့ဆၧဘဲၫယီၩလဲၪ, ဖိၪၥၪမုၪယီၩၥံၫအ့ၬး မံၫဒၪအဆၧလီၫ.- အဝ့ၫၥံၪနီၪနံဘၪဒုၪဒွ့ၪအဝ့ၫလီၫ. အဝ့ၫဒၪဒုၭစဲၪ့ထၪ့ခွံၬၦထီးအလူၬတၭ,ကိၭထဲၩ့ဖိၪၥၪအမိ,ဒဲ အဖါ,ဒဲၦအီၪဝ့ၫလၧအၥိၭလဖၪတၭ, လ့ၩနုၬဝ့ၫထီးၦဖိၪၥၪမုၪအီၪဝ့ၫအလးလီၫ.- ဖီၪ့ဝ့ၫအစူၪတၭ,စံၭဝ့ၫ ဒၪ,တၫလၥကုမံၫ, ဘဲၫပစံၭဆၧအၥိၭ,ၦဖိၪၥၪမုၪဧ့, ယစံၭနၧၩ,ဂဲထုၪ့ဆံၭ.- ၦဖိၪၥၪမုၪဂဲထုၪ့စဲၪ့ဝ့ၫချဲၫ့ မၬလီၫ. အဂဲးဘဲၫယီၩအနံၪ့အီၪယူၭဝ့ၫ လဆံၫနံၫနံၪ့ လီၫ. အဝ့ၫၥံၪထီၫမံၫထီၫမၪဝ့ၫဒိၪမၬလီၫ.- အဝ့ၫဒၪ မၪလူၬအဝ့ၫၥံၪလၩ့ထံးလၩ့ဆ့ၭ ဘဲၫၥိၭၦၡၩထီးၥ့ၪယၫလၧဆၧမၩအၥၭနီၪနးဂၩလဂ့ၩ, ဒဲအၪ့မၧၫ့ၦဖ့ၪ လၫ့အအၪ့ဆၧလီၫ.