စပံတၧၫလီၩဖျီၪထၪ့ဘၪဆဲၫ့ဎရံၬအဂဲး.

ယ့ၫရှူၬလ့ၩဝ့ၫထီၩ့လၧ စ့ၭစရံအၫဖံလံၭအခးတၭ, အၪ့စၪ့အထံၩအဖျဲၥံၪ, စံၭဝ့ၫဒၪ, ၦၡၩအဖိၪခွၫယၧၩယီၩ, ၦၡၩၥံၪစံၭလၧယမွဲပလၫလဂၩလဲၪ.- အဝ့ၫၥံၪစံၭဝ့ၫဒၪ, ၦလနၩ့နၩ့စံၭဝ့ၫ, မွဲၦဘၭတံၫဇၫ့ဆၧစယီဟၫ့တၭ, အဂူၫဂၩလနၩ့နၩ့စံၭဝ့ၫ, စအံၫလဲယၫတၭ, အဂူၫဂၩလနၩ့နၩ့စံၭဝ့ၫ, စယ့ၫရမဲအၫ, အ့ၪလမွဲဘၪတၭ, မွဲမီၪလဂၩဂၩလီၫ.

အဝ့ၫဒၪစံၭဝ့ၫ, အ့ၪမွဲနၥံၪဝ့ၫဒၪယီၩ နၥံၪစံၭလၧယမွဲပလၫလဂၩလဲၪ.- စစဲမၧၫ့ပံတၧၫချဲၩ့ဆၧၫ့ဆၧ တၭ, စံၭဝ့ၫဒၪ,နဝ့ၫဒၪယီၩနမွဲဎရံၬနီၪ, ယွၩလၧအမၧၫ့ဝ့ၫလဂၩအဖိၪခွၫလီၫ.- ယ့ၫရှူၬချဲၩ့ဆၧၫ့ဆၧတၭ, စံၭဝ့ၫဒၪ, စဲမၧၫ့ဘၫယိနၫဧ့, နဘၪဆိၪဂ့ၩနဝ့ၫဒၪလီၫ. အ ဂဲးဘဲၫယီၩ ဆၧယၪဒဲဆၧၥွံၪနီၪ မၩဖျီၪထၪ့ဝ့ၫ လၧနၧၩလမွဲဘၪ, အ့ၪမွဲယဖါအီၪလၧမူၭခိၪလီၫ.-

ယဝ့ၫဒၪယီၩ, ယလီၩဘၪနၧၩလၧနမွဲပံတၧၫတၭ, ယမိအီၪက့ၪလၩ့ ယဆၧအီၪကီၪ့လၧလိးယီၩအလီၩ့တၭ, ဖျႃဖၧၩ့အတရၫ့လဖၪ မၩနၧၩ့မၩစၪဘၪဝ့ၫအ့ၬ.- ယမိဖ့ၪလၫ့နၧၩလၧမူၭခိၪအဘၩ့အမုးအနိၪဝံၬတၭ, ထီးဒၪနစၧၩ့ထၬဆၧ လၧဂၪ့ခိၪချိၫ့လမံၩ့မံၩ့ယီၩ, မိဘၪဆၧစၧၩ့ထၬဝ့ၫ လၧမူၭခိၪအဖၧၩ့တၭ, ထီးဒၪနကွဲၪလၩ့ဆၧ လၧဂၪ့ခိၪချိၫ့လမံၩ့မံၩ့ယီၩ, မိဘၪဆၧကွဲၪလၩ့ဝ့ၫလၧမူၭခိၪအဖၧၩ့လီၫ.

ထီးနီၪလဖၧၫ့အဝ့ၫဒၪမၪလူၬအထံၩအဖျဲၥံၪ ထံၫထံၫဆၭဆၭ ဘဲၫၥိၭအထီးလီၩဘၪၦၡၩလၧ အမွဲဎရံၬနီၪနးဂၩလဂ့ၩ.

လၧအခၫဘိၩ့နီၪတၭ, ယ့ၫရှူၬဒုၭနဲၪၥၫ့အထံၩအဖျဲၥံၪ လၧအဘၪလ့ၩလၧယရုစလံၫ့တၭ, မိဘၪထိး ဆၧနၭဆၧၡၪ့အၪမံၩ့ လၧၦၥုၪ့က့ၭၥၭၡါ, ဒဲလၧၦလုဆၧအဒိၪၥံၪ, ဒဲလၧၦကွ့ၭလံၬလဖၪအစူၪဖၧၩ့တၭ, မိ ဘၪဆၧမၩၥံၫဝ့ၫတၭ, ထီးဘၪၥၧၫ့နံၩလနံၩနီၪ, မိဂဲထုၪ့ထဲၩ့ဝ့ၫလီၫ.

စပံတၧၫမၩန့အဝ့ၫဒၪတၭ, အၪ့လၬဝ့ၫစံၭဝ့ၫဒၪ, ကဆါဧ့, မွဲဆၧယၫ့ၥၭလါနၧၩဆံၭ. ဆၧယီၩမွဲထီးဘၪနၧၩလဂ့ၩ.- အဝ့ၫဒၪကၠၪထဲၩ့အၥၭတၭ, စံၭစပံတၧၫ, ဒုၪဒၩဧ့, ထဲၩ့ထဲၩ့နဝ့ၫလၧယလးခဲၫ့ဆံၭ. နမွဲယဆၧလၩ့ထံၩဖါအလးလီၫ. အဂဲးဘဲၫယီၩနၥၭအီၪ လၧယွၩအဆၧအ့ၬ, မွဲလၧၦၡၩအဆၧလီၫ.