ကၠၪခွံၬလၧနၥံၪအဆၧဒဲၩဘၭဆံၭႇ အ့ၪလမွဲဘၪနၥံၪမိၥံၫလီၫႉ

ဆၧအထီထီးနီၪ ၦအီၪဝ့ၫလနၩ့နၩ့ လၧအလီၩဘၪအဝ့ၫ လၧစပဲလၭလဲၩဎုၬ ၦဂၫလလံၫဖိၪအၥွံၪ လၧအဆၧလုအဂဲးလီၫ.- ယ့ၫၡုၬချဲၩ့ဆၧၫ့ဆၧတၭ စံၭအဝ့ၫၥံၪႇ ၦဂၫလလံၫဖိၪ ဘၪဆၧဘဲၫနီၪအကၠီၩ့တၭႇ မွဲနၥံၪဆီၫ့မီၪ့လၧ အမွဲၦဆၧဒဲၩဘၭဖိၪ အၧၩ့နဲၪ့ ကယဲၦဂၫလလံၫဖိၪၥံၪ ထီးအလူၬဒံၭဧၪ.- ယလီၩဘၪနၥံၪမွဲအ့ၬ. မွဲလါနၫ့ဘိၩ နၥံၪအ့ၪလနီၫ့ယါလၩ့ထဲၩ့ဘၪ နၥံၪအၥၭတၭႇ နၥံၪမိထီၩ့လၧ ဆၧဂၭဂီၩ့ဘဲၫနီၪအၥိၭ ထီးအလူၬလီၫ. 

ၦလၧတဲၩခိၭဆၧစံလိၫအၫ့ လၩ့ဎီးလၧအဖၫ့ခိၪတၭႇ ဘၪၥံၫၦၡၩလဆံၫဎိၭဂၩနီၪႇ မွဲနၥံၪဆီၫ့မီၪ့လၧ အဝ့ၫၥံၪမွဲၦဆၧဒဲၩဘၭဖိၪ အၧၩ့နဲၪ့ၦအီၪလၧယရုစလံၫ့အဖၧၩ့ ထီးအလူၬဒံၭဧၪ.- ယလီၩဘၪနၥံၪႇ မွဲအ့ၬႇ မွဲလါနၫ့ဘိၩ နၥံၪအ့ၪလနီၫ့ယါလၩ့ထဲၩ့ဘၪ နၥံၪအၥၭတၭႇ နၥံၪမိထီၩ့လၧဆၧဂၭဂီၩ့ ဘဲၫနီၪအၥိၭ ထီးအလူၬဆ့လီၫ.

အဝ့ၫဒၪချဲၩ့ဒီၩ့လၩ့ဆၧယီၩလမံၩ့ဆ့ ၦလဂၩလၧ အချိၪ့ဒိၩ့ဘၪဆၧၥုၪ့လၩ့ဝ့ၫ လၧအဆၧၥၪအလးဖၧၩ့ အီၪဝ့ၫလထံၭတၭႇ လ့ၩအၪ့ဎၬအဆၧၥၪနီၪ ဒၪန့ဝ့ၫအ့ၬ.- အဝ့ၫဒၪလီၩဘၪ ၦလၧအပၧၩ့ဘၪဆၧၥၪအလး လဂၩနီၪႇ ယိခွါႇ ယဂဲၫအၪ့ဎၬယူၭမၬဆၧၥၪ လၧချိၪ့ဒိၩ့ယီၩအလီၩ့ ၥၧၫ့နံၪ့ယူၭတၭႇ ယဒၪန့အ့ၬႉ ခူၬလၩ့ခွံၬအဝ့ၫဘီၪ. မွဲဘၪနီၫ လၧအအီၪထၬဂၪ့ခိၪလဲၪ.- အဝ့ၫဒၪချဲၩ့ဆၧၫ့ဆၧတၭ လီၩဘၪဝ့ၫႇ ကဆါဧႇ အယီၩလနံၪ့ယီၩ အီၪဒၪဝ့ၫခလူၬႇ ထီးယမိခုၪ့ဘွဲၪထၪ့ဝၬဖီၩ့အဝ့ၫ ဒဲအီၪက့ၪဆၧအ့ၪလၧအခၪ့ထံၭနီၪ- ဘၪ လဘၪမိၥၪဝ့ၫ လၧယၫလခီၫတၭႇ အ့ၪလမွဲဘၪနီၪ နမိဘၪခူၬခွံၬဝ့ၫဒၪလီၫ.