ကဆါယွၩဂဲၫထိၭပၧၩ လၧအလူအထၫလီၫႉ

ကဆါဧ့ႇ နၥၭအ့ၪအီၪလၧနမိမၩဆံၫ့ထၪ့ထဲၩ့ယၧၩယီၩ နမၩနဝ့ၫၥ့ၪလီၫ.-

အဝ့ၫဒၪယူၬစိၩအစူၪႇ ထိၭဘၪဝ့ၫတၭႇ စံၭဝ့ၫႇ ယၥၭအီၪႇ မွဲနဆံၫ့ထၪ့ဆံၭ.  

အခံၫ့အခၫဘိၩနီၫအိၩ ခံၫထူၬဆၫအၧၩ့ယီၩ မွဲဆၧဆၫလၧအလၩ့ၥၭမဲၪထုၬကမံၩ့လီၫႉ

ၦလၧခံၫထူၬဆၧဆၫအီၪလဖၪနီၪႇ အီၪဘၪကၠၧၫ့ကၠၧၫ့ လၧအဂံၪ့ဒီၪ့ဖိၪၥံၪႇ လၧအထၧၫ့ဖုထၧၫ့ဝဲႇ အထံၩအၥိၭၥံၪလၧၫ့အ့ၬႉ ဘၪလ့ၩအီၪလၧဝံးၥံၪႇတဝၫ့ၥံၪအချိၫ့လီၫႉ

ဆၧနီၪအကၠီၩ့ ၦခံၫထူၬဆၫအၧၩ့ၥံၪနီၪ ဘၪထိးန့ၫနးခီၫအဆၧဆၫလကၭလၧၫ့ႇ အဝ့ၫၥံၪ ဘၪထိးနးၥၭအဆၧဆၫတၭႇ အီၪၥၭမၧၫ့လၧ ဆၧၥုၪ့အုၭၥၭအုၭႇ ဒဲဆၧၥုၪ့ခါၥၭလၩ့အဖၧၩ့လီၫႉ

ကဆါယ့ၫၡုၬမၩဆံၫ့ထၪ့ထဲၩ့ ၦခံၫထူၬဆၫအၧၩ့လဂၩယီၩ အၥုၪ့ထိၬၥၭထိၬနီၪ ကဎိၩဒိၪဘဲၫၥ့ၪလဲၪနီၪ ပဆီၫ့မီၪ့န့ဝ့ၫလီၫႉ

ၦဆၧဆၫဖၭဒိၪႇ လၧၦၡၩမၩဘျၪထဲၩ့န့ဘၪလဂၩနီၪ အ့ၪအဆၧဆၫနီၪ ဆၧမၩဘျၪထဲၩ့ဝ့ၫစွါဘိၩ ကဆၧမုၬၥၭအၪမၬလ့ၬႉ

လၧပနးၥၭအဂး ဆၧဒဲၩဘၭမံၩ့ ဘၪဆၧဒီၩ့လၩ့ဝ့ၫ လၧခံၫထူၬဆၧဆၫလီၫႉ ၦလၧခံၫထူၬဆၧဆၫအီၪလဖၪနီၪ ဘၪလ့ၩအီၪလၧဝံးၥံၪႇ တဝၫ့ၥံၪအချိၫ့တၭႇ ဘၪအီၪယဲၩ့ယဲၩ့လၧၦၡၩၥံၪႇ အထံၩအၥိၭႇအဂံၪ့ဒီၪ့ႇအထၧၫ့ဖုထၧၫ့ဝဲၥံၪအၥိၭႇ ၦလၧအဖျီးဘၪမၪဆၧဒဲၩဘၭလဖၪနီၪ ဆၧဘၪလိၬအိၭလိၬလအီၪလၧၫ့ဘၪတၭႇ ဘၪလၩ့မုလၩ့ဖၭလၧ ကဆါယွၩႇ ဒဲလၧဆၧအီၪကီၪ့လီၫႉ

လၧအဆၧချဲၩ့ကမီၪ့တၭ ကဆါဎြံၬနီၪ မၩဆံၫ့ထၪ့ထဲၩ့ၦခံၫထူၬဆၫအၧၩ့န့ဝ့ၫလီၫႉ လါနၫ့ကဆါထိၭဘၪအဝ့ၫလၧအစူၪတၭႇ မၩဘျၪထဲၩ့ၦခံၫထူၬဆၫအၧၩ့လီၫႉ ဆၧမၪလူၬစံၭထၬဝ့ၫ ၦၡၩလ့ၩထိၭဘၪၦခံၫထူၬဆၫအၧၩ့နးဂၩအ့ၬႉ ၦၡၩမိလ့ၩထိၭဘၪနးဂၩဆ့အ့ၬႉ ဘၪနီၫလဲၪစွါဘိၩႇ ၦခံၫထူၬလဖၪနီၪ မွဲၦလၧအဘၪစံၪစၪႇ အဘၪၥၭလိၪတၭႇ ၦလၧအထိၭဘၪ ၦခံၫထူၬလဂၩနီၪ ဘၪစံၪစၪလီၫႉ

ၦခံၫထူၬဆၫအၧၭလၧ ၦၡၩအီၪပဲၩ့ခွံၬထၬႇ ၦခွံၬၡိၭထၬႇ ၦၡၩထိၭအစူၪဘၧၫ့နးဂၩအ့ၬႇ ၦၡၩမိလ့ၩဘူၭနးဂၩအ့ၬလဂၩနီၪႇ ကဆါဎြံၬ ထိၭဝ့ၫလၧအစူၪတၭႇ မၩဆံၫ့ထၪ့ထဲၩ့ဝ့ၫလီၫႉ

အ့ၪလမွဲဘၪလၧ ယွၩအစီၩ့အမၩ့နီၪ ၦမၩဆံၫ့ထၪ့ထဲၩ့ ၦခံၫထူၬဆၫအၧၩ့ န့နးဂၩအ့ၬႉ

အ့ၪလမွဲဘၪလၧယွၩလဂၩဎးနီၪ ၦၡၩမၩဆံၫ့ထၪ့ထဲၩ့ပၧၩလၧဆၧဒဲၩဘၭန့နးဂၩအ့ၬႉ

ပၥၭမၧၫ့အထီးယီၩ ၦဖီၩ့ခွံၬလၧဆၧဒဲၩဘၭအီၪနးဂၩအ့ၬႇ ဆၧနီၫအကၠီၩ့ ပကဘၪၥုၭဘူၭအၥၭလၧကဆါယွၩအီၪ လၧဆၪ့လၩ့ၥၪ့ဆၪ့လၫ့ၥၭတၭႇ ပကဘၪဒိၭန့ ကဆါယွၩအဆၧထိၭဘၪပၧၩလီၫႉ ကဆါယွၩဂဲၫထိၭပၧၩ လၧအလူအထၫႇ လၧအစဲၭကရမဲၫတူၩလဖၪတၭႇ မၩဆံၫ့ထၪ့ပၧၩ လၧဆၧဒဲၩဘၭလဖၪလီၫႉ