ကဆါဎြံၬထိးဆၧနၭဆၧၡၪ့

ၦထမျၬၥံၪလၧအဘၪဆၧဖျၩထၪ့ဝ့ၫနီၪ အလဂၩဒုၪဒွ့ၪဆၧတၭ, စံၭဝ့ၫ, နအ့ၪမွဲဎရံၬနီၪ ထိးထဲၩ့တၩ့ ထဲၩ့န့ဎုၬလါနၥၭဒၪနဝ့ၫဒဲပဝ့ၫဒၪယီၩဆ့ဘီၪ.- အ့ၪမွဲ အဝ့ၫဒၪလဂၩချဲၩ့ဆၧၫ့ဆၧ, အၪ့လၬအဝ့ၫနီၪ, စံၭဝ့ၫ, နဘၪဆၧစ့ၩရၫ့စၪလမံၩ့ဎးလၧၦလဂၩယီၩတၭ, မွဲနၥၭမဲၪယွၩအ့ၬဧၪ.- ပဝ့ၫဒၪယီၩပဘၪဆၧစ့ၩရၫ့တီၩတီၩလီၫ. အဂဲးဘဲၫယီၩပထိးဘၪဆၧ ထီးဒၪအကြၨၭ လၧပမၩဆၧအဂဲးလီၫ. အ့ၪမွဲအဝ့ၫလဂၩယီၩ, မၩမၪ ဆၧနးမံၩ့အ့ၬ.- အဝ့ၫဒၪစံၭယ့ၫၡုၬ, ကဆါဧ့,ထီး နအ့ၪနုၬလၧ နဘၩ့နမုး အဖၧၩ့တၭ,နၪ့ထၪ့ထဲၩ့ ယၧၩဆံၭ.- ယ့ၫၡုၬစံၭအဝ့ၫဒၪ, ယလီၩဘၪနၧၩတီၩတီၩယီၩ, မုဆၫလနံၩယီၩ နမိအီၪလၧယၥိၭ လၧပၫရဒဲၭအဖၧၩ့လီၫ. ဘၪဎူၫနၩရံၩကၪယူၭတၭ, ဆၧခံၭလၩ့ဝ့ၫ လၧခးနီၪထၧၫ့ဘံၪ့ယၫ, ထီၩ့လၩ့လၧခွံၫနၩရံၩလီၫ.- မုခံၭ လၩ့ဝ့ၫတၭ, ဆၧလုဂံၪ့အကလကၫနီၪ ထ့ဖၭဝ့ၫဒၪလၧ အကျၩလီၫ.-

ယ့ၫၡုၬ ကိၭၡၭထၪ့ဆၧလၧအလူဖၭ ဒိၪတၭ,စံၭဝ့ၫ, ဖါဧ့, ယဖ့ၪလၫ့ယၥၭလၧနစူၪဖၧၩ့လီၫ. စံၭဆၧလဖၪနီၪဂီၩ့တၭ, အၥၭစဲၪ့ထၪ့ခွံၬဝ့ၫလီၫ. ၦၥုၭဖိၪလယၩအခိၪ ဒၪဘၪဆၧမၩအၥၭနီၪ, စံၭထၪ့အၪ့အူၭယွၩတၭ, စံၭဝ့ၫ, ၦလဂၩယီၩမွဲၦအတီၩလီၫ.- ကယဲၦထီးအလူၬလၧအဂဲၫအီၪကီၪ့လၧအယိဖၧၩ့ဆၧနီၪ, ထီးအဒၪဘၪဆၧမၩအၥၭ ဘဲၫနီၪလဖၪတၭ, ဒဲၩလၩ့အၥၭနၫတၭ, ထဲၩ့ဝ့ၫလီၫ. ၦလၧအၥ့ၪယၫအဝ့ၫထီးအလူၬ, ဒဲၦမုၪလၧအဂဲၫ ဖိၬအခဲၫ့လၧဂၫလလံၫလဖၪနီၪ, ဆၧၫ့ထုၪ့အီၪယဲၩ့ ယိၬတၭ,ယိဆၧလဖၪနီၪလီၫ.