ၥၭမုဆံၫ့ဎံၪကဆါယွၩအဘိၪ့မုနံၩ

အဲၪကွံၩဘၪထၧၫ့ဖုဝဲ ၦဆူနဲၩဖိၪထီးလူၬၥံၪဧ့ႇ မုကနံၩယီၩ မွဲဝ့ၫဒၪ လၧၥၭမုဆံၫ့ဎံၪကဆါယွၩအဘိၪ့မုနံၩအကၠီၩ့တၭႇ ပဝ့ၫၥံၪလဖၪ မွဲပကမၩလၩမၩဖၩ့ဝ့ၫဒၪ  ၥၭမုဆံၫ့ဎံၪကဆါယွၩအဘိၪ့မုနံၩ လၧဆၧၥုၪ့ဎွံၫၥၭယီၫအဖၧၩ့ ကိၭဂၩဒ့ၭဆံၭႉ
လၧအဖီၩ့ခွံၬ မုနွ့ၫ(၇)နွ့ၫ အထီဒၪအိၩ ပကၭလၥံၬဎြံၬဖိၪလဖၪ ပဂဲၫထဲၩ့ဘိၪ့ထၪ့ဘၩထၪ့ႇ မၩလၩမၩဖၩ့ဝ့ၫဒၪ ဘိၪ့လ့ၩဖၭ ကဆါယ့ၫၡူၬ မၧၫ့ထၪ့ထဲၩ့ဝ့ၫ လၧဆၧၥံၫဒိၪအဘိၪ့မုနံၩ လၧဆၧၥုၪ့ထိၬၥၭထိၬႇ ဆၧၥုၪ့ဎွံၫၥၭယီၫ ဒိၪဒိၪဒ့ၭအဖၧၩ့နီၪလီၫႉ လကၭဒ့ၭဘၪ ဘိၪ့လ့ၩဖၭ(၇) နွ့ၫအထးဖၧၩ့ဒၪအိၩ ပဝ့ၫၥံၪလဖၪ ပဂဲၫထဲၩ့ဆီၫ့မီၪ့အၪ့ဎၬထၪ့ဝ့ၫဒၪ ကဆါဎြံၬမၧၫ့ထၪ့ထဲၩ့ လၧဆၧၥံၫဒိၪဂီၩ့ ဖ့ၪနဲၪဖျီၪထၪ့ၥၭ လၧအထံၩအဖျဲလဖၪ ဒဲဆၧအၪ့မၧၫ့ဖိၪၥံၪလဖၪ အမ့ၬယၫအဂဲးနီၪလီၫႉ 
ၥၭမုဆံၫ့ဎံၪအဘိၪ့မုနံၩ မုလနံၩယီၩ ပအီၪနၪ့ထၪ့ဝ့ၫဒၪ ၥၭမုဆံၫ့ဎံၪဂဲၫလၩ့ဝ့ၫဒၪ လၧဆၧအၪ့မၧၫ့ဖိၪလဖၪ အဖၫ့ခိၪ ဘဲၫမ့ၪလၪအၥိၭနီၪလီၫႉ ဆၧအၪ့မၧၫ့ဖိၪၥံၪ ဒဲကဆါယ့ၫအထံၩအဖျဲလဖၪနီၪ ၥၭမုဆံၫ့ဎံၪဂဲၫလၩ့ဝ့ၫဒၪ လၧအဝ့ၫၥံၪအဖၫ့ခိၪအထီကထုၪဎးႇ အဆၧၥၭမၧၫ့အၪ့လဲၩထၪ့ခွံၬဂီၩ့တၭႇ ဖီၪ့ထၪ့ဖံၭထၪ့ဝ့ၫဒၪ ကဆါယွၩအဆၧဖံၭဆၧမၩ လၧဆၧၥုၪ့ဎွံၫၥၭယီၫ ဒဲဆၧၥုၪ့ဆီၪ့ၥၭဆီၪ့အဖၧၩ့နီၪလီၫႉ 
ၥၭမုဆံၫ့ဎံၪဂဲၫလၩ့ထီၩ့ လၧဆၧအၪ့မၧၫ့ဖိၪၥံၪအထီး လၧအဝ့ၫၥံၪအၥၭခံဖၧၩ့နီၪ ဆၧၥၭမဲၪၥၭဖျဲၩ့လဖၪ အီၪလၩ့မါခွံၬဝ့ၫဂီၩ့တၭႇ လီၩလၩ့လၬလၩ့ ဆၧၥၭထိၬအပရၧၫ့ လၧဆၧအလးဎံၩ့လးနီၪလီၫႉ လကၭဒံၭဘၪ အဝ့ၫၥံၪအၪ့ဎၬနၪၥ့ၪထၪ့ ကယဲဆၧလဖၪကိၭမံၩ့ဒ့ၭ ဒဲအဝ့ၫၥံၪ လၧၫ့ထၪ့ဎွ့ၩထၪ့ဝ့ၫဒၪ လၧဆၧအခိးအတၩလဖၪနီၪလီၫႉ စၭထၪ့ဝ့ၫဒၪ လၧၥၭမုဆံၫ့ဎံၪဂဲၫလၩ့ဝ့ၫဒၪ လၧဂၪ့ခိၪချိၫ့ယီၩ မုလနံၩနီၪ မိဆၧအီၪကီၪ့ယီၩ စၭထၪ့အီၪဖျဲၪထၪ့ဝ့ၫဒၪနီၪလီၫႉ 
ၥၭမုဆံၫ့ဎံၪကဆါယွၩနီၪ လၧအစီၩ့အမၩ့အဖၧၩ့ မၩလၧၫ့ထၪ့ဎွ့ၩထၪ့ထဲၩ့ ဆၧအၪ့မၧၫ့ဖိၪၥံၪ လၧဆၧယိလါအၥၫ့ ဒဲၥုၪ့ၥၭအစီၩ့ဒိၪမၩ့ဒိၪလဖၪနီၪလီၫႉ ကဆါယ့ၫၡုၬဎြံၬ ဂဲၫထဲၩ့ဖီၪ့ထၪ့ဖံၭထၪ့ ကဆါယွၩအဆၧမၩ လၧဂၪ့ခိၪချိၫ့ဖၧၩ့ယီၩဂီၩ့ ၥံၫဖီၩ့ခွံၬဝ့ၫ ဒဲထဲၩ့ထၪ့ထဲၩ့ လၧမူၭခိၪဘၩ့မုးကကၠၪ အဝ့ၫအထံၩအဖျဲ ဒဲဆၧအၪ့မၧၫ့ဖိၪလဖၪနီၪ ဆုးထဲၩ့ဖီၪ့ထၪ့ဖံၭထၪ့ဝ့ၫဒၪ ကဆါယွၩအဆၧဖံၭဆၧမၩ လၧၥၭမုဆံၫ့ဎံၪ အဆၧလ့ၩခိၪလ့ၩနါအဖၧၩ့ႇ လၧဆၧၥုၪ့ဒူၩၥၭဒူၩႇ လၧၥုၪ့ဆီၪ့ၥၭဆီၪ့ဒိၪဒိၪဒ့ၭ အဖၧၩ့နီၪလီၫႉ