ၥၭမုဆံၫ့ဎံၪကဆါယွၩအဘိၪ့မုနံၩ

ၥၭမုဆံၫ့ဎံၪအဘိၪ့မုနံၩနီၪ မွဲဝ့ၫဒၪမိဆၧအီၪကီၪ့ဆံၫ့ဎံၪစၭထၪ့ကဲၪထၪ့အခံၫ့နီၪလီၫႉ ကဆါဎြံၬဖ့ၪလၫ့အ့ၪပၧၩအထံၩအဖျဲၥံၪ ဆၧဎူၫဆၧဎၩ့ဒဲဖျါလၩ့အ့ၪၥၭမုဆံၫ့ဎံၪအမုနံၩနီၪလီၫႉ လကၭဒံၭဘၪ မွဲဝ့ၫဒၪလၧဆၧအၪ့မၧၫ့ဖိၪၥံၪ ဘဲၫကလ့ၩလီၩလၩ့လၬလၩ့ ၥၭထိၬအပရၧၫ့လၧဂၪ့ခိၪထၧၫ့ဖျိၪ့ယၫအဂးအခံၫ့နီၪလီၫႉ

ကဆါဎြံၬအဆၧဎူၫဆၧဎၩ့နီၪ မွဲလဖီၩ့ဘၪလၧဆၧကၪဆၧဂဲၩႇ ဆၧၡၪ့ဆၧနၭ ဒဲဆၧဘၪထိးဆၫနီၪလီၫႉ ဆၧနိၫ့ဆၧနၭႇ ဆၧကၪဆၧဂဲၩႇ ဆၧဘၪထိးဆၫအီၪလါနၫ့ ၦလၧအန့ဘၪဆၧဎူၫဆၧဎၩ့လၧကဆါဎြံၬဖ့ၪလၫ့ထၬအ့ၪပၧၩနီၪစွါဘိၩ ဆၧဘၪထိးဆၫအီၪလါနၫ့လၧအၥၭခံဖၧၩ့ ဆၧဎူၫဆၧဎၭႇ ဆၧၥုၪ့မုၬၥၭၡူၪ မွဲအီၪဝ့ၫဘီၩ့ဎးနီၪလီၫႉႉႉ

ဘဲၫပကဒိၭန့ဘၪဆၧဎူၫဆၧဎၩ့အဂး မွဲပကဘၪဂၭဎ့ၭဆၧဒဲၩဘၭဂီၩ မွဲပကဘၪလီၩဎွါဆၧအဘိၪ့အဘၩႇ ဆၧဂ့ၩဆၧဘွၩလဖၪနီၪလီၫႉ

ကဆါယွၩဖ့ၪအ့ၪပၧၩ ၥၭမုဆံၫ့ဎံၪအခိးအတၩနွ့ၫမံၩ့ လကၭဒံၭဘၪ ဖ့ၪအ့ၪပၧၩဆၧဖၩ့အခိးအတၩဒဲပဂဲးပဘၭအခိးအတၩလဖၪနီၪလီၫႉ ႉႉႉ ၥၭမုဆံၫ့ဎံၪအဆၧချဲၩ့နီၪ မွဲဝ့ၫဒၪလၧဆၧအဲၪဆၧကွံၩအဆၧချဲၩ့လီၫႉ မွဲဆၧဘဲၫနီၪတၭႇ ဘဲၫပကဒိၭန့ဘၪ ၥၭမုဆံၫ့ဎံၪအခိးအတၩလၧၫ့လၧၫ့ဎွ့ၩဎွ့ၩကန့အဂးႇ ဆၧဒဲၩဘၭလၧကဘၪဘံၭထၬကဆါယွၩအခိးအတၩ ကလၩ့ယွၩဖၧၩ့ၥၭလဖၪ မွဲပကအီၪပဲၩ့ခွံၬဂီၩ အ့ၪပကအီၪက့ၪဆၧအဲၪဆၧကွံၩလၧအဝဲလၫ့ကဆါယွၩအခိးအတၩဖၧၩ့ၥၭလဖၪနီၪစွါဘိၩႇ မွဲပကဒိၭန့ဘၪ ၥၭမုဆံၫ့ဎံၪအခိးအတၩအလၧၫ့အဎွ့ၩနီၪလီၫႉႉႉ

ပန့ဘၪယူၭယွၩဎြံၬအဆၧဎူၫဆၧဎၩ့ အခိးအတၩ ဒဲၥၭမုဆံၫ့ဎံၪအဆၧဖၩ့ဒဲဂဲးဘၭအခိးအတၩယူၭအကၠီၩ့ႇ ပကဘၪလ့ၩလၧဂၪ့ခိၪထၧၫ့ဖျိၪ့ယၫအဂး ဒဲပကဘၪလီၩလၩ့လၬလၩ့ထဲၩ့ဆၧၥၭထိၬအပရၧၫ့နီၪ မွဲၦဎြံၬဖိၪၥံၪကိၭဂၩအမူၩဒၩအီၪဝ့ၫနီၪလီၫႉႉႉကကဘၪလီၩလၩ့လၬလၩ့ဆၧၥၭထိၬပရၧၫ့လၧပနိၭလကၭဒံၭဘၪ ပကဘၪဆုးထဲၩ့ဒုၭနဲၪထဲၩ့အဒီၩ့အထ့ၬအဂ့ၩအဘၪဒံၭနီၪလီၫႉ