အီၪတဲၩ့ဝဲၩကဆါဎြံၬကဂဲၫလၩ့ မုအီၪပွံၭနံၩ(၁)

မုကနံၩယီၩအဂး ဆၧၥၭထိၬပရၧၫ့နီၪ ဖုၪခိၭလီၫႉ အဆၧၫ့ဖိၪအီၪ ၅ ဆၧၫ့အဖၧၩ့နီၪ ပနါဂၧၫ့ယ့ၫၡူၬအဆၧချဲၩ့ႇ အီၪခိၭဆၧဆံၭႇ ဆၧချဲၩ့နီၪ ပနါဂၧၫ့ဘၪ ၄ ဘျၩ့လီၫႉ 
ၦလၧအလ့ၩစဲၪ့ထၪ့လၧထံၫယဲၩ့ခးယဲၩ့နီၪ မွဲဝ့ၫကဆါယ့ၫၡူၬလီၫႉ ဘဲၫၦၡၩကဂၩအၥိၭႇ အီၪကၠၧၫ့ကၠၧၫ့လၧၦၡၩ ၃၃နံၪ့အထးဖၧၩ့ႇ ထိးၥံၫၥၭႇ ဂဲထုၪ့မၧၫ့ထၪ့ထဲၩ့ႇ ထဲၩ့ထၪ့ထဲၩ့လၧအဖါအီၪ လၧမူၭခိၪလီၫႉ အဝ့ၫကဂဲၫလၩ့နးဖၧၫ့ဒီၭလီၫႉ 
ဂံၪ့ဆါအခ့ၫအၡၩလဖၪနီၪ မွဲဝ့ၫ ပဝ့ၫဒၪ ဎြံၬဖိၪ ၦလၧအဖိၬယ့ၫၡူၬအခဲၫ့လဖၪလီၫႉ  ဖ့ၪလၫ့ထၬပၧၩ ဆၧဖံၭဆၧမၩႇ မူၩဒၩလဖၪ လၧပက ဘၪမၩလၧၫ့ထၪ့ဎွ့ၩထၪ့အဂး လၧအဂံၪ့ဖၧၩ့ႇ အဆၧအီၪကီၪ့ဖၧၩ့နီၪလီၫႉ ကဆါယိလါလၧ ပကမၩလၧၫ့ထၪ့ဎွ့ၩထၪ့ ပမူၩဒၩလဖၪလီၫႉ 
ဂံၪ့ဆါနီၪ ကဂဲၫထဲၩ့ထဲၩ့ လၧအဂံၪ့ႇ လၧအခ့ၫအၡၩအအီၪလီၫႉ လါနၫ့ဂ့ၩ အဝ့ၫကလၩ့မါ လၩဎွ့ဘံၪ့လဲၪႇ အနံၪ့ကဆံၫဧၪႇ နံၫႇၥၧၫ့ဆံၫဧၪႇ လီၩၥ့ၪယၫထၬအ့ၪအဝ့ၫၥံၪအ့ၬႉ ကဂဲၫထဲၩ့မုနံၩမုၥၫ့ႇ အခံၫ့ပၥ့ၪလဲၪ လီၩၥ့ၪယၫထၬဝ့ၫအ့ၬႉ 
မၪလူၬထွ့ၫအခ့ၫအၡၩႇ ကဘၪအီၪခိၭဆၧလီၫႉ 
ကဆါယ့ၫၡူၬကဂဲၫလၩ့နံၫဘျၩ့လဘျၩ့ဆံၬလဲၪႉ ၦၡၩၥ့ၪယၫအခံၫ့နးဂၩအ့ၬႉ ဆၧနီၪအကၠီၩ့ ယ့ၫၡူၬမၪလူၬပၧၩ ပကဘၪအီၪခိၭ လၧဆၧတဲၩ့ဝဲၩၥၭအဖၧၩ့နီၪလီၫႉ 
ဘဲၫဂံၪ့ဆါႇ အီၪက့ၪလၩ့ထး အဂံၪ့အဎၫ့ႇ အစူၪလးခၪ့ခိၪႇ အဆၧဖံၭဆၧမၩ လၧအခ့ၫအၡၩၥံၪအစူၪဖၧၩ့ဂီၩ့ႇ အၪ့မၧၫ့ႇ အီၪခိၪဆၧအၥိၭႇ ယွၩအီၪက့ၪလၩ့ထး အဆၧအီၪကီၪ့ႇ အဆၧဖံၭဆၧမၩ လၧပစူၪဖၧၩ့တၭႇ မၪလူၬပၧၩႇ ပကဘၪအီၪခိၭဆၧလီၫႉ 
ဆၧနီၪအကၠီၩ့ႇ ပကဘၪအီၪခိၭဆၧပၥ့ၪလဲၪႉ ပမၩဆၧမၩနးမံၩ့အ့ၬႇ ပဆၧၫ့နၩ့အီၪႇ ပအၪ့ပအီၩႇ ပလီၩထဲၩ့ဆၧႇ ဆၧနီၪလဖၪႇ မွဲဆၧအီၪခိၭဆၧအ့ၬႉ  ပဆၧၫ့နၩ့အီၪႇ ပစၪ့ထၪ့ထၬပမ့ၬၥၪဂီၩ့ ပမၩဆၧနးမံၩ့အ့ၬနီၪ ဆၧမွဲအီၪခိၭဆၧအ့ၬႉ 
ဂံၪ့ဆါအခ့ၫအၡၩလဖၪႇ ဆၧအၪ့ဂူၫႇ ထမၠါလဖၪႇ ထီးဘုၪ့ဖိးႇ အဂံၪ့လဂ့ၩနီၪ အဝ့ၫၥံၪကဘၪအီၪခိၭဆၧ ဆၧထုၪ့ၥုၪ့ထၪ့ၥၭအဖၧၩ့လီၫႉ အကဆါအဆၧမၩလဖၪ ကဖီၫထၪ့ၥၪထၪ့ႇ ဂုထၪ့အၪထၪ့အဂး အဝ့ၫၥံၪ ကဘၪဖီၪ့ထၪ့ဖံၭထၪ့ႇ ဎိၭထံၫဎိၭဒီၫ လၧခိးဂဲးခိးဘၭဒိၪဒိၪလ့ၬအဖၧၩ့လီၫႉ 
ပဝ့ၫဒၪယီၩ မွဲယွၩအဆၧအီၪကီၪ့ႇ ယွၩအမိၡါလီၫႉ ဒုၪဒၩမုၪခီၩလဲးထီး ဂဲၫမၩဂၭဂီၩႇ ထီးဂၪ့အၪ့ဂူၪခွံၬ ပနးၥၭလဂ့ၩနီၪ ပကဘၪအီၪလၧ ဆၧအီၪခိၭဆၧႇ ဆၧအီၪတဲၩ့ဝဲၩၥၭ လၧဆၧဘၩဆိၪဖၪအဖၧၩ့ႇ ဒဲလၧဆၧထုၪ့ၥုၪ့ထုၪ့ၥၭဒိၪဒိၪလ့ၬအဖၧၩ့လီၫႉ 
ထၧၫ့ဖုဝဲမုၪခွၫၥံၪဧ့ႇ 
ပဝ့ၫဒၪ လၧအီၪခိၭယိလါ ကဆါယ့ၫၡူၬကဂဲၫလၩ့နးဖၧၫ့ဒီၭႇ ဘဲၫၥိၭကဒိၭန့ဘၪ ခိၪဖၭႇ ဆၧယၫ့ၥုၪ့ယၫ့ၥၭႇ ဆၧထိးဆၧၫ့မုၬႇ ဆၧၥၭမၧၫ့ဆိၩကၠၪအဂးႇ လၧပၥၭမၧၫ့မုကိၭဒ့ၭအဖၧၩ့ယီၩ
ကဆါဂဲၫလၩ့လၧပအီၪအထီ ပကဘၪကိၭဖံၭၥိၭအဝ့ၫႇ ပကဘၪထိးဆၧၫ့အဝ့ၫ လၧဆၧဆၪ့လၩ့ၥၭႇ ဆၧၥုၪ့မုၬလၩဆၧဎွံၫအဖၧၩ့ႇ လၧဆူနဲၩႇ ဆၧအဲၪဆၧကွံၩဒဲဆၧယိလါအဖၧၩ့နီၪလီၫႉ