အီၪတဲၩ့ဝဲၩကဆါဎြံၬကဂဲၫလၩ့အဆၧၫ့အထီ မုအီၪပွံၭနံၩ (၁)

မုကနွ့ၫယီၩ မွဲဝ့ၫအီၪတဲၩ့ဝဲၩကဆါဎြံၬကဂဲၫလၩ့အဆၧၫ့အထီ မုနွ့ၫအခၪ့ထံၭ မုအီၪပွံၭနံၩလီၫႉ 
လၧဖျိၩ့ဖျိၩ့အိၩ ၦအံၫစရ့လၭဖိၪလဖၪ အီၪခိၭယိလါဝ့ၫလၧ ဆၧထိးထဲၩ့တၩ့ထဲၩ့ကဆါ ကဂဲၫလၩ့လၧအဝ့ၫၥံၪအအီၪအဂဲးနီၪလီၫႉ နံၫထံၫကထံၫနီၪ အထီဘဲၫယီၩ လၧပဝ့ၫၥံၪကိၭဂၩ ပဆၧၥၭမၧၫ့အဖၧၩ့ ပကဒိၭန့ဘၪၥၭမုဆံၫ့ဎံၪကဆါအဆၧဆိၪဂ့ၩဆိၪဘွၩလဖၪ ဒဲဖိၪၥၪယ့ၫၡူၬကဂဲၫနုၬလၩ့အီၪဝ့ၫ လၧပဆၧၥၭမၧၫ့ဖၧၩ့ လၧဆၧမံၫ့ၥုၪ့မံၫ့ၥၭအဂး မွဲဝ့ၫလၧ ပဘၪအီၪတဲၩ့ဝဲၩထၪ့ပၥၭအဆၧၫ့အထီနီၪလီၫႉ 
လၧဆၧအဲၪကွံၩဎိၪဒိၪအဖၧၫ့ ဖိၪၥ့ၪယ့ၫၡူၬကဂဲၫဆိၬန့ဝ့ၫဒၪ ဆၧမုၬလၩၥၭဎွံၫႇ ဆၧအဲၪဆၧကွံၩ ဒဲဆၧမုၬၡူၪဘၩလဖၪနီၪလီၫႉ ဖိၪၥၪယ့ၫၡူၬဂဲၫဆိၬန့ ဆၧလဖၪယီၩ ဘဲၫၥိၭပကဒိၭန့ဘၪ ကြၨၭကြၨၭဘၪဘၪအဂး လၧပၥၭခံဖၧၩ့ယီၩ ပကဘၪခွံၬၡိၭခွံၬဆၧဒဲၩဘၭဆၧဘၪမၪလဖၪ ဒဲဆၧၥုၪ့လဲးၥၭဘျၪလဖၪဂီၩ့ ပကဘၪအီၪမၧၫ့ဝ့ၫဒၪ လၧဆၧအီၪမၧၫ့အီၪဂဲၩ အဂ့ၩအဘွၩအဖၧၩ့နီၪလီၫႉ 
ၥၧၫ့ထုၪကထုၪနီၪ အခံၫ့အဆၧၫ့အထီယီၩ မွဲဝ့ၫလၧပဘၪအီၪခိၭယိလါဝ့ၫဒၪ ကဆါဎြံၬလၧကစ့ၩရၫ့တီၩ ၦၥံၫဒဲၦမၧၫ့လဖၪအဂး ကဂဲၫထဲၩ့ဝ့ၫဒၪနံၫဘျၩ့လဘျၩ့အထီနီၪလီၫႉ 
ကဆါယ့ၫၡူၬဎြံၬနီၪ ဘဲၫဆိၫထုၬကဘျၩအိၩၥိၭ ကဂဲၫလၩ့ဝ့ၫလၧဆၧနၭဆၧၡၪ့ဖၧၩ့ လမွဲလၧၩ့ဘၪတၭ ဘိၩယီၩကကၠၪ ကဂဲၫလၩ့ထဲၩ့ဝ့ၫ ဘဲၫၦစ့ၩရၫ့တီၩဆၧကဂၩအၥိၭ လၧဒိၪစီၩ့ဒိၪမၩ့အဖၧၩ့နီၪလီၫႉ ၦလၧအမၩဆၧဒဲၩဘၭဆၧဘၪမၪလဖၪဂီၩ့ ဆၧနီၫ့ယါလအီၪဘၪလဖၪနီၪ ကဆါဎြံၬကစ့ၩရၫ့ခွံၬဝ့ၫဒၪတၭႇ ၦလၧအအီၪမၧၫ့အၥၭမၧၫ့ လၧအဂ့ၩအဘွၩဖၧၩ့လဖၪနီၪ ကဆါယွၩကဖ့ၪလၫ့ခိၪဖၭ လၧအမွဲဝ့ၫဒၪ ထံၫခးဘၩ့မုးဆၧဆိၪဆၧကၠၪနီၪလီၫႉႉႉ
ဆၧလၧပကဲၪၦၡၩနီၪ ပကဘၪၥၭမၧၫ့ထၪ့ ပဆၧၥၭမၧၫ့လၧ ဆၧယိလါအဖၧၩ့နီၪလီၫႉ ၦၡၩလၧအဖီၪ့ထၪ့ဖံၭထၪ့အဆၧမၩ လၧဆၧယိလါဖၧၩ့လဖၪနီၪ အဂဲးအဘၭအီၪဝ့ၫတၡါဒ့ၭနီၪလီၫႉ ဆၧၥၭမၧၫ့လၧလအီၪက့ၪထၬဘၪဆၧယိလါႇ ဒဲဆၧၥၭမၧၫ့လၧဆၧယိလါလအီၪဘၪနီၪ ပစံၭၥ့ၪဝ့ၫဒၪလၧ ဆၧၥၭမၧၫ့အၥံၫဝ့ၫဒၪနီၪလီၫႉ ထီးနီၪ ဆၧၥၭမၧၫ့လၧ ဆၧအီၪတဲၩ့ဝဲၩလအီၪဘၪႇ ဆၧၥၭမၧၫ့လၧ ဆၧအၪ့လဲၩထၪ့လအီၪဘၪႇ ဆၧၥၭမၧၫ့လၧ ဆၧဆူနဲၩလၩ့မါခွံၬဝ့ၫဒၪလဖၪနီၪ ကကဲၪထၪ့ဝ့ၫဒၪ ဆၧကဒံၩကဒၩနီၪလီၫႉ ဆၧနီၪအကၠီၩ့ အီၪတဲၩ့ဝဲၩဎြံၬကဂဲၫလၩ့ (အၫဒဝ့ၫတူၩ) အဆၧၫ့အထီယီၩ မွဲဝ့ၫဘဲၫဆၧယိလါအခံၫ့အဆၧၫ့အထီအၥိၭႇ မွဲဝ့ၫဒံၭလၧ ပကဘၪအၪ့လဲၩထၪ့ပၥၭႇ မွဲဝ့ၫလၧပကဘၪအီၪတဲၩ့ဝဲၩၥၭအခံၫ့အဆၧၫ့အထီနီၪလီၫႉ ႉႉႉ
ကဆါယ့ၫၡူၬနီၪ ကဖ့ၪလၫ့ပၧၩအခိးအတၩ ဒဲဆၧမုၬၡူၪဘၩအဂး ကဂဲၫလၩ့ဝ့ၫဒၪ လၧပအီၪနီၪလီၫႉ ပအီၪမၧၫ့ပဆၧၥၭမၧၫ့ လၧဆၧအၪ့လဲၩထၪ့ၥၭအဖၧၩ့ ဒဲဆၧအီၪတဲၩ့ဝဲၩအဖၧၩ့စွါဘိၩ ပဆၧၥၭမၧၫ့အထီဘိၩယီၩ ဘဲၫပကဒိၭန့ဘၪ ဆၧအခိးအတၩဒဲဆၧဆိၪဂ့ၩဆိၪဘွၩလဖၪအၥိၭႇ ကဆါဎြံၬဂဲၫလၩ့နးဖၧၫ့ဒီၭကကၠၪအခၫဆ့ႇ  မွဲပကဒိၭန့ဘၪ ဆၧၥၭမၧၫ့ဆိၩကၠၪအခိၪဖၭတၡါဒ့ၭနီၪလီၫႉ ႉႉႉ