အီၪတဲၩ့ဝဲၩကဆါဎြံၬကဂဲၫလၩ့မုနွ့ၫ(၄)

အဲၪကွံၩဘၪထၧၫ့ဖုဝဲဎြံၬဖိၪၥ့ၪဧ့ႇ လၧဆၧအီၪတဲၩ့ဝဲၩကဆါဎြံၬကဂဲၫလၩ့(အၫဒဝ့ၫတူၩ) အဆၧၫ့အထီယီၩ စအီၪကီၪ့ဆံၫ့ ကိၭဖံၭၥိၭပၧၩ ဘဲၫၥိၭ ပကယိဆီၫ့မီၪ့ ဒဲပကယိဒီၩ့ ၦဆံၫ့ဎံၪစယိၥၭ ဒဲယွၩအမိဆံၫ့နးမၫရံၫၥံၪ ဒဲဆါယွၩအဖိၪခွၫယ့ၫၡူၬ အဆၧအဒီၩ့အထ့ၬအဂ့ၩလဖၪနီၪလီၫႉ 
အဆိၫထုၬ ကဆါအၥီၫ့မၩဖျီၪထၪ့ၥၭ လၧနးမၫရံၫအမ့ၬႇ ဘိၭဘၪၥ့ၪထၪ့လၧ အဝ့ၫကဘၪဒၧၩ့ထၪ့န့ ကဆါယွၩအဖိၪခွၫ လၧၥၭမုဆံၫ့ဎံၪႇ ကဘၪဖျိၬဝ့ၫအမံၩ့ယ့ၫၡူၬႇ ပမိဘၪကိၭ လၧဆၧထီၫထုၬအဖိၪခွၫအကၠီၩ့ ကဆါယွၩအၥီၫ့ဂၫဘြံၫအ့လၭ လီၩၥ့ၪယၫဝ့ၫအခၫနီၪ နးမၫရံၫနၫဝ့ၫၥ့ၪအ့ၬႉ ဆၧနီၪအကၠီၩ့ အၥီၫ့စ့ၭဝ့ၫႇ ၥၭမုဆံၫ့ဎံၪမိဂဲၫလၩ့လၧအဝ့ၫအလီၩ့ႇ ဆၧထီၫထုၬအစီၩ့အမၩ့မိကဒုၩဘၪအဝ့ၫအကၠီၩ့ႇ လၧယွၩမၩလၥ့ၪဘၪနီၪ အီၪနးမံၩ့အ့ၬအကၠီၩ့ အၥီၫ့လီၩအခၫမၬႇ နးမၫရံၫစံၭဝ့ၫႇ ယိခွၫႇ ကဆါအခ့ၫအၡၩမုၪတၭႇ မွဲဆၧမၩဒၪဝ့ၫၥၭ ဘဲၫနလူအၥိၭနီၪလီၫႉ 
နံၫဂၩလဂၩ ကဆါယွၩမၩဖျီၪထၪ့ၥၭ လၧစယိၥၭအမ့ၬယၫ လၧဆၧမံၫမးဖၧၩ့လီၫႉ အဝ့ၫလဒၪယွၩအၥီၫ့ လၧအမ့ၬၥၪလါနၫ့ႇ အဝ့ၫဆူနဲၩယွၩအၥီၫ့အလူတၭႇ မၩဝ့ၫဘဲၫကဆါအၥီၫ့မၪလူၬအဝ့ၫအၥိၭနီၪလီၫႉ
ၥၧၫ့ဂၩလဂၩ မွဲယွၩအဖိၫခွၫယ့ၫၡူၬ အဆၧအဒီၩ့အထ့ၬလီၫႉ ယွၩအဖိၫခွၫလၧအၥ့ၪဆၧလူၬယီၩ ခိၭနၪအဖါယွၩအလူတၭႇ ဂဲၫလၩ့အၪ့န့ ၦၡၩအဆၧကဲၪ လၧဂၪ့ခိၪချိၫ့ဖၧၩ့ယီၩ လၧဆၡၪ့ဆၧနၭႇ ဒဲဆၧဆၪ့လၩ့ၥုၪ့ဆၪ့လၩ့ၥၭအဖၧၩ့လီၫႉ 
အဲၪကွံၩဘၪထၧၫ့ဖုဝဲမုၪၥံၪဧ့ႇ 
ပၥၭမၧၫ့အဆၧၫ့အထီမုကိၭနံၩဒ့ၭ မွဲဆၧအီၪတဲၩ့ဝဲၩၥၭအဆၧၫ့အထီလီၫႉ ပကဘၪအီၪတဲၩ့ဝဲၩၥၭႇ ပကဘၪအီၪၥၭမၧၫ့ဘဲၫၥ့ၪလဲၪနီၪ ယ့ၫၡူၬဎြံၬ ဒဲအမိနးမၫရံၫ ဒဲ အဖါၦဆံၫ့ဎံၪစယိၥၭ ၥီၪ့လိၪနဲၪလိၪအ့ၪပၧၩ လၧဆၧအဒီၩ့အထ့ၬဂ့ၩဘၪႇ မွဲဝ့ၫ ဆၧအီၪၥၭမၧၫ့လၧ လၧဆၧခိၭနၪယွၩအလူအထၫဖၧၩ့နီၪလီၫႉ 
လၧပၥၭမၧၫ့မုကိၭနံၩအဖၧၩ့  ပၥ့ၪယၫလၩ့န့ပဂးႇ ပၥ့ၪယၫန့ပဆၧဆိၫ့မုလါတၭႇ ဘဲၫပၥၭအီၪဝ့ၫအၥိၭနီၪ ပကြၨၭအီၪၥၭမၧၫ့အ့ၬႉ အဆိၫထုၬ ပကဘၪအၪ့ဎၬ ဒဲ ပကဘၪအီၪၥၭမၧၫ့ ဘဲၫကဆါယွၩအဆၧဆိၫ့မုလါႇ ကဆါအၥၭႇ အဆၧဎိၭထံၫဎိၭဒီၫအီၪ လၧပဂးအၥိၭနီၪလီၫႉ 
ဘဲၫၥိၭပကၥ့ၪယွၩ အၥၭလု ဒဲယွၩအဆၧဎိၭထံၫဎိၭဒီၫအဂးနီၪ ပကခိၭနၪယွၩအလူ လၧဆၧယူယံၩ့ႇ ဆၧကယုကစုၩအဖၧၩ့တၭႇ ပကဘၪအၪ့ကံၩ့ဘၩဆိၪဖၪ ၥၭမုဆံၫ့ဎံၪယွၩအခိးအတၩလီၫႉ 
ယ့ၫၡူၬဎြံၬနီၪ မွဲယွၩလၧအဂဲၫလၩ့အၪ့န့ၦၡၩအဆၧကဲၪႇ ဂဲၫအီၪလၧပၥိၭႇ မွဲအမၫ့နုၫအ့လၭကဆါယွၩလီၫႉ လါနၫ့ဂ့ၩႇ အ့ၪပလထိးဆၧၫ့အဝ့ၫစွါဘိၩႇ အမၫ့နုၫအ့လၩကဆါယွၩနီၪ ဂဲၫအီၪလၧပၥိၭန့အ့ၬႉ ဆၧနီၪအကၠီၩ့ လၧပၥၭမၧၫ့မုကိၭနံၩဒ့ၭအဖၧၩ့ႇ ပကဘၪအီၪတဲၩ့ဝဲၩပၥၭႇ ပကဘၪဂၬဎ့ၭဆၧဒဲၩဘၭလဖၪ ဒဲလၧဆၧၥုၪ့ဂ့ၩၥၭဆံၫ့အဖၧၩ့ႇ ပကဘၪခိၭနၪယွၩအလူႇ ပကဘၪကိၭဖံၭၥိၭ ယ့ၫၡူၬဎြံၬႇ အမၫ့နုၫအ့လၭကဆါယွၩ လၧၥၭမၧၫ့ဖၧၩ့နီၪလီၫႉ