အခံးအဂၩ့ဘၪဆၧအၪ့လဲၩခွံၬအၥၭ

လၧခဲၫ့ထဲၩ့ဎူၫနံၩတၭႇ ယ့ၫၡုၬကိၭန့စပံတၧၫႇ ဒဲစယ့မံၭ ဒဲစယီဟၫ့တၭႇ လ့ၩၥိၫ့ထၪ့ဝ့ၫလၧခိၪလီၩ့ဖၭထီၫလဖျိၪ့အလီၩ့ႇ လၧဆၧကဒုၩအလးလီၫ. အခံးအဂၩ့ဘၪဆၧအၪ့လဲၩခွံၬအၥၭ လၧအဝ့ၫၥံၪအမ့ၬယၫတၭႇ- အကီၩ့အၥိၭယုၩ့ယဲဒိၪမၬတၭႇ ဘွၩထၪ့ဒိၪမၬ ဘဲၫမူၭခိၪဖီၫအၥိၭ ထီးၦအၪ့ဆူၫဝၭဆၧလၧဂၪ့ခိၪချိၫ့ မၩဘွၩထၪ့လၥ့ၪဘၪလီၫ.- စအံၫလဲယၫဒဲစမိစ့ၭ နဲၪဖျီၪထၪ့အၥၭ လၧအဝ့ၫၥံၪတၭႇ ချဲၩ့ဒုၪ့လိၬအၥၭလၧယ့ၫၡုၬလီၫ.-

စပံတၧၫချဲၩ့ထၪ့ဝ့ၫတၭႇ စံၭယ့ၫၡုၬႇ ရၭဘံၫဧ့ႇ ပအီၪထီးယီၩမုၬကၨ. ပမိမၩတဲၩနးၥၧၫ့ဖျိၪ့ႇ လၧနဂးနးဖျိၪ့ႇ လၧစမိစ့ၭအဂးနးဖျိၪ့ႇ လၧစအံၫလဲယၫအဂးနးဖျိၪ့လီၫ.- အဂဲးဘဲၫယီၩ ချဲၩ့ဆၧဘဲၫၥ့ၪ လဲၪဘဲၫၥ့ၪလဲၪနီၪႇ ၥ့ၪယၫလၩ့အၥၭအ့ၬ.

မွဲအဝ့ၫၥံၪၥၭမဲၪၥၭဖျဲၩ့ ဆၧဒိၪမၬအဂဲးလီၫ.- ဆၧအုၪ့လၩ့ကဒုၩ အဝ့ၫၥံၪတၭႇ ဆၧအလူၥီၫလၩ့လၧဆၧအုၪ့အကျၩ စံၭဝ့ၫဒၪႇ အယီၩမွဲယဖိၪခွၫၥၭဘီၩ့လဂၩတၭႇ ခိၭနၪအလူဆံၭ.- အဝ့ၫၥံၪယိဝၬဝၬချဲၫ့မၬတၭႇ အ့ၪလမွဲဘၪန့ၫယ့ၫၡုၬ ဒဲအဝ့ၫၥံၪအနၫ့ဆါလဖၪနီၪ ဒၪဘၪၦနးဂၩအ့ၬ.

အဝ့ၫၥံၪဂဲၫထဲၩ့လၩ့ဝ့ၫ လၧခိၪလီၩ့ခိၪအဘိၩ့ဘၭတၭႇ ယ့ၫၡုၬမၪလူၬဝ့ၫ ဘဲၫၥိၭၦၡၩအဖိၪခွၫယီၩ လချႃၭဂဲထုၪ့ထဲၩ့ဒံၭဘၪ လၧဆၧၥံၫအဖၧၩ့နီၪႇ ထီးလီၩဘၪဆၧလၧအဒၪဘၪနီၪ လၧၦနးဂၩလဂ့ၩႇ- ဆၧချဲၩ့လထံၪနီၪႇ အဝ့ၫၥံၪထီးန့ဝ့ၫတၭႇ စံၭလိၬအၥၭႇ ဆၧဂဲထုၪ့ထဲၩ့လၧဆၧၥံၫနီၪႇ မွဲဆၧနီၪလဲၪ.