ယိၩယိၩနံၪ့အထးဖၧၩ့ မုအီၪပွံၭနံၩ (၄)

အဲၪကွံၩဘၪထၧၫ့ဖုဝဲမုၪခွၫၥံၪဧ့ႇ 
လၧပဆၧၥၭထၪ့ထီၫအကၠီၩ့ႇ ပဆၧကၠုၪ့အကၠီၩ့ႇ ဆၧဖံၭဆၧမၩလတီၩလလီၩ့ဘၪအကၠီၩ့ႇ အ့ၪပဒၪခီၩ့ဆၧၫ့ယၫ ဆၧၡၪ့ဆၧယၬႇ ဆၧနိၫ့ဆၧနၭႇ ဆၧမၩအၧၩ့မၩနၭစွါဘိၩႇ ဆၧနီၪလဖၪနီၪ မွဲကၥိၫ့ပၧၩ လၧဆၧဆိၪဂ့ၩဆိၪဘွၩအလးအ့ၬႉ 
ဆၧဆိၪဂ့ၩဆိၪဘွၩအလ့ၩထံးလၩ့ဆ့ၭဖၧၩ့ၥၭလဖၪယီၩ ယွၩအဖၧၩ့ၥၭအကၠီၩ့ႇ လၧဆၧတီၩဆၧလီၩ့ႇ လၧၡၩခမျၧးအခိးအတၩႇ အဆၧဎူၫဆၧဎၩ့အဂးႇ လၧဆၧဆူနဲၩယွၩအဂးႇ လၧဆၧၥၭထိၬပရၧၫ့အဂး အ့ၪပဘၪထိး ဆၧၥၭၡၪ့ဆၧယၬႇ ဆၧၥုၪ့ခါၥၭလၩ့ႇ ဆၧၥၭဝံအၥၭႇ ဆၧမၩအၧၩ့မၩနၭလဖၪနီၪ ယွၩပဖ့ၪလၫ့အ့ၪပၧၩ ဆၧဆိၪဂ့ၩဆိၪဘွၩအမွဲအတီၩလဖၪလီၫႉ 
လၧဂၪ့ခိၪချိၫ့ဖၧၩ့ႇ လၧခးပယၩ့ဖၧၩ့ႇ ၦၡၩအၪစၪဆၧႇ ဘၪၡၪ့ဘၪယၬႇ ဘၪဆၧမၩအၧၩ့မၩနၬႇ မၩၥံၫမၩဆၫႇ အဂံၪ့ၥံၪဎၪ့ၥံၪ မၩဆၧမၩဂၭဂီၩ့ခွံၬႇ မၩစဲၪ့မံၩ့ဂၭဖျိၭတၭႇ ဘၪထိးနိၫ့ထိးနၭၥၭအၪမၬလီၫႉ 
ၦလၧအမၩဆၧဖံၭဆၧႇ အခိးဂဲးခိးဘၭႇ လၧၡၩခံးဂးႇ ဆၧတီၩဆၧလီၩ့အဂးႇ လၧထံၫခး အဆၧဎူၫဆၧဎၩ့ႇ အဆၧလ့ၩထၪ့လၩ့ထီၫအဂးႇ အဆၧလိၬအိၭလိၬအဂးလဖၪနီၪ ဘၪဆၧခွံၬလၩ့ဝ့ၫလၧထီၫဖၧၩ့ႇ ဘၪဆၧမၩအၧၩ့မၩနၭဒဲ ဘၪဆၧမၩၥံၫမၩဆၫဝ့ၫလီၫႉ 
လၧထီးဘဲၫယီၩ ပဆၧၥၭဝံပၥၭ ဒဲပၥူၫအီၩပၥၭ ဆၧတီၩဆၧလီၩ့ႇ ဆၧဎူၫဆၧဎၩ့ ဒဲ ပဆၧဆိၫ့မုလါလၧဂၪ့ခိၪချိၫ့ဖၧၩ့ယီၩ လၧၫ့လၧၫ့ဎွ့ၩဎွ့ၩပလဒိၭန့ဘၪလါနၫ့ဂ့ၩ လၧထီးလယၫ လၧမူၭခိၪအဖၧၩ့နီၪ ယွၩကဖ့ၪလၫ့ပၧၩ ဆၧဆိၪဂ့ၩဆိၪဘွၩထီးလူၬလီၫႉ 
လၧပဆၧၥၭမၧၫ့မုနံၩအထးဖၧၩ့ယီၩ ပဘၪထိးဆၧၡၪ့ဆၧယၬႇ ဆၧၥုၪ့ခါၥၭလၩ့ႇ ဆၧၥၭဝံပၥၭႇ ဆၧမၩအၧၩ့မၩနၭလဖၪနီၪ ပထိးကန့ဝ့ၫအဂး ပကဘၪအီၪၥၭမၧၫ့ လၧဆၧခိၭနၪယွၩအလူအထၫႇ လၧဆၧအၪ့ကံၩ့ဘၩဆိၪဖၪဆၧ ဆၧၥုၪ့ဆၧၩ့ၥၭဆၧၩ့ ဒဲဆၧၥုၪ့ဆံၫ့ၥၭဆံၫ့အဖၧၩ့နီၪလီၫႉ