ယိၩယိၩနံၪ့အထးဖၧၩ့ မုအီၪပွံၭနံၩ (၂)

ခၫ့ဖျီၫ့လၧပဒိၭန့ဆၧၥူၫဝၭဆံၫ့ဎံၪစကရၫမဲၩတူၩတၭႇ ပကဲၪထၪ့ ဎြံၬဖိၪၥံၪ ဒဲ ပကဲၪထၪ့ ၦဆၧအၪ့မၧၫ့ဖိၪၥံၪလၧအထိးအၥၭ လၧယွၩအဖိၪခွၫယ့ၫၡုၬဎြံၬအဂဲးလီၫႉ 
ပမိပဖါႇ ပဆရၫၥံၪႇ စဲၫၥံၪၥၫ့ခၫၥံၪႇ အ့ၪလထိးဘၪအၥၭႇ အ့ၪလဂဲၫထဲၩ့ၥီၪ့လိၪနဲၪလိၪအ့ၪပၧၩ ယွၩအဂဲးစွါဘိၩႇ  ပထီၩ့လၧဆၧဆူနဲၩအလးအီၪအ့ၬႉ 
ပမိပဖါႇ ပဖံၫပဖူၫၥံၪႇ ပဆရၫႇ ၥၫ့မုၥၫ့ခၫလဖၪဆ့ႇ လဆိၩဘၪလဆိၩႇ လဆၫ့ဘၪလဆၫ့ႇ ဂဲၫထဲၩ့နါဂၧၫ့ဘၪ ကၠဲၬလူကၠဲၬထၫႇ ဒဲဆၧၥၭထိၬပရၧၫ့လီၫႉ ဆၧလၧအဝ့ၫၥံၪနါဂၧၫ့ဘၪႇ ဆၧလၧအဝ့ၫဆူနဲၩဝ့ၫႇ ဒဲဆၧဂ့ၩဆၧဘွၩႇ ဆၧတီၩဆၧလီၩ့နီၪႇ အဝ့ၫၥံၪ ဂဲၫထဲၩ့ၥီၪ့လိၪနဲၪလိၪထဲၩ့အ့ၪပၧၩလီၫႉ 
ခၫ့ဖျီၫ့လၧ ဆၧၥူၫဝၭဆံၫ့ဎံၪ စၭကရၫမဲၩတူၩတၭႇ ပကဲၪထၪ့ယွၩအဖိၪအလံၩႇ ပကဲၪထၪ့ယ့ၫၡုအထံၩအဖျဲႇ ဒဲၦအထိးအၥၭ ပဝ့ၫဒၪလဖၪယီၩ 
အဆိၪထုၬႇ ပကဘၪဖိၬယွၩအၥိၪဖိၪအခဲၫ့ႇ ပကဘၪယိဒီၩ့ အဝ့ၫနီၪလီၫႉ ယွၩအၥိၪဖိၪ ယ့ၫၡုၬဎြံၬနီၪ ခၫ့ဖျီၫ့လၧ အဆၧထိနိၫ့ထိးနၭႇ ဒဲထိၥံၫၥၭတၭႇ ဆိၬန့ခွံၬဂၪ့ခိၪဖိၪအဆၧဒဲၩဘၭလီၫႉ ပဝ့ၫဒၪလဖၪယီၩ ဘဲၫယွၩအၥိၪဖိၪအၥိၭႇ ပကဆိၬန့ခွံၬဂၪ့ခိၪဖိၪအဆၧဒဲၩဘၭအဂး ပစီၩ့ပမၩ့ႇ ပဂဲးပဘၭလအီၪဘၪလါနၫ့ဂ့ၩႇ လၧနၫ့ဆါဒၪဝ့ၫအဖၧၩ့ႇ လၧပခရၧၫ့ဖၧၩ့ႇ လၧဂၪ့ခိၪချိၫ့ဖၧၩ့ႇ ဆၧအၧၩ့ဆၧၥၫ့ႇ တခ့ၭဖဝၭလဂ့ၩဘၪႇ ဒဲဆၧလတီၩလလီၩ့ဘၪ ကလၩ့ၡၩခွံၬအဂး ပကဘၪဖ့ၪလၫ့လၩ့ၥၭႇ ဒဲပကဘၪခိးဂဲးခိးဘၭကိၭဂၩဒ့ၭလီၫႉ 
နံၫထုၪလထုၪနီၪႇ ပကဘၪယိဒီၩ့ႇ စယီဟၫ့ဘၭတံၫစတၩ ဒဲၦဆံၫ့ဎံၪလဖၪနီၪလီၫႉ ဘဲၫအဝ့ၫၥံၪအၥိၭႇ ပကဘၪထိးပၥၭႇ ပကဘၪဆုးၥီၪ့လိၪနဲၪလိၪအ့ၪ ပဖိၪပလံၩၥံၪ ကၠဲၬလူၬကၠဲၬထၫ ဒဲဆၧတီၩဆၧလီၩ့ႇ ဆၧဂ့ၩဆၧဘွၩလဖၪ ခၫ့ဖျီၫ့လၧ ပဆၧချဲၩ့ ဒဲဆၧအဒီၩ့ဂ့ၩထ့ၬဘၪလဖၪနီၪလီၫႉ