ယိၩယိၩနံၪ့အထးဖၧၩ့ႇ မုအီၪပွံၭနံၩႇ မုနွ့ၫ(၁၆)

ထၧၫ့ဖုဝဲၦဆူနဲၩဖိၪထီးလူၬၥံၪဧ့ႇ လၧလံၬဆံၫ့ဎံၪအဖၧၩ့ယီၩ ပဒၪဘၪကဆါယ့ၫၡူၬဎြံၬ လလီၩဂ့ၩဘၪနးမၫၥၫ ဒဲအၪ့အူၭအၪ့ဎၩ့ဘၪနးမၫရံၫနီၪလီၫႉ  ၦလၧကဘုၪအၪ့ဘုၪအီၩဝ့ၫအဂး ဆၧမၩဘိၪ့လၫ့ဘဲၩ့လၫ့နးမၫၥၫလဂၩယီၩ ဘၪနီၫလၧကဆါဎြံၬလလီၩဂ့ၩဘၪအဝ့ၫနီၪလဲၪႉ

ပအၪ့ဂၬထိဆၧၫ့ၦမွံၩလၧဆၧဘုၪအၪ့ဘုၪအီၩနီၪ အကၧၩ့ဒိၪဝ့ၫဒၪလါနၫ့ ပထိးဆၧၫ့လၧဆၧအၪ့ကမံၩ့ဎးလၧၩ့နီၪ လၧၫ့ဎွ့ၩလန့ဒံၭဘၪဒဲ ပကဘၪအၪ့ဂၬထိးဆၧၫ့ဝ့ၫဒၪလၧဆၧချဲၩ့လဖၪ လကၭဒံၭဘၪ ကယဲအဝ့ၫၥံၪအဲၪဒိၭချဲၩ့ဆၧလဖၪ ပကဘၪဒီၪနါခိၪအ့ၪနီၪလီၫႉႉႉႉ

ဘဲၫၥိၭပၥၭလဖျိၪ့ကမၧၫ့ဝ့ၫဒၪအဂး ပကျ့ၭစၨၭခိးဂဲးခိးဘၭ မၩအၪ့ဖံၭအၪ့နီၪ မငါဝ့ၫဒၪလါနၫ့ ပမၩအၪ့ဖံၭအၪ့ထီးပဘိၪ့ထၪ့ဘၩထၪ့ယွၩအခံၫ့လအီၪဘၪနီၪ မွဲလမငါလၧၩ့ဘၪနီၪလီၫႉ ပအၪ့ပအီၩအဂး ဘဲၫပဖ့ၪလၫ့အခံၫ့အၥိၭႇ ဆၧဘိၪ့ထၪ့ဘၩထၪ့ယွၩအဂးဆ့ ပကဘၪအီၪက့ၪထၭအခံၫ့နီၪလီၫႉ

ၦလၧအဖီၪ့ထၪ့ဖံၭထၪ့ဆၧအဲၪဆၧကွံၩဆၧမၩလဖၪနီၪ အ့ၪမွဲလဖ့ၪလၫ့ဘၪအခံၫ့လၧကဘၪချဲၩ့ဒုၪ့ ဆၧအဲၪဆၧကွံၩအကဆါဒဲ ကဘၪဘိၪ့ထၪ့ဘၩထၪ့ဆၧအဲၪဆၧကွံၩအကဆါအဂးစွါဘိၩ အဝ့ၫၥံၪအဆၧမၩနီၪ အခိးအတၩမွဲလအီၪလၧၩ့ဘၪလၧၫ့လၧၫ့ဎွ့ၩဎွ့ၩနီၪလီၫႉ

ၦလၧဘၪဖီၪ့ထၪ့ဖံၭထၪ့ ဆၧအဲၪဆၧကွံၩဆၧမၩလဖၪမွဲဂ့ၩႇ ၡၩခရၧၫ့အဆၧဖံၭဆၧမၩလဖၪမွဲဂ့ၩႇ ကဘၪဖ့ၪလၫ့အခံၫ့လၧဆၧဘိၪ့ထၪ့ဘၩထၪ့ကဆါယွၩဒဲ ကဘၪချဲၩ့ဒုၪ့လိၬၥၭလၧကဆါယွၩနီၪလီၫႉႉႉဆၧဒိၭနဲၩ့ထၪ့ၥၭလၧယွၩအ့ၪလအီၪဘၪစွါဘိၩႇ ကကဲၪထၪ့ဝ့ၫဒၪဆၧပျီၩပျီၩနီၪလီၫႉ