ယိၩယိၩနံၪ့အထးဖၧၩ့ႇ မုနွ့ၫ(၃၁) နွ့ၫလနွ့ၫ

ကဆါယ့ၫၡူၬဂဲၫလၩ့အၪ့န့ၦၡၩအဆၧကဲၪႇ အဆၧအီၪဖျဲၪ့ထၪ့ႇ အဆၧအီၪမၧၫ့အီၪဂဲၩႇ အဆၧမၩဘျၪထဲၩ့ၦစူၭၦဆၫႇ အဆၧလီၩ့လၩ့လၬလၩ့ဆၧၥၭထိၬပရၧၫ့ႇ အဆၧထိးနိၫ့ထိနၭႇ အဆၧထိးၥံၫၥၭလၧထုၪ့စူၪယၫလီၩ့ႇ အဆၧဂဲထုၪ့မၧၫ့ထၪ့ထဲၩ့လၧဆၧၥံၫႇ ဒဲအဆၧထဲၩ့ထၪ့ထဲၩ့လၧမူၭခိၪႇ ဆၧထီးလူၬလဖၪယီၩ မွဲဝ့ၫကဆါယွၩအဆၧထိထဲၩ့တၩ့ထဲၩ့ဆၧမၩလီၫႉ

 လၧဆၧၥၭထိၬပရၧၫ့လနံၩယီၩအဖၧၩ့ ယ့ၫၡူၬစ့ၭဝ့ၫႇ

 ၦၡၩအဖိၪခွၫယီၩ ဂဲၫလၩ့ဝ့ၫ ဘဲၫၥိၭအမိအၪ့ဎၬန့ႇ ဒဲထိးထဲၩ့တၩ့ထဲၩ့ ၦလၧအလၩ့မါဝ့ၫလဖၪလီၫႉ ယ့ၫၡုၬနီၪ မွဲၦယူၬၥိၪအဂ့ၩ လၧအလီၩဎွါန့ထဲၩ့ အၥိၪလၧအလၩ့မါလဖၪနီၪလီၫႉ

ၦၡၩအဂ့ၩႇ အတီၩအလီၩ့မွဲဂ့ၩႇ အအၧၩ့အၥၫ့ႇ လတီၩလလီၩ့ဘၪမွဲဂ့ၩႇ ၦၡၩထီးလူၬယီၩ ဘၪဆၧတဲၩ့လၩ့ထၬ ဘဲၫယွၩအဂၩ့ၥိၭအကၠီၩ့ႇ အကၧၩ့ဒိၪကိၭဂၩဒ့ၭလီၫႉ

ကဆါယွၩနီၪ လီၩ့အၪ့ဎၬန့ထဲၩ့ ၦဆၧဒဲၩဖိၪလၧအလၩ့မါလဖၪ ကိၭအဆၧၫ့အထီဒ့ၭလီၫႉ ဆၧဒဲၩဘၭဖိၪလဂၩဂၩ အ့ၪအၥၭအီၪမိဒၪဘၪစွါဘိၩ ဘဲၫစဇၭခံအၧၭအၥိၭႇ ကဒၪဘၪယ့ၫၡူၬႇ ကထိးဆၧၫ့အဝ့ၫႇ ကန့ဘၪဆၧၥုၪ့မုၬၥၭပျၩ့ႇ ဒဲအလးခဲၫ့ထုၬႇ ကဒိၭန့ဘၪယ့ၫၡူၬဎြံၬအဆၧထိးထဲၩ့တၩ့ထဲၩ့လီၫႉ

ဆၧဒဲၭဘၭလၧအဆၧဆၪ့လၩ့ၥၭလအီၪႇ လအမိထိးဒၪဘၪၥၭႇ ယ့ၫၡူၬဒၪအဝ့ၫႇ ကမိဂဲၫလအဝ့ၫအအီၪႇ ႇ ကမိဖ့ၪလၫ့ဝ့ၫအခိးအတၩလါနၫ့ဂ့ၩ အဝ့ၫလထိးဆၧၫ့ဘၪဝ့ၫအကၠီၩ့ ယ့ၫၡုၬဂဲၫလအအီၪအလးအီၪအ့ၬႉ

စဇၭခံအၧၭႇ မွဲၦအကဲၪဒိၪႇ လၧၫ့ဎွ့ၩလၧအစူၪလးခၪ့ခိၪလါနၫ့ႇ အၥၭထၪ့ထီၫအ့ၬႉ အဝ့ၫကဒၪဘၪယ့ၫၡုၬအဂးႇ ထၪ့လၧၥံၪ့ခံၫႇ ၦၡၩဒၪအဝ့ၫလါနၫ့ အဝ့ၫမ့ၬမဲအ့ၬႉ

ထၧၫ့ဖုဝဲမုခွၫထီးလူၬၥံၪဧႇ

ၦအကဲၪအဒိၪလနၩ့နၩ့ အီၪက့ၪထၪ့ထီၫအၥၭႇ စီၪဎိၩလၩ့ၥၭႇ ဒဲစီၪဆံၭၦဂူၫႇ ဒၪၦၡၪ့ဖိၪယၬဖိၪအိၭအ့ၬႉ ၥ့ၪယၫဒိၭနဲၩ့ၥၭလၧအံၩ့လူကၠဲၬထၫအ့ၬႇ ဒဲၥ့ၪယၫမၩဘိၪ့မၩထးဆၧဆ့အ့ၬႉ ဆၧနီၪအကၠီၩ့ ယ့ၫၡုၬစံၭထၬဝ့ၫႇ ၦၥထံၫၥံၪနီၪ ဘၪလ့ၩနုၬဝ့ၫ လၧမူၭခိၪအဘၩ့အမုးဖၧၩ့ကၪမၬလီၫႉ ကလအုၭနုၬဖျီၫ့ထၬမ့ခဲၫ့ယီၫနဲၪဒံၭ ၦၥထံၫလဂၩလ့ၩနုၬလၧမူၭခိၪဘၩ့မုးဖၧၩ့ဒံၭလီၫႉ

လါနၫ့ဂ့ၩ ၦကဲၪဒိၪ ဘဲၫစဇၭခံအၧၭအၥိၭ အီၪဝ့ၫဆ့လီၫႉ ၦၥထံၫလၧအၥုၪ့ဂ့ၩၥၭဘွၩအီၪႇ လၧအဒိၭနဲၩ့အၥၭလၧယွၩႇ

အီၪၥၭမၧၫ့လၧဆၪ့လၩ့ၥုၪ့ဆၪ့လၩ့ၥၭႇ ဒဲစံၭထၪ့အူၭယွၩအခိးအတၩႇ ၦၥထံၫလၧအမၩဘိၪ့မၩထးဆၧႇ ဒဲအယၫ့ၥၭမၩဆၧၦၡၪ့ဖိၪယၬဖိၪအီၪဝ့ၫဆ့လီၫႉ

စဇၭခံအၧၭယီၩ လၧၫ့ဎွ့ၩဝ့ၫလၧအစူၪလးခၪ့ခိၪလါနၫ့ဂ့ၩႇ အဝ့ၫဘၪလိၫ ဆၧမုၬဆၧၡူၪႇ ဆၧအဲၪဆၧကွံၩႇ ယွၩဆၧအခိးအတၩလီၫႉ အဝ့ၫနီၪ မွဲဝ့ၫၥိၪအလၩ့မါလဒုၩလီၫႉ ၦၡၩကိၭဂၩဒ့ၭယီၩ မွဲဝ့ၫၥိၪလၧအလၩ့မါႇ ၥိၪလၧအဘၪလိၫယွၩအခိးအတၩကိၭဂၩဒ့ၭလီၫႉ

ကဆါယ့ၫၡုၬနီၪ ကိၭဖံၭၥိၭၦၡၩကိၭဂၩဒ့ၭ ကဖိၬထၪ့အခဲၫ့ႇ ကဖိၬထၪ့ဖၧၩ့ၥၭလၧ အၥိၫ့ပၧၩ လၧဆၧထိးထဲၩ့တၩ့ထဲၩ့အလးနီၪလီၫႉ ၦဆၧဒဲၩဘၭဖိၪ လၧအထိးဆၧၫ့ဆါယ့ၫၡူၬအဆၧဖံၭၥိၭလဖၪနီၪ ကဘၪအၪ့လဲၩ့ထၪ့ၥၭ ဘဲၫစဇၭခံအၧၭအၥိၭနီၪလီၫႉ ပၥုၪ့ပၥၭႇ အီၪက့ၪၥုၪ့အီၪက့ၪၥၭႇ ပဆၧဖံၭဆၧမၩႇ ပတခ့ၭဖဝၭ လဂ့ၩဘၪႇ လတီၩဘၪလဖၪနီၪ ပဘၪအၪ့လဲၩ့ထၪ့ထဲၩ့လၧအဂ့ၩအတီၩနီၪလီၫႉ လၧလံၬဆံၫ့ဎံၪလနံၩယီၩအဖၧၩ့ႇ စဇၩခံအၧၭအၪ့လဲၩ့ထၪ့ၥၭအဂဲးနီၪ ပနါဂၧၫ့ဘၪလၧအဝ့ၫအဆၧချဲၩ့ဖၧၩ့နီၪလီၫႉ

စဇၭခံအၧၭဆၧၫ့ထုၪ့တၭ, လီၩဘၪကဆါနီၪ,ယိခွါ, ကဆါဧ့, ယစူၪလးယခၪ့ခိၪနံၫပိၩ့နီၪ, ယဖ့ၪလၫ့ၦၡၪ့ ဖိၪလပိၩ့လီၫ. တၭယအ့ၪအၪ့မၩန့ ၦလဂၩဂၩအဆၧလၧ ကဘျံၭကဘျၪလမံၩ့မံၩ့နီၪ,ယမိဖ့ၪလၫ့ထဲၩ့ အၪနဲၪ့အလးလံစၩလီၫ.-

ၦယ့ၫရခိၫဖိၪလဖၪနီၪ စီၪဆံၭ စဇၭခံအၧၭႇ ဒၪဝ့ၫအိၭအ့ၬႇ မၩထံၩမၩၥိၭလၧအဝ့ၫဆ့အ့ၬႉ လါနၫ့ဂ့ၩ လၧကဆါယ့ၫၡူၬအဂး ၦၡၩကိၭဂၩဒံၭနီၪ အလူၬဒိၪဎွ့ၩဒိၪဒဲ အီၪဝ့ၫလၧအလၩအဖၩ့ကိၭဂၩဒ့ၭလီၫႉ အၪဒၪဆၧႇ ၦစူၭၦဆၫႇ ၦၡၪ့ဖိၪယၬဖိၪႇ ၦဆၧဒဲၩဘၭဖိၪလဖၪနီၪ ၦၡၩစီၪဆံၭႇ ၦၡၩမိမၩထံၩမၩၥိၭအ့ၬႉ လါနၫ့ဂ့ၩ ဆါယ့ၫၡုၬမၩထံၩမၩၥိၭလၧအဝ့ၫၥံၪ ဒဲ ယၫ့ၥၭမၩဆၧၩ့အဝ့ၫၥံၪလီၫႉ

ဆၧနီၪအကၠီၩ့ ပဝ့ၫဒၪၦလၧဖိၬဆါဎြံၬအခဲၫ့လဖၪယီၩ ပကဘၪယိဒီၩ့ ဆါယ့ၫၡူၬနီၪလီၫႉ ၦၡၩကိၭဂၩနီၪ ကၠဲၬတဲၩ့လၩ့ထၬဘဲၫအဂၩ့တၭႇ အီၪဝ့ၫလၧၡၩအလၩအဖၩ့အကၠီၩ့ႇ ပအီၪစီၪဆံၭန့အ့ၬႇ ပအီၪပဲၩ့ခွံၬထၬန့အ့ၬႉ ဘဲၫယွၩဂဲၫအီၪလၧပၥိၭႇ ဂဲၫမၩထံၩမၩၥိၭပၧၩ ယၫ့ၥၭမၩဆၧၩ့အၥိၭႇ ပကဘၪ ကွဲၪဖျါလိၬၥၭႇ နၪၥ့ၪလိၬၥၭႇ မၩခိးမၩလိၬၥၭနီၪလီၫႉ