ယိၩယိၩနံၪ့အထးဖၧၩ့ႇ မုနွ့ၫ(၃၀) မုအီၪပွံၭနံၩ

အဲၪကွံၩဘၪထၧၫ့ဖုဝဲထီးလူၬၥံၪဧ့ႇ

ကနံၩယီၩ ယိၩယိၩနံၪ့အထးဖၧၩ့ႇ  မုနွ့ၫ(၃၀) နွ့ၫလနွ့ၫႇ မုအီၪပွံၭနံၩလီၫႉ

အ့ၪမွဲပကယိထဲၩ့လၧဂၪ့ခိၪချိၫ့ဖၧၩ့ယီၩ့ ပကဒၪဘၪၦၡၩအၪမံၩ့အၪမၠိၩ့နီၪလီၫႉ ၦၡၩကနၩ့နၩ့အီၪအၪ့လ့ၩထဲၩ့လၧၦဂူၫဂၩၥ့ၪဝ့ၫဒၪ ဎူၫဎူၫဎၩ့ဎၩ့လါနၫ့ ၦၡၩကနၩ့နၩ့အီၪအၪ့လ့ၩထဲၩ့လၧၦဂူၫဂၩ မွဲလၥ့ၪဘၪဎူၫဎူၫဎၩ့ဎၩ့နီၪလီၫႉ ၦၡၩကနၩ့နၩ့ၥ့ၪယၫၦဂူၫဂၩအခိးအတၩႇ ကနၩ့နၩ့လၥ့ၪယၫၦဂူၫဂၩအခိးအတၩ ဒဲၦၡၩကနၩ့နၩ့ဖ့ၪခိးဖ့ၪတၩ ဒဲကဲၪခိးကဲၪတၩၦဂူၫဂၩႇ ၦၡၩကနၩ့နၩ့အဲၪတၩ့ထၬၥၭ လၧအအဲၪလၩ့န့ၫအၥၭတၭႇ လမၩခိးမၩတၩဘၪႇ လကဲၪခိးကဲၪတၩဘၪၦဂူၫဂၩနးမံၩ့နီၪလီၫႉ

ၦၡၩအလၩ့ဆၫ့အီၪဝ့ၫဒၪနံၫမံၩ့နီၪလီၫႉ ၦၡၩအလၩ့ဆၫ့အဆိၪထုၬကမံၩ့နီၪ မွဲဝ့ၫဒၪၦလၧအအီၪက့ၪထၪ့ထီၫအၥၭ ဒဲလခဲၫ့ကမံၩ့နီၪ မွဲဝ့ၫဒၪၦလၧအအီၪဆၪ့လၩ့အၥၭနီၪလီၫႉ ၦလၧအအီၪက့ၪဆၪ့လၩ့အၥၭလဖၪနီၪ အီၪအၪ့လ့ၩထဲၩ့လၧၦဂူၫဂၩၥ့ၪဝ့ၫဎူၫဎူၫဎၩ့ဎၩ့ႇ ၥ့ၪယၫၦဂူၫဂၩအခိးအတၩ လကၭဒံၭဘၪ မၩဆၧၩ့ထဲၩ့ၦၡၩ လၧဆၧၥုၪ့ဂ့ၩၥၭဘွၩအဖၧၩ့နီၪလီၫႉ ၦလၧအအီၪက့ၪဆၪ့လၩ့ၥၭကဂၩ အဆၧလူဆၧချဲၩ့ႇ အဆၧဖံၭဆၧမၩကိၭမံၩ့ဒ့ၭနီၪ ကဲၪခိးကဲၪတၩ လၧၦဂူၫဂၩအဂးနီၪလီၫႉ ၦၡၩဘဲၫယီၩၥိၭလဖၪနီၪ ပစံၭဝ့ၫၥ့ၪလၧၦလၧအလူအဎွ့ၩအီၪနီၪလီၫႉ ၦၡၩဘဲၫယီၩၥိၭလဖၪ ကြၨၭအီၪဝ့ၫဒၪ  လၧၡၩခရၧၫ့ဖၧၩ့အၪအၪလ့ၬနီၪလီၫႉ

ၦလၧအအီၪက့ၪဆၧၥၭထၪ့ထီၫလဖၪနီၪ တခၩဒၪကအၪ့ဎၬထၪ့ဆၧနးမံၩ့ႇ တခၩဒၪကလူကချဲၩ့ဆၧနးမံၩ့ႇ တခၩဒၪကမၩဆၧနးမံၩ့နီၪ လကဲၪခိးကဲၪတၩဘၪၦဂူၫဂၩ ဒဲၦဂူၫဂၩအဂး မၩကဲၪထၪ့ဝ့ၫဒၪ ဆၧအအၧၩ့လဖၪနီၪလီၫႉ ၦလၧအအီၪက့ၪထၪ့ထီၫအၥၭလဖၪနီၪ စီၪဎိၩစီၪဒိၪလၩ့ၥၭႇ စီၪဆီၫ့မီၪ့လၩ့ၥၭ ၦၡၩဂ့ၩဘိၩၥိၭအဝ့ၫၥံၪအီၪနးဂၩအ့ၬႉႉႉ

လၧဂၪ့ခိၪချိၫ့ဖၧၩ့ယီၩ ဆၧမၩလၧမုၪခီၩလဲး မၩလန့ဘၪဒဲမၩလနၧၩ့ဘၪ အီၪဝ့ၫဒၪကမံၩ့တၭ အနီၪမွဲဝ့ၫ ဆၧအီၪက့ၪဆၪ့လၩ့ၥၭနီၪလီၫႉ နၧၩဒဲယၧၩ ၦဝ့ၫၥံၪကိၭဂၩဒ့ၭ မုကနံၩယီၩ ပကဘၪဆီၫ့မီၪ့အၪ့ဎၬလၩ့ထဲၩ့ပၥၭ ပမွဲဝ့ၫၦလၧအအီၪဆၧၥၭထၪ့ထီၫဧၪႇ ပမွဲၦလၧအီၪက့ၪဆၧဆၪ့လၩ့ၥၭကဂၪဧၪႉ ပလ့ၩထၪ့ၥရိၭဂီၩ့ ပဂဲၫထဲၩ့လၧပဂံၪ့ လၧဆၧစၧၩ့ထၬအဖၧၩ့ဧၪႇ အ့ၪလမွဲဘၪဘိၩ့ႇ ပကဂဲၫထဲၩ့ထဲၩ့ လၧဆၧကွဲၪဖျါခွံၬအဖၧၩ့ဧၪႉ အ့ၪမွဲပအဲၪဒိၭဂဲၫထဲၩ့ထဲၩ့ လၧဆၧကွဲၪဖျါခွံၬအဖၧၩ့ဖၧၩ့စွါဘိၩ ပကဘၪကျ့ၭစၨၭအီၪမၧၫ့ထၪ့ပၥၭမၧၫ့ လၧဆၧအီၪက့ၪဆၪ့လၩ့ၥၭအဖၧၩ့နီၪလီၫႉ