ယိၩယိၩနံၪ့အထးဖၧၩ့ႇ မုနွ့ၫ(၂၉) နွ့ၫလနွ့ၫ

 ပအီၪလၧဂၪ့ခိၪချိၫ့ဖၧၩ့ယီၩအထီ          ဘဲၫၥိၭပလလၩ့ဘၧၩ့ခွံၬဘၪလၧဂၪ့ခိၪအဆၧမုၬဆၧလၩအဖၧၩ့အဂး ပကဘၪအီၪမၧၫ့အီၪဂဲၩဝ့ၫဒၪလၧ ဆၧထုၪ့ၥုၪ့ထုၪ့ၥၭဒိၪဒိၪလ့ၬအဖၧၩ့နီၪလီၫႉ ပဝ့ၫၥံၪယီၩ ပမွဲၦလၧအဂဲးဆါဘၭဆါလဖၪတၭႇ ပၥၭအီၪပအဲၪဒိၭမၩဆၧအဂ့ၩလဖၪလါနၫ့ ပမၩၥ့ၪထဲၩ့ဝ့ၫဒၪလၧ ဆၧအအၧၩ့လဖၪတၭႇ ဘဲၫၥိၭပအီၪမၧၫ့လၧဆၧၥၭမၧၫ့အဂ့ၩအဘၪအဖၧၩ့ ကၥ့ၪဝ့ၫအဂး ၦဆံၫ့ဎံၪဂၠိၫ့ခရံၫစီစတိၫစံၭထၭဝ့ၫလၧႇ ပအၪ့ကံၩ့ဘၩဆိၪဖၪအ့ၪလအီၪဘၪနီၪ ပအီၪမၧၫ့ပဆၧၥၭမၧၫ့လၧအဂ့ၩအဖၧၩ့ မွဲလၥံၪဘၪနီၪလီၫႉ

နၧၩမွဲဂ့ၩႇ ယၧၩမွဲဂ့ၩႇ ၦထီးလူၬယီၩ ပကဘၪကဲၪထၪ့ ဂၪ့ခိၪအဆၧဖၩ့လဖၪနီၪလီၫႉႉႉလၧပအီၪက့ၪလူဒိၪဎွ့ၩဒိၪ ကျိၪစ့ၩႇ စူၪလးခၪ့ခိၪအလးနီၪ ပအီၪက့ၪလူဒိၪဎွ့ၩဒိၪဝ့ၫဒၪ ဆၧအၪ့ကံၩ့ဘၩဆိၪဖၪ ဒဲလၧမုကိၭနံၩဒ့ၭပဆၧၥၭမၧၫ့အဖၧၩ့ ပကဘၪကျ့ၭစၨၭအီၪမၧၫ့ထၪ့ဝ့ၫဒၪလၧ ဆၧအၪ့ကံၩ့ဘၩဆိၪဖၪအဖၧၩ့နီၪလီၫႉ

ထီးနီၪ ပကဘၪဂၭဎ့ၭခၫ့ဂၬခွံၬ ဆၧလၧအဂၭဂီၩ့ဂၭစၪၥ့ၪဝ့ၫဒၪ ဂၪ့ခိၪအဆၧမုၬဆၧလၩလဖၪတၭႇ ကဆါယွၩအဆၧဆိၫ့မုလါအီၪလၧပဖၫ့ခိၪ ဘဲၫၥိၭပကဒိၭန့ထဲၩ့ဘၪ မူၭခိၪအဘၩ့အမုးဆၧမုၬဆၧၡူၪလဖၪနီၪလီၫႉ ဘဲၫၥိၭပဝဲထၪ့ မူၭခိၪဘၩ့မုးအတရၫ့ကန့ဝ့ၫအဂးႇ ၦဆံၫ့ဎံၪအီဂၭတံၩစံၭထၭဝ့ၫႇ ဆၧအၪ့ကံၩ့ဘၩဆိၪဖၪယီၩ မွဲဝ့ၫဒၪနိၪဝံၬနီၪလီၫႉ

ဆၧအၪ့ကံၩ့ဘၩဆိၪဖၪနီၪ လၧပဂး မွဲဝ့ၫဒၪစူၪဝဲၩကမံၩ့တၭႇ ဘဲၫပခၫ့ဂၬခွံၬမူၪခီၩလဲးအဆၧဒုၪဒွ့ၪကန့ဝ့ၫအဂး ပကဘၪအီၪက့ၪဖီၪ့ဂုးထၭဝ့ၫဒၪ ဆၧအၪ့ကံၩ့ဘၩဆိၪဖၪအစူဝဲၩနီၪလီၫ