ယိၩယိၩနံၪ့အထးဖၧၩ့ႇ မုနွ့ၫ(၂၈) နွ့ၫလနွ့ၫ

လၧလံၬဆံၫ့ဎံၪကနံၩယီၩအဖၧၩ့ႇ ၦခံၫထူၬဆၫအၧၩ့ဆံၫဂၩ လၧဆံၫ့ထၪ့ထဲၩ့လဖၪနီၪႇ ကဘၪဂဲၫထဲၩ့စံၭထၪ့အၪ့အူၭယွၩအဂး ယ့ၫၡူၬမၪလူၬအဝ့ၫၥံၪအ့ၬႉ စၭထၪ့ခီၫလၧပဖိၪၥၪဆံၭအခၫႇ ထီၩ့လၧမုၪဆၫလနံၩယီၩႇ ပထီးနဲၪ့မၩလိၪထၭဘၪ လၧလံၬစီၩ့ဖၧၩ့ႇ လၧပမိပဖါႇ ပဆရၫၥံၪအအီၪႇ မွဲဝ့ၫႇ ပကၥ့ၪယၫဆၧအခိးအတၩနီၪလီၫႉ

ယွၩလၧအတဲၩ့လၩ့ထၭၦၡၩနီၪ ဖ့ၪလၫ့ထၭဝ့ၫ ဆၧကိၪ့ၥ့ၪကိၪ့ဘၪႇ ဆၧၥ့ၪယၫနၪၥ့ၪဆ့လီၫႉ ၦခံၫထူၬဆၫအၧၩ့လၧယ့ၫမၩဆံၫ့ထၪ့ထဲၩ့လဖၪႇ ကဂဲၫထဲၩ့စံၭခိးစံၭတၩအဝ့ၫအဂးႇ ယ့ၫၡူၬလမၪလူၬဘၪဝ့ၫလါနၫ့ႇ အဝ့ၫၥံၪ အဆိၪထုၬ ကြၨၭဂဲၫထဲၩ့စံၭထၪ့အၪ့အူၭယွၩအခိးအတၩလီၫႉ

ဘိၪ့ဆံၫ့ဎံၪစရမဲၩတူၩနီၪ လၧဂရံအလုႇအဆၧချဲၩ့ခီၫနီၪ ပကိၭဝ့ၫႇ Eucharist လီၫႉ အခီၫပယီၫနီၪ မွဲဝ့ၫ ဆၧစံၭထၪ့အၪ့အူၩဆၧအခိးအတၩလီၫႉ ဆၧဘဲၫနီၪအကၠီၩ့ႇ အ့ၪပလ့ၩထၪ့မံၩဆၩဆၧလုထၪ့ဆံၫ့ဎံၪစွါဘိၩႇ ဆၧချဲၩ့ႇ ဆၧစံၭထၪ့အၪ့အူၭဆၧအခိးအတၩနီၪ ပကနါဂၧၫ့ဘၪ အၪကၠၪအၪဘျၩ့နီၪလီၫႉ

အဆိၪထုၬႇ ပဖီလၩ့လံၬဆံၫ့ဎံၪအထုၬနီၪ ၦဖီဆၧစံၭဝ့ၫႇ မွဲကဆါယွၩအလူအထၫလီၫႉ ၦခမျၧးစံၭဆၧၫ့ထဲၩ့ႇ ပစံၭခိးစံၭတၩကဆါယွၩလီၫႉ

လၧဆၧပစံၭခိးစံၭတၩနၧၩ ထံၫဎးဘီၩ့ဎးဒဲဎံၩ့ဎီၩနီၪ မွဲအကြၨၭဘၪတီၩလီၩ့ၡါမၬႇ မွဲဆၧမၩန့ဆၧထိးထဲၩ့တၩထဲၩ့ဆိၩကၠၪဆ့လီၫႉ

ၥၫ့ခၫလချူၭမၩကဲၪထၪ့ဒံၭဘၪကိၪဒဲစဘံၭထံၫ လၧဎြံၬအၥွံၪအယၫနီၪႇ ယ့ၫၡူၬမၩန့ကိၪတၭႇ စံၭခိးစံၭတၩဝ့ၫလီၫႉ မၩန့လိၫ့ဆ့တၭႇ စံၭခိးစံၭတၩဒီၭလီၫႉ

ၦၡၩအနးခီၫ့နးၥၭနီၪ ဘၪဆၧမၩကဲၪထၪ့လၧယွၩႇ အီၪဂဲၫလၧယွၩအအီၪလီၫႉ ယွၩအခိးအတၩအ့ၪလပၫဘၪနီၪ ၦၡၩအၥၭမၧၫ့နးဂၩအ့ၬႉ ၦၡၩမၩဆၧအဂ့ၩန့နးဂၩအ့ၬႉ 

ၦလၧအၥ့ၪယၫဆၧအခိးအတၩနီၪ လၧထီဘဲၫယီၩအဂးမွဲဂ့ၩႇ လၧထီလၧယၫအဂးမွဲဂ့ၩ ကဆုၭန့ဘၪအခိးအတၩလဖၪလီၫႉ ၦလၧအလၥ့ၪယၫဘၪဆၧအခိးအတၩလဖၪနီၪ လၧထီလၧယၫအဂး အခိးအတၩအတရၫ့နီၪ ကကၭဘံၭထၭၥၭလီၫႉ

လၧပၥၭမၧၫ့ကိၭနံၩဒ့ၭအဖၧၩ့နီၪ ၦလၧအမၩဆၧၩ့ပၧၩႇ အမၩခိးမၩတၩပၧၩလဖၪနီၪ အီၪဝ့ၫအၪဂၩလီၫႉ အဆိၪထုၬႇ ကဆါယွၩဖ့ၪလၫ့ပၧၩဆၧၥၭမၧၫ့ႇ ဒဲပဂဲးပဘၭဒဲ မၩဆံၫ့ထၪ့ထဲၩ့ပၧၩလၧဆၧဒဲၩဘၭဆၧခံၫထူၬဆၫအၧၩ့လီၫႉ ယွၩအမိဒဲပမိဆံၫ့ဎံၪနးမၫရံၫယၩဒဲၦဆံၫ့ဎံၪၥံၪဒဲ အၥီၪ့လဖၪနီၪဆ့ႇ အၪ့ကံၩ့ဘၩဆိၪဖၪန့ပဂးႇ ဒဲယိထဲၩ့ခွါထဲၩ့ပၧၩလီၫႉ ဆၧနီၪအကၠီၩ့ ပကြၨၭၥၭနၪ့ကၠၭ အဝ့ၫၥံၪအခိးအတၩဆ့အ့ၬႉ