ယိၩယိၩနံၪ့အထးဖၧၩ့ႇ မုနွ့ၫ(၂၁) နွ့ၫလနွ့ၫႇ

အၪဒၪဆၧႇ ပဝ့ၫဒၪၦၡၩလဖၪယီၩ ပအဲၪဒိၭလ့ၩဖိၬဖၧၩ့ၥၭအလဲႇ ပအဲၪဒိၭလ့ၩနုၬတရၫ့အလဲတၭႇ ပမိလ့ၩဆၧဘီၪဘီၪယီၫယီၫႇ ပမိလ့ၩထီၩ့ဖျဲၪဖျဲၪလီၫႉ ဆၧလၧပၥၭဆိၫ့မုလါလဖၪနီၪ ပမိန့ဘၪဖျဲၪဖျဲၪလ့ၬဒဲအၪအၪလ့ၬလီၫႉ လၧထၧထိးထဲၩ့တၩ့ထဲၩ့အလးႇ ဘဲၫပၥၭအီၪဝ့ၫအၥိၭႇ ပလ့ၩနုၬ ဘီၪဘီၪယီၫယီၫဒဲဖျဲၪဖျဲၪန့အ့ၬႉ ခၫ့ဖျီၫ့လၧအဆၧထိးနိၫ့ထိနၭႇ ထိးၡၪ့ထိးယၬႇ လၧအဆၧထိးၥံၫၥၭလၧထုၪ့စူၪယၫအလီၩႇ ယ့ၫၡူၬထိးထဲၩ့တဲၩ့ထဲၩ့ပၧၩနီၪလီၫႉ

ယ့ၫၡူၬနီၪ မွဲ ဖၧၩ့ၥၭႇ ဆၧမွဲဆၧတီၩႇ ဒဲဆၧၥၭမၧၫ့လီၫႉ အ့ၪလမွဲ ဘၪလၧယ့ၫၡူၬနီၪ ၦထီၩ့လၧဖါအအီၪနးဂၩအ့ၬႉ  အ့ၪလပဖိၬ ဘၪယ့ၫၡူၬအခဲၫ့ႇ အ့ၪပလအီၪၥၭမၧၫ့ ဘၪလၧဆၧတီၩဆၧလီၩ့အဖၧၩ့ႇ အ့ၪပယိၭထၪ့ဘၪပထုၪ့စူၪယၫ ဘဲၫယ့ၫၡူၬၥိၭနီၪ ပထီၩ့လၧဆၧထီးထဲၩ့တဲၩ့ထဲၩ့အလးၥ့ၪအ့ၬႉ ယ့ၫၡူၬနီၪ ၥိၪဖီၩ့အတရၫ့လီၫႉ ယ့ၫၡူၬနီၪ မွဲဝ့ၫမူၭခိၪဘၩ့မုးအတရၫ့လီၫႉ အ့ၪလပခိၪနၪဘၪယ့ၫၡူၬအလူအထၫႇ  အ့ၪပလဆၪ့လၩ့ၥုၪ့ဆၪ့လၩ့ဘၪပၥၭ ဘဲၫယ့ၫၡူၬအၥိၭနီၪ ပလ့ၩနုၬလၧမူၭခိၪအဘၩ့အမုးဖၧၩ့ၥ့ၪအ့ၬႉ ယ့ၫၡူၬစ့ၭထၬဝ့ၫႇ ၦၥထံၫလဖၪ ဘၪလ့ၩနုၬလၧမူၭခိၪအ ဘၩ့အမုးဖၧၩ့ကၪမၬလီၫႉ မူၭခိၪအဘၩ့အမုးအတရၫ့နီၪ အံၪ့ခိၭႇဖၨၪခိၭလၧၫ့အကၠီၩ့ႇ အ့ၪပမိလ့ၩဆိၬထဲး ပကျိၪစ့ၩအထိၪ့ႇ ပစူၪလးခၪ့ခိၪအထိၪ့လၧပၥိၭစွါဘိၩႇ ပလ့ၩနုၬလၩ့ထီးအ့ၬႉ မူၭခိၪအတရၫ့နီၪ ဖုၪခိၪႇ အံၪ့ခိၭ လၧၫ့တၭႇ အၪ့ပၥၭထၪ့ထီၫႇ အ့ၪပမၩဎိၩမၩဒိၪၥၭစွါဘိၩႇ ပလ့ၩနုၬလၩ့ထီးအ့ၬႉ

အ့ၪပအဲၪဒိၭၥၭကွံၩ ဂၪ့ခိၪအဆၧမုၬဆၧလၩႇ ကျိၪစ့ၩႇ စူၪလးခၪ့ခိၪစွါဘိၩႇ ပလ့ၩနုၬန့ယီၫယီၫအ့ၬႉ ဆၧနီၪမၩထံၬထၭပၧၩပဆၧလ့ၩနုၬလၧဆၧထိးထဲၩ့တၩ့ထဲၩ့အလးနီၪလီၫႉ

ပကိၭလၩ့ပၥၭ ကၠဲၬဖိၪကၠဲလံၩႇ ပကိၭလၩ့ပၥၭဎြံၬဖိၪလါနၫ့ဂ့ၩ အ့ၪပအဲၪဒိၭန့ၫမုၪခီၩလဲးအဆၧမၩႇ အ့ၪပဆၧအီၪက့ၪၥုၪ့အီၪက့ၪၥၭနီၪ လလၩ့ဂၬဘၪယ့ၫၡၬအဆၧအီၪက့ၪၥုၪ့အီၪက့ၪၥၭစွါၬဘိၩ ယ့ၫၡူၬကစံၭပၧၩႇ နအီၪဂဲၫခီၫခီၫလဲၫႇ ယၥ့ၪယၫနၥံၪအ့ၬႉ

ယ့ၫၡူၬစံၭထၬဝ့ၫႇ စမၭၥုၫ ၁၀: ၃၂ႇ ကယဲၦလၧအအုၩ့ယၧၩ လၧၦၡၩၥံၪအမ့ၬယၫလဂၩဂၩနီၪ ယမိအုၩ့လၩ့အဝ့ၫနီၪ လၧယဖါအီၪလၧမူၭခိၪ အမ့ၬယၫဆ့လီၫႉ

ဆၧနီၪအကၠီၩ့ႇ ပၥၭမၧၫ့အထီးယီၩႇ ပကဘၪအုၩ့ယ့ၫၡူၬဎြံၬႇ လၧပဆၧချဲၩ့ႇ ဒဲလၧပဆၧဖံၭဆၧမၩဖၧၩ့လီၫႉ ပက ဘၪအဲၪကွံၩအဝ့ၫႇ ပကဘၪဘိၪ့ထၪ့ ဘၩထၪ့အဝ့ၫႇ ဒဲပက ဘၪမၩ ဆၧလၧအဝ့ၫအၪ့မၧၫ့ပၧၩလဖၪနီၪလီၫႉ အ့ၪကၥံၫထီမၬဆံၭႇ ပကမၩနီၪ အခံၫ့အီၪလၧၩ့အ့ၬႉ အ့ၪပၥံၫကကၠၪမၬဆံၭႇ ပကလ့ၩဒိၪထိၬမူၭခိၪ ဘၩ့မုးအတရၫ့နီၪ ယွၩကစံၭပၧၩႇ ယၥံၪယၫနၥံၪအ့ၬႉ

ဘဲၫပကိၭလၩ့ပၥၭ ကၠဲၬဖိၪကၠဲလံၩႇ ပကိၭလၩ့ပၥၭဎြံၬဖိၪအၥိၭႇ ပကဘၪဖိၬယ့ၫၡူၬအခဲၫ့ႇ ပကဘၪယိဒီၩ့ယ့ၫၡူၬ ဒဲပဆၧအီၪက့ၪၥုၪ့အီၪက့ၪၥၭနီၪ ကြၨၭလၩ့ဂၪယ့ၫၡၬအဆၧအီၪက့ၪၥုၪ့အီၪက့ၪၥၭနီၪလီၫႉ အနီၪမၭဆံၭႇ ပကကဲၪထၪ့ဎြံၬဖိၪအလ့ၩထံးလၩ့ဆ့ၭလဖၪလီၫႉ