မုအီၪပွံၭနံၩ မုနွ့ၫ (၁၄)

<အဲၪကွံၩဘၪထၧၫ့ဖုဝဲမုၪခွၫၥံၪဧ့ႇ
လၧပဆၧၥၭမၧၫ့မုကိၭနံၩအဖၧၩ့ယီၩ ပဝ့ၫဒၪၦၡၩကိၭဂၩဒ့ၭႇ လၧပနးခီၫ့အဂး ဘၪဒၪခီၩ့ဆၧၫ့ယၫႇ ဆၧကၪဆၧဂဲၩႇ ဆၧၡၪ့ဆၧနၭႇ ဆၧစူၭဆၧဆၫႇ ဒဲပဆၧဖံၭဆၧမၩႇ မူၩဒၩၥံၪအီၪဝ့ၫအၪအၪလ့ၬအကၠီၩ့ ဆၧပွံၭပၥၭကိၭဂၩဒ့ၭလီၫႉႉ ဘဲၫနီၪၥိၭဆ့ႇ လၧပနးၥၭအဖၧၩ့ႇ လၧပဆၧဒဲၩဘၭႇ ဆၧဘၪမၪအကၠီၩ့ႇ ပၥၭဎၧၫ့ႇ ဒဲပနးၥၭဆၧပွံၭအၥၭကိၭနံၩဒ့ၭလီၫႉ ပနးခီၫ့ဒဲပနးအဂဲးအဘၭကအီၪထၪ့ထဲၩ့ဝ့ၫအဂး ပကဘၪအီၪပွံၩဂ့ၩဂ့ၩဘၪဘၪလီၫႉ ဆၧနီၪအကၠီၩ့ ယ့ၫၡုၬကိၭဖံၭၥိၭပၧၩလၧအအီၪႇ စံၭဝ့ၫဒၪႇ ၦလၧအယိၭဆၧဎၧၫ့ ဒဲဆၧပွံၭအၥၭထီးအလူၬၥံၪဧ့, ဂဲၫထဲၩ့လၧယအီၪဆံၭ. ယမိဒုၭအီၪပွံၭနၥံၪလီၫ.

လၧဎြံၬဖိၪအဂးမွဲဂ့ၩႇ ဆၧဘိၪ့ဆၧဘၩအဂူၫဂၩၥံၪအဂးမွဲဂ့ၩႇ မုအီၪပွံၭနံၩႇ မးၥံၫနံၩအီၪဝ့ၫဒၪလီၫႉ လၧဎြံၬဖိၪၥံၪအဂး အတုၬမ့ၬနီၪ မွဲဝ့ၫဒၪမးၥံၫနံၩႇ မုအီၪပွံၭနံၩလီၫႉ လၧဆၧမၪလူၬ ၁၀ ထံၪအဖၧၩ့ႇ စံၭထၬဝ့ၫႇ အီၪက့ၪဆံၫ့ဎံၪမးၥံၫနံၩနီၪဆံၭ ဒဲ ဆၧအီၪကီၪ့ဆၧမၪလူၬ ၆ ထံၪႇ စံၭထၬဝ့ၫႇ လၧမုခၪ့ထံၭနီၪမွဲဂ့ၩႇ မုၥံၪနံၩၥံၪလၧဘၪမးၥံၫနံၩနီၪမွဲဂ့ၩ ခိၪနၪမံဆၩဆံၫ့ဎံၪနီၪဆံၭႉ

ပလ့ၩထၪ့လၧဘၩယွၩၥရိၬႇ လၧဘိၪ့ဆံၫ့ဎံၪၥရိၬဖၧၩ့ႇ ကိၪဘိၪ့ဆံၫ့ဎံၪအမ့ၬယၫႇ ဆၧလုထၪ့မံဆၩႇ ဆၧခိၭနၪယွၩလူယွၩထၫ လၧဆၧကယုကစုၩဖၧၩ့ႇ ဆၧဒိၭန့ကိၪ့ဘိၪ့ဆံၫ့ဎံၪႇ ဆၧလ့ၩဘိၪ့ထၪ့ဘၩထၪ့ယွၩႇ ဆၧၥံၫကျံၩထၪ့ယွၩအခိးအတၩႇ ဒဲဆၧအၪ့ကံၩ့ဘၩဆိၪဖၪထၪ့ကဆါယွၩအီၪ လၧဖၪနီၪ မွဲဆၧမၩလူၬဂီၩ့အခံၫ့အ့ၬႉ မွဲဝ့ၫဒၪဆၧလ့ၩအီၪပွံၭ လၧယွၩအမ့ၬယၫႇ မွဲဝ့ၫဒၪ ဆၧအီၪက့ၪဆံၫ့ဎံၪမးၥံၫအနံၩႇ ဒဲမုနံၩကိၭနံၩဒ့ၭလီၫႉ
လါနၫ့ဂ့ၩႇ ၦလနၩ့နၩ့စံၭဝ့ၫႇ ပဆၧမၩအီၪအၪအၪလ့ၬအကၠီၩ့ႇ ပဖ့ၪလၫ့ ဆၧဘၩဆိၪဖၪအခံၫ့န့အ့ၬႉ ပလ့ၩထၪ့ဘၩကၠဲၬချုၬအ့ၬႉ လၧပဆၧအၪ့ဆၧအီၩႇ ဆၧကီၩ့ဆၧၥိၭႇ ပဂံၪ့ပဎၪ့အဂးႇ ပဘၪခိးဂဲးခိးဘၭႇ မၩဆၧမၩအကၠီၩ့ႇ ပလ့ၩထၪ့ဘၩကၠဲၬချုၬအ့ၬႉ
ပနါဂၧၫ့ယံၩယါႇ
ၦဆံၫ့ဎံၪ မၫၥၫထရ့ၫဇၩႇ အမံၬထၬမုၬလဖၪနီၪ ဘၪဘိၪ့ထၪ့ဘၩထၪ့ကဆါယ့ၫၡုၬ လၧဘိၪ့ဆံၫ့ဎံၪဖၧၩ့ ကနံၩနီၪ ကနၩရံၩလီၫႉ လါနၫ့ဂ့ၩ အဝ့ၫၥံၪ ဘၪယိၦစူၭၦဆၫႇ ၦၡၪ့ဖိၪယၬဖိၪအၪဂၩတၭႇ ဆၧမၩအၪဒ့ၭအကၠီၩ့ႇ အၪ့ကံၩ့အၪ့ယၫ မၫၥၫထရ့ၫဇၩႇ ဘဲၫၥိၭကမၩလၩ့ၡၩ ဆၧဘၩဆိၪဖၪအခံၫ့လၧအဝ့ၫၥံၪအဂးနီၪလီၫႉ လါနၫ့ဂ့ၩ ၦဆံၫ့ဎံၪမၫၥၫထရ့ၫဇၩ လမၩလၩ့ၡၩဘၪဆၧဘၩဆိၪဖၪအခံၫ့လကၭလၧၩ့ႇ မၩအၪထၪ့ထဲၩ့ ဆၧဘိၪ့ထၪ့ဘၩထၪ့အခံၫ့ႇ လၧကနၩရံၩအလးနီၪ မၩအၪ့ထၪ့ထဲၩ့ဝ့ၫ နံၫနၩရံၩနီၪလီၫႉ
ထၧၫ့ဖုဝဲမုၪခွၫၥံၪဧ့ႇ
လၧၥၭမၧၫ့မုကိၭနံၩအဖၧၩ့ယီၩႇ
ဒံၩ့ပဆၧမၩအၪႇ ဒံၩ့ပဘၪဆၧဎၧၫ့အၪႇ ဆၧပွံၭပၥၭႇ ဒံၭဆၧကၪဆၧဂဲၩအၪႇ ဒံၩ့ပကဘၪအၪ့န့အခံၫ့ လၧယွၩအမ့ၬယၫနီၪလီၫႉ ဘၪနီၪလဲၪႇ ဂဲးဘၭႇ ဆၧအီၪပွံၭႇ ဆၧဆိၪဂ့ၩဆိၪဘွၩနီၪ အီၪလၧကဆါယွၩအအီၪလီၫႉ ယွၩအဆၧမၩဆၧၩ့ႇ အခိးအတၩအ့ၪလပၫဘၪႇ ပမၩဆၧအဂ့ၩန့နးမံၩ့အ့ၬႉ ပကဆုးလ့ၩလၧယၫအဂး ပဂဲးပဘၭအီၪအ့ၬႉ

လါနၫ့ဂ့ၩႇ ပဝ့ၫဒၪလဖၪယီၩႇ အၪဒၪဆၧႇ ပလီၩ့ဎွါပဆၧအီၪပွံၭႇ ပဂဲးပဘၭႇ လၧၦၡၩအဂူၫဂၩအအီၪႇ ဒဲလၧဆၧအဂူၫဂၩလဖၪအဖၧၩ့နီၪလီၫႉ ဆၧအၪ့ဆၧအီၪႇ ဆၧလးကျဲၩ့အမုၬႇ ဒဲဆၧလၧၦၡၩၥံၪနီၪ ဖ့ၪလၫ့အ့ၪပၧၩ ဆၧအီၪပွံၭအလးထံးလၩ့ဆ့ၭန့အ့ၬႉ
ဘၪနီၪလဲၪစွါဘိၩႇ
ဆၧဆိၪဂ့ၩဆိၪဘွၩႇ ဆၧအခိးအတၩႇ ဆၧအီၪပွံၭႇ ဆၧမုၬဆၧၡူၪႇ ဆၧဎူၫဆၧဎၩ့အခၪ့ထံၭနီၪ မွဲဝ့ၫဒၪကဆါယွၩလီၫႉ အ့ၪလမွဲဘၪ လၧယွၩလဂၩဎးႇ ၦၡၩဖ့ၫလၫ့ပၧၩ ဆၧအီၪပွံၭအလၩ့ထံးလၩ့ဆ့ၭ န့နးဂၩအ့ၬႉ ဆၧနီၪအကၠီၩ့ ၦဆံၫ့ဎံၪစအီၭဂုၭစတံၩစံၭထၬဝ့ၫႇ ပၥၭယီၩ အ့ၪလအီၪပွံၭဘၪလၧယွၩအဖၧၩ့နီၪ ႇ ဒိၪန့ဘၪဆၧအီၪပွံၭၥ့ၪနးကၠၪအ့ၬႉ