မုအီၪပွံၭနံၩ မုနွ့ၫ (၁၃)

လၧဆၧၥၭထိၬပရၧၫ့ကနံၩယီၩအဖၧၩ့ႇ ယ့ၫၡုၬစံၭထၬဝ့ၫႇ 
ၦလၧအအဲၪအမိဂ့ၩအဖါဂ့ၩ အၪနဲၪ့အအဲၪယၧၩယီၩ, ကြၨၭလၧယၧၩအ့ၬ. 
ၦလၧအအဲၪအဖိၪမုၪဂ့ၩ ဖိၪခွၫဂ့ၩ အၪနဲၪ့အအဲၪယၧၩယီၩ, ကြၨၭလၧယၧၩအ့ၬ.
ၦလၧအလမၩန့ဘၪအထုၪ့စူၪယၫ ဒဲအလဖိၬဘၪယခဲၫ့နီၪ, ကြၨၭလၧယၧၩအ့ၬ.
ၦလၧအဒၪန့အၥၭမၧၫ့နီၪ, မွဲအမိမၩလၩ့မါဝ့ၫလီၫ. ၦလၧအၥၭမၧၫ့ လၩ့မါဝ့ၫလၧယကၠီၩ့ယီၩ မိဒၪန့ထဲၩ့ဝ့ၫလီၫ. 
 အဲၪကွံၩဘၪထၧၫ့ဖုဝဲမုၪခွၫၥံၪဧ့ႇ အၡါမၬနီၪ ၦၡၩလၧအကြၨၭလၧယွၩနီၪ အီၪနးဂၩအ့ၬႉ ဘၪနီၪလဲၪႇ ယွၩနီၪ ၦလၧအဆံၫ့ဎံၪထုၬတၭႇ ၦၡၩကိၭဂၩဒ့ၭနီၪ မွဲဝ့ၫဒၪ ဆၧဒဲၩဘၭဖိၪအကၠီၩ့လီၫႉ ဆၧလၧပဒိၭန့ဘၪလဖၪ မွဲဝ့ၫႇ ဆၧအၪ့ဆၧအီၩႇ ဆၧကီၩ့ဆၧၥိၭႇ ဆၧအီၪဆီၪ့အီၪချဲၫ့ႇ ဆၧဒဲၩဘၭဆၧကွဲၪဖျါႇ ပဂံၪ့ဒီၪ့ႇ မိဖါႇ ထၧၫ့ဖုဝဲႇ လဖၪနီၪ မွဲလၧပဆၧဂ့ၩဆၧဘွၩႇ ပဆၧတီၩဆၧလီၩ့ႇ မွဲလၧပကြၨၭအကၠီၩ့ ပဒိၭန့ဘၪနီၪ မွဲအ့ၬႉ ဆၧလၧပဒိၭန့ဘၪလဖၪနီၪ မွဲဝ့ၫလၧယွၩအခိးအတၩအကၠီၩ့လီၫႉ 
ဆၧနီၪအကၠီၩ့ႇ ပကဘၪၥ့ၪယွၩအခိးအတၩလီၫႉ 
ပဆၧအဲၪလၧယွၩအဖၫ့ခိၪနီၪ ကဘၪအဲၪနဲၪ့ဎိၩနဲၪ့ဒံၭ ပအဲၪပမိပဖါႇ ပထၧၫ့ဖုထၧၫ့ဝဲႇ ပဂံၪ့ဒီၪ့ဖိၪႇ ပဘူၭပထံၭၥံၪဒံၭလီၫႉ ပအဲၪန့ၫ ပမိပဖါႇ ပဂံၪ့ဒီၪ့ဖိၪၥံၪႇ ပဘူၭပထံၭလၧၫ့စွါဘိၩႇ ပမွဲယ့ၫၡုၬအထံၩအဖျဲအ့ၬႉ ဘဲၫယ့ၫၡူၬအထံၩအဖျဲႇ အဆၧအၪ့မၧၫ့ဖိၪၥံၪ စဲၪ့ဒၪခွံၬအဂံၪ့အဎၪ့ႇ အဆၧဖံၭဆၧမၩႇ အဘူၭအထံၭၥံၪတၭႇ မၩန့ထၪ့အထုၪ့စူၪယၫ ဒဲဖိၬထၪ့ယ့ၫၡုၬအခဲၫ့အၥိၭႇ ပဝ့ၫဎြံၬဖိၪလဖၪယီၩ ပကဘၪဂဲၫၥုၭဘူၭၥၭ လၧကဆါယွၩအအီၪႇ ပကဘၪဖ့ၪလၫ့လၩ့ပၥၭ ပကဘၪထိးနိၫ့ထိးနၭပၥၭ လၧယွၩအဘၩ့အမုးအဂး ဒဲဆၧတီၩဆၧလီၩ့အဂးလီၫႉ 
ပဆၧအဲၪလၧယွၩအဖၫ့ခိၪနီၪ ပဘၪဖျီၪထၪ့ လၧပဆၧၥၭမၧၫ့မုကိၭနံၩဒ့ၩအဖၧၩ့လီၫႉ လၧပဆၧဘိၪ့ထၪ့ဘၩထၪ့ကဆါယွၩႇ ဆၧအၪ့ကံၩ့ဘၩဆိၪဖၪႇ ဆၧခိၭနၪယွၩအလူအထၫအဖၧၩ့ႇ လကၭဒံၭဘၪႇ ပဆၧအဲၪဆၧကွံၩနီၪ ပဘၪဖျီၪထၪ့ဝ့ၫ လၧဆၧမၩဘိၪ့မၩထးႇ ဆၧမၩဆၧၩ့ႇ ဆၧထိးဆၧၫ့ႇ ၦမွံၩၦထံၫႇ ဒဲၦၡၪ့ဖိၪယၬဖိၪလဖၪအဖၧၩ့နီၪလီၫႉ  
ယ့ၫၡုၬမၪလူၬထၬပၧၩႇ စံၭထၬဝ့ၫႇ 
 အဲၪ ယွၩ န က ဆါ လၧ န ၥၭ ထၧၫ့ ဖျိၪ့ ယၫ ဒဲ လၧ န ၥၭ ၡီၩ့ ထီး အ လူၬ, ဒဲ လၧ န ၥၭ ကိၪ့ ၥ့ၪ ထီး အ လူၬ ဆံၭ.- အယီၩမွဲဆၧမၪလူၬအခၪ့ထံၭ ဒဲအဖၭ ဒိၪလထံၪလီၫ.- အဲၪ ၦ လၧ န နဲၩ့ ထံၭ ဘဲၫ န နၫ့ ဆါ ဒၪ န ဝ့ၫ အ ၥိၭ နီၪ ဆံၭ.-
အဲၪကွံၩဘၪထၧၫ့ဖုဝဲမုၪခွၫၥံၪဧ့ႇ 
ကဆါယွၩနီၪ ဆၧၥၭမၧၫ့ႇ ဆၧအဂ့ၩႇ ဆၧဆိၪဂ့ၩဘွၩဆိၪဘွၩကိၭမံၩ့အခၪ့ထံၭအကၠီၩ့ႇ ဆၧလၧပဒိၭန့ဘၪလဖၪ မွဲဝ့ၫဒၪပမိပဖါႇ ထၧၫ့ဖုထၧၫ့ဝဲႇ ထံၩၥိၭႇ ပဘူၭပထံၭႇ ဒဲစူၪလးခၪ့ခိၪလဖၪနီၪ ပအဲၪကွံၩအၪနဲၪ့ဒံၭ ယွၩနီၪန့အ့ၬႉ  
ဆၧလၧယွၩအတဲၩ့လၩ့ထၬႇ ယွၩဖ့ၪလၫ့ထၬပၧၩႇ ပမိပဖါႇ ပထၧၫ့ဖုထၧၫ့ဝဲႇ ပထံၩပၥိၭႇ ပဆရၫႇ ၥၫ့မုၥၫ့ခၫၥံၪလဖၪနီၪ ၥီၪ့လိၪနဲၪလိၪအ့ၪပၧၩႇ ကၠဲၬလူကၠဲၬထၫႇ ဆၧတီၩဆၧလီၩႇ ဆၧဂ့ၩဆၧဘွၩၥ့ၪလါနၫ့ဂ့ၩႇ အဝ့ၫၥံၪမၩဆံၫ့ထၪ့ထဲၩ့လၧဆၧဒဲၩဘၭတၭႇ ဖ့ၪလၫ့ပၧၩ ဆၧၥၭမၧၫ့အဆိၩအကၠၪန့နးဂၩအ့ၬႉ 
ၦလၧအမၩဆံၫ့ထၪ့ထဲၩ့ပၧၩ လၧပဆၧဒဲၩဘၭဂီၩ့ ဖ့ၪလၫ့ပၧၩဆၧၥၭမၧၫ့ဆိၩကၠၪလၧမူၭခိၪအဘၩ့မုးဖၧၩ့န့ဝ့ၫလဂၩနီၪ အီၪဒၪကဆါယွၩလဂၩဎးလီၫႉ